Li Cotchessî

Èn årtike di Wikisource.
Aller à la navigation Aller à la recherche
Emojione 270F.svg Ciste ouve ci egzistêye eto divins ds ôtès ortografeyes : Mwaisse ouveFeller-Francard-MahinRifondou walon.
Li Cotchessî
rortografiaedje da Lucien Maréchal
diviè 1870
Li Cotchessî
I.

Pière, li pus bia djone ome di nosse comune
Au cwin d’on bwès
Li coûr chagrin, maudichant st-infortune,
Ainsi tchantait :
Comint s’ fait-i, mi qui n’est nin voladje,
Comint s’ fait-i ?
Qui dj’ so todi des coméres do viladje,
Li cotchessî ?
Qui dj’ so todi des coméres do viladje,
Li cotchessî ?

II.

A totes les bèles qui volenut bin m’ètinde
Dji droûve mi coûr,
Dji fai ç’ qui dj’ pou po leû fé bin comprinde
Qui dj’ brûle d’ amour,
Dj’ a beau vanter leûs mwins èt leû cwarsadje,
Maugré ç’ qui dj’ di,
Dji so todi des coméres do viladje,
Li cotchessî.
Dji so todi des coméres do viladje,
Li cotchessî .

III.

Les cias, vêci, qui conichenut Marîye,
Diront come mi :
Gn-a pont d’ si bèle, i gn-a pont d’ si djolîye
Dins tot l’ payis;
D’lé lèye vraimint dji m’ pinseûve bin-astoc,
Bin-aspouyî,
Por on vaurin ki n’ vaut nin one mastoke,
Ele m’ a tchessî…
Por on vaurin ki n’ vaut nin one mastoke,
Ele m’ a tchessî…

IV.

Maugré çola, dji r'pidreûve do coradje,
Si l’ vî yerdî
Volait m’ doner si fèye Djène è mariadje
Po m’ayèssî.
Vola deûs-ans po l’ mwins′ ki djèl cowète.
Ça m’ fait sètchi.
Maugré mi-amour, dji so co pa Janète
Bin cotchessî.
Maugré mi-amour, dji so co pa Janète
Bin cotchessî.

V.

Tot ouce ki dj’ va, djèl vwè bin, on m’ cotchesse,
Dji n’î tin pus;
V’la m’ pistolet, dji m’ va fé sautlér l’ tiesse,
Dji vou moru.
Dji m’ va nn’aler one sawouce è l’ infêr
Ou paradis,
Vôy si dj’ sèrè come dj’ a stî dissus l’ têre
Li cotchessî.
Vôy si dj’ sèrè come dj’ a stî dissus l’ târe
Li cotchessî.

VI.

Quand dj’ sèrè mwârt, faut qu’on m’ètère a l’ombe
D’on maronî,
Et qui tot l’ monde pouche vinu lire su m’ tombe
Ci qui dj’a scrît :
Vêci d'zos l’ pîre, c’est Pîre k’ estait co pîre
Qu’on tchin d’ bierdjî.
Car dès bauchèles il esteûve li martîr
Et l’ cotchssî !
Car des bauchèles il esteuve li martîr
Et l’ cotchessî !

Note Wikissourd
Rortografiaedje di l' Antolodjeye des powetes walons namurwès, p. 51-52.