Lu lîve èt l’tortue avint lî lu fâbe da Lafontaine. Lu lîve avèt dit al tortue : « On pout racminssèr mile côps, avou mi tu n’gangnrè jamês » Lu dèfi èstèt lancè.
Is tchwèzichant on djoû èt one eûre. Is dmandant o coucou d’alèr ôs kate cwins do bwès po anoncèr lu grand match dol ruvindje.
Vla nos’ coucou an plin mèstî d’anonceû publik : « Coucou ! coucou ! coucou ! djûdi ki vint a deûs eûres du l’après non.ne, grand match ruvindje intur lu lîve èt l’tortue al cwène do bwès dol cinse do Tchèstê Tchèploû. So one longueûr du kinze mètes, lès deûs champions vont s’atakèr. Vènéz z’î tortos. K’on su l’duziche ! Coucou ! »
Djûdi arivè, lès bènèvoles su tchèrdjant du tracèr l’parcours èt lès zones neûtes po lès rwêtants : c’èstèt l’cok dol cinse ki dirijèt lès mèzureûs.
One bone eûre avant l’match, on vèt arivèr totes lès bièsses do bwès. Tos lès kat’ pates minè pa on grand ciyinr dij cwanes. Tos lès deûs pates minè po fêzans. Tos lès oujês ôtou do coucou ki va fére lès comantêres. Cand lès deûs champions arivant, tortos wikule o pus fwârt. So l’ligne du dèpart, lu cok dol cinse su prèpare. Come i n’a pon d’révolvèr, il a pris on satchê, i l’gonfule èt i va l’fére pètèr po donèr l’signal do dèpart.
Prèts ? PAF !
Lu lîve da Lafontaine avèt mougnè lès carotes avant d’pôrti èt avèt lèyi filèr l’tortue. C’ti ci, a fêt l’contrêre, il a fêt one dijin.ne du opes…èt il a seûlmint cmincè a mougnèr lès carotes on côp l’ligne d’arivée ut’…ça vou dire k’après trante sugondes, lu tortue èstèt nètchéye, èle avèt pièrdu.
Coradjeûze, èle a cand min.me volu fére tot l’parcours èt tos lès rwêtants l’ont acoradjè come si èle avèt stî l’prumîre. Po l’vinkeûr èt l’vincue, on a fêt one bèle fièsse k’a durè jusk’a totes lès eûres. On-è côze co sovint o payîs dès grands bwès.
Moralitè : I n’fô nin cwâre come parole d’èvanjile tot ç’ku Lafontaine a scrit dins sès fâbes, lu papî s’lêt scrîre.
Sicrît li 6 d’ octôbe 2001.