| Taurê | Vatche | |
|---|---|---|
| Ôteû au garot | 127 - 137 cm | 124 - 133 cm |
| Toû d’ pwètrine | 185 - 220 cm | 180 - 215 cm |
| Pwès | 650 - 950 kg | 480 - 800 kg |
Li race d’Hérens, c’è-st-one race po l’ montagne, aus coûtès pates, bin faîte po lès grands tropês dès fwârt ôtès patures. Èle pout gripè djusqu’à 3000 m. Sès tayons èstint d’djà dins l’ Valais èviè 3000 av. J.-C.
C’è-st-en 1859 qui l’ race d’Évolène èst r’conûwe come race d’Hérens.
Lès djins do Val d’Hérens sont fiérs di leûs batayeûsès rin.nes qui s’ cobatèt èt si sukèt inte zèles…
Leûs vatches, c’èst come leûs tchins, leûs tchèts. Èles sont miloutéyes, bin arindjîyes. Ome, fème, djon.nès djins, mwins’ djon.nes ènn’ont one, deûs, treûs, quate. C’èst leû fîve.
Dispôy leû djon.ne âdje, lès vatches si dispètronèt tofèr po l’ prèmîre place. Ci n’èst nin râre di vèye dès-aumayes si bate dins lès près.
Èles sont dès batayeûses, c’èst l’ vraî, maîs télemint atirantes. Avou leû caractère fwârt doûs, èles choûtèt aujîyemint.
Ci race-là qu’èst gnèrveûse èt bin rèwèyéye in.me bin s’ trovu avou lès djins.
Èle a tot ç’ qui faut èto po rotè dès-eûres au long.
Au mwès d’ djwin, au momint dol montéye (inalpe), lès vatches d’Hérens si batèt inte zèles d’one manîre naturèle — c’èst leû-z-instint — po dècidè do chèf do tropê èt dèfini l’place di chaque di zèles timps d’ l’èstè. C’èst ç’ qu’on lome lès lutadjes di rin.nes.
C’è-st-one vraîye ûsance dins l’ Valais. C’èst l’ momint po lès tropês (100 à 150 bièsses) di r’trovu lès patures di ôteû. Après leû passadje di deûs à treûs mwès dins lès près dès valéyes, i l’zî faut gripè to là-ôt po n’ ritchinde qu’au mwès d’ septimbe. C’è-st-ossi on raploû po tote li famile. Lès treûs jénérâcions si rèscontrèt à l’ « alpage » po-z-admirè l’ biaté èt lès rimuwerîyes di leûs vatches.
Au prétimps, dins lès valéyes, lès djins dès viyadjes vinèt r’waîtè leûs lutadjes su l’ timps dès grands concoûrs. Èles ni s’ fièt nin mau. Èles si cobatèt seûlemint en s’ boutant avou l’ tièsse èt lès cwanes. One bièsse èst pièrdante quand èle rècule ou bin qu’èle ni vout nin lutè.
Maîs, quand éles si cobatèt vèla dins lès ôteûs, dins l’ dècôr naturèl po lomè li « rin.ne di l’alpadje », c’èst télemint muwant ! I gn-a dès paujères èt dès lûteûses, lès cwanes si tukèt… On-z-ètint l’ son dès clotches au triviè dol montagne. Li rin.ne di biaté, di bèle alûre, divint l’ fièrté di s’ propriétaîre.
On djoû d’ « inalpe », c’è-st-on djoû qu’ lès amoureûs dès vatches d’Hérens ratindèt… come li djoû d’ Noyè po lès-èfants.
Èle si faît inte li mitan do mwès d’ septimbe èt l’ mitan do mwès d’octobe. Lès vatches sont èbèlîyes avou dès bouquèts d’ fleûrs èt dès rubans. Li rin.ne èst l’ mwinrneûse do tropê avou s’ rodje ruban loyè autoû di s’ pwètrine. Arivès di d’ bin lon, one masse di djins vinèt lès véy ridchinde èt dèfilè. On-z-ètind l’ son dès clotches èt lès apèls dès vatchîs djusqu’à l’ valéye.
Lès sonètes ont difèrints ûsadjes
- Lès vatchîs p’lèt r’trovu lès vatches pus aujîmint si èles si pièrdèt.
- Èles fièt coru èvôye lès vipéres.
- Èles sièrvèt éto à r’conuche chaque vatche, come li son dol vwè po lès djins. Chaque di zèles a on son difèrint dès-ôtes.
- Èles ont difèrin.nès grandeûs. Di pus’ qui l’ vatche èst vîye, di pus’ qui s’ sonète èst grande. Fabriquéyes à l’ mwin, lès sonètes ont one grande valeûr do keûr po lès propriétaîres dès vatches. Èles sont capabes di durè pus’ qui 50 « estives » èt on lès faît sovint passè d’one vatche à s’ vê.
- À l’ocâsion dès lutadjes di rin.nes, lès rècompinses po lès mèyeûsès lûteûses sont todi dès sonètes aus coleûrs do payis.
Sicrît po li scole di Bive do 13 di setimbe; kékes pititès tchitchêyes ont stî rbodjeyes po cist eplaidaedje vola.