Li cwatrinme planete, c’ esteut l’ cene do biznizmane. Il aveut télmint del bezogne, èm-n ome, k’ i n’ a nin ddja levé s’ tiesse cwand li Ptit Prince ariva.
- Bondjoû, derit i ci-cial. Vosse cigarete est distindowe.
- Troes et deus, cénk. Cénk et set, doze. Doze et troes, cwénze. Bondjoû. Cwénze et set, vint-deus. Vint-deus et shijh, vint-y-ût. Nin l’ tins d’ el raloumer.
Vint shijh et cénk, trinte-ey-onk. Ouf ! Ça fwait cénk cint ey on miyon shijh cints vint-deus meye set cint trinte-ey-onk.
- Cénk cint miyons di cwè ?
- Di cwè ? Vos estoz la ? Cink cint ey on miyon di… dji n’ sai pus… Dj’ a télmint d’ l’ ovraedje ! Dji so serieus, la, mi. Dji n’ piede nén m’ tins po des tchitchêyes ! Deus et cénk, set…
- Cénk cint ey on miyons di cwè ? repeta-t i li Ptit Prince ki, di tote si veye, n’ aveut måy rovyî ene kesse, on côp k’ i l’ aveut dmandé.
Li biznizmane rileva s’ tiesse :
- Dispoy céncwante cwatre ans ki dji dmeure so cisse planete ci, dji n’ a stî disrindjî ki troes feyes. Li prumire feye, c’ esteut vola vint-deus ans, d’ ene baloujhe toumêye li Bon Diu sait did wice. Ele fijheut on traeyin d’ tos les djåles et dji m’ a brouyî cwate côps dins mes acdicions. Li deujhinme feye, c’ esteut vola onze ans, po ene crijhe di roumatisses. Dji n’ bodje nén assez. Dji n’ a nén l’ tins do baloujhner. Dji so serieus, mi. Li troejhinme feye… vo l’ ci ! Bon, dj’ end esteu a cink cint ey on miyons…
- Miyons di cwè ?
Li biznizmane compurda k’ i n’ sereut nén leyî e påye.
- Miyons des ptits cayets, la, les ptitès sacwès k’ on voet sol cir, des côps k’ i gn a.
- Des moxhes ?
- Neni, les ptits cayets ki rglatixhèt.
- Des moxhes al låme ?
- Neni, les ptitès dorêyès sacwès ki fjhèt sondjiner les nawes. Mins dji so serieus, mi ! Dji n’ a nén l’ tins do sondjiner.
- A ! des stoeles !
- Oyi, c’ est çoula : des stoeles.
- Et cwè fjhoz avou cink cints miyons di stoeles ?
- Cink cint ey on miyon shijh cints vint-deus meye set cint trinte-ey-onk. Dji so serieus, mi, eyet spepieus.
- Et cwè fjhoz avou les stoeles ?
- Çou ki dj’ è fwai ?
- Oyi.
- Rén. Dj’ els a da minne.
- Vos avoz les stoeles da vosse ?
- Oyi.
- Mins dj’ a ddja veyou on rwè ki…
- Les rwès n’ ont rén da zels. I « ringnèt » dsu. Ça n’ est nén l’ minme afwaire.
- A cwè çoula vos sieve-t i d’ aveur les stoeles da vosse ?
- Ça m’ sieve a-z esse ritche.
- Et kéne avance d’ esse ritche ?
- Dji sai atchter des ôtès stoeles, s’ i gn è ene sakî k’ è trouve.
«Vo ndè la onk, derit i li Ptit Prince dins ouve, ki tuze on pô come mi sôlêye.»
Mågré tot, i dmanda co des ôtès afwaires.
- Kimint pout on awè des stoeles da sinne ?
- Da kî çk’ ele sont ? riclapa-t i li biznizmane, tot grigneus.
- Dji n’ è sai rén. Da nolu.
- Dabôrd, c’ est da minne, ca dj’ î a pinsé l’ prumî.
- C’ est tot çou k’ i fåt ?
- Oyi, ça. Cwand vos trovez on diyamant ki n’ est da nolu, c’ est da vosse. Cand vos trovez èn iyea ki n’ est da nolu, c’ est da vosse eto. Cwand vos estoz l’ prumî a-z aveur ene idêye, vos fjhoz mete on droet dsu : c’ est da vosse. Et mi, dj’ a les stoeles da minne, puski nouk divant mi n’ a sondjî a ls awè da lu.
- Ça c’ est l’ vraiy, derit i li Ptit Prince. Et ki fjhoz, avou vos stoeles ?
- Dji les manaedje. Dji les conte et les rconter. Dj’ a målåjhey. Mins dji so-st èn ome serieus.
Li Ptit Prince n’ è saveut nén co assez.
- Mi, si dj’ a on noret da mi, dj’ el pou bén bouter åtoû di m’ cô et l’ epoirter. Si dj’ a ene fleur da mi, dj’ el pou bén code et l’ epoirter. Mins vos n’ sårîz code des stoeles !
- Mins dj’ elzès pou mete al banke.
- Cwè çki ça vout dire, di ça ?
- Ça vout dire ki dji scrî so on ptit boket d’ papî li nombe di mes stoeles. Adon, dji here ci papî la dins on ridant seré al clé.
- Et c’ est tot ?
- C’ est assez !
«La, tén ! ene sacwè d’ comike, pinsa-t i li Ptit Prince. On direut del powezeye. Mins ça n’ est nén foirt serieus.»
Tant k’ ås serieusès afwaires, li Ptit Prince aveut pår des ôtès idêyes ki les grandès djins.
- Mi, derit i, dj’ a ene fleur da mi, et dj’ el raiwe tos les djoûs. Dj’ a troes volcans da mi, et dji les chove totes les samwinnes. Ca dji chove li ci k’ est moirt avou. Sait on måy. Ça ayesse bin mes volcans, eyet ça ayesse bin m’ fleur, ki dj’ els a da minne. Mins vos, vos n’ siervoz a rén po vos stoeles.
Li biznizmane drova s’ boke, mins i n’ trova rén a responde, et li ptit prince endala.
«Les grandès djins, ça est vraiymint foû ewaerant», si djheut i dins lu-minme, tins di s’ voyaedje.
Hårdêye difoûtrinne