Li spitant meuûs d'avri fait d'dja sclater so l' håye
tos lès p'tits-oûy tinrûles qui l' frudeûr èdwèrma;
èt, dismètant qu'èl wêde li wazon radjonnih
èt stitche vès l' tchaud solo sès djètons si fråhûles,
li bwès, qu'on veût d'à lon, s'èwal'pêye d'ine brouheûr
d'on rodje sètchant so l' vért, qui rapinse li fouyèdje.
Lès-oûhês sont rim'nous : on-z-ôt d'vins lès bouhons
tos lès måyes qui r'cwèrdèt leûs pus doûzès tchansons
po l'frumèle qui cotèye èt qwîrt a mète sès-oûs.
C'èst l' prétins. Tot ravike ! èt l' pauve grain, qui l' djalêye
aveût tant rascráwé, si r'lîve, come on malåde
qui k'mince a s' rihaper d'ine tènisse maladèye.
Mins 1' mateûr lî fait fåte : ossu l' Ci qu'èst la-d'zeûr
a d'dja compris s' misère èt, come s'i fahe on sène,
la, dè costé d' bon vint, lès nûlêyes acorèt
èt l' plêve tome, doûce èt tchaude, inte deûs-êres di solo,
L'êwe èt l'feû s'acoplèt po rinde dèl fwèce al tére :
li séve monte, li grain crèh, vèrdih èt s'aboh'nêye.
Èt vola d'on plin côp, so l' campagne qui s' loukîve
come faite d'ine seule grande pèce, qui lès tchamps s' pârtihèt,
tot l' kitèyant a vérts bokèts.
Ossu, qwand l'ome vinrè po vèy çou qu'è-st-av'nou
dè grain qu'il a sèmé, lès promèsses dè prétins
lî f'ront roûvî lès hisses qui l'iviér lî a d'né.
a pårti del modêye di 1935