Vola dèdja 'ne hapêye qu'on-z-a drèssî lès djåbes.
Èles-ont sûr faît leû r'djèt, ca vochal lès tchèrètes
qui d'hindèt dè viyèdje èt moussèt d'vins lès téres.
Li campagne, qu'aveût stu påhûle dispôy quéques djoûs,
si r'peûpèle èco 'ne fèye. Tos lès brès′ sont-st-èn oûve,
èt lès longowès fotches, ataquant lès tèssês,
lès d'molèt djåbe a djåbe, po tchèrdjî lès hauts tchårs
d'on grain bin sètch èt qui hil'têye la qu'on l'ètèsse.
Totes lès vôyes dè viyèdje sont rimplèyes d'atèlèdjes,
qui montèt, qui d'hindèt, onk al vûde, l'aute a tchèdje.
Lès rudions, lès-èssis, lès corîhes èt lès djins
hil'tèt, crînèt, claquèt, brèyèt. C'è-st on disdut
sins parèy. On veût l' djôye marquêye so lès visèdjes,
ca l' timps sièv a sohaît. Divins lès cinses, lès pwètes
sont tapêyes tot-å lådje èt lès tchårs moussèt d'vins,
tot fant rèsdondi l' coûr dès pèsants pas dès dj'vås.
Et, la qu' lès hauts cinas s'implihèt disqu'à teût
èt qui l' pièce mâque po l'rèsse, rade dès pîces si lèvèt
sol campagne, èt lès môyes s'èmontèt come dès tours
so l' cîr riglatihant dèl loumîre dè solo,
qui s' lêt rider, bin pâhûl'mint, la, drî lès tiérs !
Li pan dè bon Diu (Haust, 1924)/IX
Li tchèrièdje