Avou m' hårkea so mes deus spales,
Dj' aléve al fontinne rimpli mes saeyeas
Cwand amoussa, foû d' ene rouwale
On gros vî monsieu ki m' bodja s' tchapea.
- Vos fjhoz petchî, dit-st i, Mamjhele
So des blankès spales on n' doet rén tcherdjî.
Dinez m' çoula; mins, po m' dringuele,
Årè dj' ene sacwè po vs aveur aidî ?
- Dji n' a rén a dner, Monsieu, dj' el rigrete
Po-z aveur al vude poirté mes saeyeas
Mins cwand i sont plins, dj' rabresse a picete
L' binamé valet ki poite mi hårkea (deus côps).
Si c' est insi, dj' årè l' båjhaedje
Ca dj' el vou wangnî, dijha l' vî monsieu…
Adon, do hårkea dji m' distchedje
Puski del poirter, il esteut-st awoureus.
Mondju ! come il aveut l' air biesse!
Vos årîz djuré l' ågne di nosse molén
Cwand endè va, l' oraye e coisse,
Avou deus saetcheyes pindowes a ses rins.
Tot m' dimandant m' no, et fjhant des clignetes,
Disk' e fond del rowe, fir come on påkea,
Contant k' il åreut deus båjhes a picetes,
Li pôve viye bounete mi poirta m' hårkea (deus côps).
Cwand on fourît-st adlé l' fontinne,
Dji lyi djha : Monsieu, n' alez nén pus lon
Awè, dit-st i, nolu n' nos djinne:
Rabressîz m' bén vite, mi nozé poyon !
Vos vs marixhoz, Monsieu, dj' rabresse
Li ci k' a poirté mes deus saeyeas plins.
Mins, cist ovraedje la, dj' el kifesse,
Dj' el fwait todi fé di m' galant Mårtén
Cwand tome li vesprêye, i vént-st e catchete
Ratinde ki dji passe avou mes saeyeas
Et c' est l' bea Mårtén, k' dj' abresse a picete
C' est lu, tos les djoûs, ki poite mi hårkea ! »
Li hårkea
Li hårkea