Li creyåcion do monde (corwaitaedje)

Èn årtike di Wikisource.
Aller à la navigation Aller à la recherche
Corwaitaedje di « Li creyåcion do monde » (pîce di teyåte da André Mottet)
Li Rantoele,  94, 2020
Corwaitaedje di « Li creyåcion do monde »

C’ est ene pîce sicrîte pa André Mottet. Elle a stî creyeye a Tîne-el-Hesbaye pal dramatike di ç’ viyaedje la (li « Rideau thisnois ») li 18 di nôvimbe 2018; li djouwaedje a stî filmé ey eredjistré so stroete plake videyo.

Tins do recloymint, li dimegne, dj’ aléve å teyåte e walon. Dj’ a don cmincî pa cisse sitroete plake la, ki dj’ aveu dins mes ridants dispu sacwants moes (mins, dins l’ traeyin del veye, on n’ a måy li tins di s’ rischaper et s’ dimorer deus grossès eures divant si éndjole, sins candjî d’ waitroûlêye).

Des emissions radio al pîce di teyåte

Les tuzaedjes do scrijheus so les prumîs tecses del Bibe ni datèt nén di l’ anêye passếye. Il aveut dedja spårdou ses idêyes (po rire, mins eto po fé tuzer) dins s’ live « Nosse lingaedje », ki nos avéns prezinté dins l’ Rantoele l° 84 di l’ ivier 2017-2018. Mins po passer d’ on scrijhaedje a on metaedje el sinne, gn aveut des mantches a mete.

Les sudjets a-z essinner

Come li tite el dit bén, c’ est les shijh djoûs del creyåcion, tot londjinant sol shijhe do shijhinme djoû, la kel Bon Diu askepia Adan ey Eve.

Adon-pwis, tote li sinne avou l’ peme disfindowe, pu l’ moude da Abel, et l’ mopliyaedje des djins mågré tot, Cayin fijhant toplin des efants a ses sours.

Li troejhinme pårteye, c’ est l’ aprestaedje di batea Noyé, pol Diloujhe, avou kékes minutes so l’ après-Diloujhe.

L’ essinnaedje

Li mwaisse del djowe, Fernand Petitjean et l’ loumiraedjisse Bryan Smeckens ont dvou souwer ene tchimijhe, ca gn a des candjmints cåzu a tchaeke sinne. I n’ a nén fwait åjhey nerén pol filmeu shuve djusse li bon persounaedje avou l’ boune loumire, mins ça a stî fwait å pair des ponces.

Gn a todi deus plans d’ djouwaedje. Po on prumî, on voet des persounaedjes et tolus di ç’ trevén la : li Bon Diu, li Sint Spér (Sint Esprit), li Diåle, Adan, Eve, Cayin, Abel, Noyé (avou s’ feme, onk di ses fis ey ene di ses feyes).

Cwand l’ Bon Diu (k’ est moussî avou ene grande blanke frake ås lamkenes) cåze, tote li sinne est plonkêye divins ene bleuwe loumire; cwand c’ est l’ diåle, c’ est ene rodje.

Pu, gn a des persounaedjes do tins d’ asteure: Lucyin et Armande, ki vnèt dire li leur so çou k’ est raconté. Ey Einstein eyet Brigitte Bardot, ki vnèt fé scole.

Li Bon Diu n’ vént djamåy a dvize avou les ôtes persounaedjes, såf li Sint-Spér – k’ i creye tot å cmince po-z awè « on ptit fré » – eyet, dins l’ prumire sinne, Einstein.

N a co on troejhinme livea, c’ est Zande, k’ a on buro a hintche del sinne, et ki rprezinte li scrijheu-oteur. Lu, i djåze avou les deus liveas d’ persounaedjes. Li Sint-Spér lyi recasse padecô des målåjheyès kesses, tot djhant : « Alez dmander a l’ ome di Tîne ».

N a minme deus sôres d’ intermedes (mins dins l’ sudjet del pîce) djouwés pa troes efants. On sint ki ci n’ est nén do djouwaedje po repoirter li Cope do Rwè, mins po mete sol cimådje mo des djins del kiminålté do viyaedje. Rén k’ po çoula, proficiate, Monsieu Mottet et tos les moenneus·es del trope.

Sol Daegntoele

On pout raguider on racourti do prumî ake sol tévé waloncåzante.