« On v’ fêt priyî à l’ètér’mint
d’à Tch’han Djôsèf Matî Pènêye,
à l' porotche, po d’min, noûv et d’mêye… »
L’ome: Tin! vo-l'-là mwért?
Li feume: Nèl savîz-v’ nin ?
L’ome: I hosse è mantche dispôy lontins.
Li feume: Çou qu’ c’est d’ nos-ôtes !
L’ome: Awè, c’èst vrêye !
— « On v’ fêt priyî à l’ètér’mint
d’à Tch’han Djôsèf Matî Pènêye… »
L’ome: D’vant di m’ marier, n’s-èstîs wèsins.
Li feume: Alez-v’ co ‘ne fèye piède vosse djoûrnêye ?
L’ome: On s’ kinoh dispôy tant d’annêyes !
Li feume: Fez fé vosse bâbe, alè, fåt bin !
— « On v’ fêt priyî à l' ètér’mint… »
dins « Li pan dè Bon Diu » (Recueil complet des poèmes wallons de Henri Simon, coleccion « Nos dialectes » l° 4, Vaillant-Carmanne, Lidje, 1935, p. 44, pu dins l' Antolodjeye Piron p. 264.