Lu mayeûr du Bertrès, lu pére Cazin, avét lu tchvå qu'astét lu pus malin do payis. Ç'astét s' trézôr èt i n' l'årét nin co dné po des pîces d'ôr.
Lu mayeûr astét tchèsseû. Il alét à l' tchesse su su tchvå. Pa des conps, avou les atumances dol tchesse, i dvét layî su tchvå an plan dins l' bwès. Ca, po n' nin piède lu cyinr, lu tchèvreu, ûbin l' singlé porsût pa les tchins, il ènn' alét à pîd po trouvu lu biesse catchée dins les coches.
Lu tchvå, passét s' timps an mougnant lès yabes.
A l' fin dol batûe, i shoflét on côp. Lu tchvå, qui choûtét, quand il oyét l’ shoflaedje, i vnét rtrouvu s' maîsse.
Ces pâjîres momints là ont tchandjé quand lu rèvolucion francesse è cumincè. Èt, an 1795, les sondârs dol France ant vnu an-n Ârdène.
In bê djoû, on topet d' sondars, avou à s' tiesse on djènèrå pwartant in bicwane, intra dins Bertrès. Çu-t-ci dmandéve lu mayeûr.
A ç' momint là, Cazin astét ddja vî, sètch èt dreût. Lu djènèrå volét du tote fwace des tchèretes, du foûr èt do strin.
Fidèle à l'idêye otrichyinne, Cazin su rdressot èt i lzî djit : « Les foûrs astant so les cinas (qu’ à Bertrès, on dit les traveûres), èt les strins sont dins les grègnes. Vos a vléz ? Alèz les kî vos-minmes. Mi, mu fonccion m'aspêtche du fé çu sonrte d'ovraedje la. »
« C’est fwart bin, dit-st i lu djènèrå, dju va sûre tes consiaedjes. Dju kuminçrè pa m' sièrvu a ta maujon. Alans î. »
Cazin bacha l' tiesse èt moenna lu troupe dins ses ståles. Les sondârds prindint tot. Lu djènèrå, lu, fèjot l' toûr dol bâtisse èt la k’ i vèt lu tchvå do mayeûr.
« On-z est ossu dandjî du çu tchvå là. Dju l’ ruprins avou ! » dit-st i.
An-z oyant ces mots là do djènèrå, Cazin oyit lu shofla conpé tot d’on plin conp. One pitite lâme vinit s' mète al cwane dè su oûy. Ces hapeûs là plint tot prinre, mès nin su tchvå.
Tot d'on conp, vo l’ la qu’ i s' rudrèsse èt toûne lu tiesse po vey qu'on sondâr sayét di mète lu tchvå padrî one tchèrète.
Qwand ces sondards la ant oyu fini du tot rapåchnè, Cazin s' leya cheûre din s' vî fåteû. Veyant qu'il astét fwart malureûs, ses deûs p'tits-fis du doze èt quinze ans, lî dèjant k'il alint sûre lu trope èt sayî d’elzî ruprinre lu tchvå.
Lu mayeûr volit-z enn' alè avou zès. I n'astét nin fiôteû mès i vlét co dire arvey on dèrin conp à su tchvå.
Lu troupe è nn' alè après Ofagne. Lu maieûr sûjét les sondârs, su catchant padrî les hâyes.
Lu trope n'alét nin trop râde, pasku les tchårs astint bin tcherdjès èt i ronlint dins des voyes plinnes du bonje. Bin sûr, lu djènèrå, lu, avou kékes atchvaleûs, astét voye bin padvant les ontes.
Tot l' monde aresta ås Asnès, po moussè dins on cabaret èt î beûre.
Veyant l' nutîe vnûye, les ptits-fis ant stî dustèlè lu tchvå fû dol tchèrète. Cazin ruwêteûve tot çoulà d'å lon, vèyanmint su âdje.
Tot d'on conp, on oyit on conp d' shofla qui vnét come du none pårt. Lu tchvå, li, atindant lu shofla, su mètit à pètè å djâle èt racouru po rtrouvu su maîsse.
Lu mayeûr monta dsu, èt-z arala jusqu’à su maujon avu. I fjit ses bagadjes, dijit adiè a s' famile èt-z ènn' ala jusqu’à Cologne po-z î vikè l’ restant du s’ vîe èt-z î moru.
Lu morale nos dit quu on-ome, voci Cazin, è mî inmè tot lèyî teumè : su famile, su mestî, su ârdjint èt tot l' resse, et minme pètè à djâle vikè dins on onte payis, jusse po årdu su bin lu pus mamé por li, su tchvå.[1]
Les passés simpes ont sovint stî erîlés so l' disfondowe « dju m' dizi », co ramexhnêye dins les anêyes 1930 après nozôtes (Libin), ALW 2 p. 317.