Li pan dè bon Diu (Haust, 1924)/IV

Èn årtike di Wikisource.
IV
rortografiaedje da Jean Haust
Li pan dè bon Diu, 1935 (rortografiaedje)
L'iviér

Vola l'iviér vinou : so lès téres disseûlêyes,
pus rin, ni djins ni bièsses.
Lès r'lûhantès-èréres, rètrôk'lêyes è tchèri,
s'arènihèt dèdja,
èt l' bisteû, tot foû d' lu dè vèy qu'on l' mèt′ è sère,
beûrlêye divins lès stås.
Ine cwahante bîhe sofèle, lès sûrs sont dèdja pris :
i djale a finde lès pîres,
èt l' pauve pitit djonne grain, qu'àviséve si virlih,
si racrampih di freûd.
L'ome, lu, qu'è-st-èl coulêye, tûze a çou qu'advinreût
si l' djalêye duréve trop′ :
Adiu lès bês-awouts, lès tchårs qu'on tchèdje a make èt lès cinas trop streûts !
C'èst mutwèt tot-a hipe s'i pôrè ramèh'ner
çou qu'il a sèmé d'grain ! »
Mins, la qu'i s' lårmèn'têye so l' histou qu'èl rascråwe,
li tins candje tot d'on côp ;
ca vola dès flotchètes qui passèt totès blankes
å-d'-divant dèl finièsse…
L'ome èst dèdja so l' soû : « — Awè ! c'èst bin l' nîvaye !
Èl vèyez-v', la d'å lon
acori so nos-autes, come on djônê qui same?
èl vèyez-v' s'ètèsser ? »
Ossu, so må pô d'tins, li tére ni sèrè pus
qu'ine grande blanke sitårêye,
qui lès håyes èt lès bwès, lès-åbes èt lès bouhons
marquèt d'ine tètche blouwisse.
Asteûre i pout djaler : vola l' grain qu'èst foû sogne.
I va houri, pâhûle,
tant qui l' solo d'avri lî dèye tot l' disfûlant :
« Ti pous crèhe a t' sonlant ! »