Li crikion et l’ frumijhe
On crikion k’ aveut tchanté tot l’ esté
Si trova foirt dihessî
Cwand l’ bijhe el vina hagnî.
I n’ aveut nén ene miete
D’ on ptit waerbåd ni d’ moxhete.
Il ala braire li famene
Amon l’ frumijhe si vijhene,
Tot lyi djhant di lyi pruster
Kéke restant po vicoter
Tot ratindant l’ ôte anêye.
— Dji vs payrè, savoz, mamêye ;
Divant l’ awousse, so m’ parole,
Vos råroz tot, ou l’ diåle m’ evole !
Les frumijhes ni prustèt rén
Ç’ n’ est nén leu petchî, vormint.
— Vos vnoz, dit-st ele, po m’ acreure ;
Ki fjhîz vs divins les tcholeurs ?
— Nute et djoû, dji fjheu do brut
Ki c’ esteut on vraiy disdut.
— Vos tchantîz, dj’ è so binåhe ;
Asteure, dansez a voste åjhe.