Sol tins kel mame, ele meteut l' tåve,
Po cwand l' popa rvénreut soper
Niniye racontéve ene bele fåve
A s' pope, k' aveut l' air del schoûter.
Et Bebert ki s' aveut fwait ene vedje
D' ene viye cane et d' on coron d' fi
Pexhive divins l' batch å tchåfaedje
To djhant : ! I vént do betchî.
Pu vo l' la ki brait : « Sinte Djannesse !
Dji tén ene anweye di troes kilos ! »
I leve si cane di totes ses foices
Et bouxhe ene taesse djus do djivå.
Cwè çki c' est, breya-t ele li mere
Vos spiyîz l' manaedje, don, brigand !
Et, sol prumî mouvmint d' colere
Ele dene ene petêye a l' efant.
Ene pitite petêye, tote ledjire…
Mins Bebert, a çou ki paret
El trova trop foite a s' manire
Et s' meta-st a braire come on vea.
Li mame — ele sont tertotes pareyes —
El rapåjhta : "Djans, m' fi, c' est tot !
Rissouwez vos ouys, don, mamêye !
Voloz vs ene roye di tchocolåt ?
Todroet, vole Bebert ki reye.
I xhoube ses låmes avou s' vantrin.
Et hagne bénvite divins l' soucreye.
Mins , leye, ki n' aveut rén,
L' efant rashonna tot s' coraedje
« Mame, dit-st ele, tot s' metant tot près,
Et tot stindant s' nozé vizaedje,
Dinez m' on ptit petård, s' i vs plait… »
Li petård
Li petård