Lete sint På ås Galates/V

Èn årtike di Wikisource.
Aller à la navigation Aller à la recherche
V
ratournaedje da Lucyin Mahin

Aidîz vs n’ onk l’ ôte et ni vs djudjîz nén n’ onk l’ ôte

1. Frés et sours, metans ki vos veyoz k’ ene sakî del kiminålté a fwait ene måle keure. Adon, vos vos dvoz leyî moenner på Sint Spér po rmete ci sakî la sol droete voye. Fijhoz çoula amiståvmint. Ni lyi fjhoz nén sinti ki vos estoz meyeu k’ lu u leye. Tuzez ki vos-minme, on djoû u l’ ôte, vos ploz kécfeye vini a n’ nén schoûter l’ Bon Diu, ey esse e l’ plaece do ci ki vs estoz ki rmostere.

2. Sifwaitmint, cwand c’ est k’ i gn arive on mehin a onk u ene di vozôtes, dinez lyi on côp di spale. Ci n’ est ki d’ djusse ! C’ est tot bounmint çou k’ vout li lwè d’ Djezus-Cri.

3. Si vos trovez ki vs estoz meyeu k’ èn ôte, adon, riloukîz vos po on sot.

4. Ni djudjîz fok vosse prôpe ovraedje. Waitîz djusse si vos avoz fwait po on mî, u neni. Et si vos avoz fwait po on mî, vos ploz esse binåjhe di vos-minme. Mins ni l’ alez nén criyî e toetea divant tolmonde.

5. Tchaeconk est responsåve, pa lu-minme et po lu-minme, di s’ prôpe ovraedje.

6. Pårtixhoz çou k’ vos avoz avou les cis ki vos ont acsegnî li parole do Bon Diu.

7. Ni vos marixhoz nén : el Bon Diu n’ est nén on sot. Çou k’ vos åroz semé, I vos l’ rindrè mopliyî a l’ awousse.

8. Ça fwait : si vos semez des mwaijhès grinnes, tot fjhant seulmint çou k’ vos avoz idêye, adon, vos n’ ramexhnêyroz ki del mizere et des rascråwes. Mins, si vos semez del boune grinne, tot vicant come li Sint Spér el vout, vos awoustêyroz li veye ki deure disca todi.

9. Ni nos djocans måy di fé l’ bén. Ca, al fén des féns, nos è rascodrans li benediccion då Bon Diu. Mins c’ est d’ porshure insi tot åd dilong do tchmin !

10. C’ est po çoula ki, tchaeke côp ki dji nd avans l’ ocåzion, dji dvans esse bon et midone avou tertos, mins foiravant avou les cis ki shuvnut li lwè do Bon Diu.

Cloyaedje

11. Lijhoz bén les mots ki shuvnut. Dji vos les scrî mi-minme, e-n esprès avou des grossès letes.[1]

12. Totes ces djins la ki vôrént ki vos acceptêyrîz di vos fé discaloter, c’ est djusse po s’ fé bén vey des Djwifs, et n’ nén esse trakés plamour k’ i creyèt a Djezus crucifyî.

13. Minme ces djins la, ki vlèt fé avou les deus pårteyes, tot s’ åyant fwait côper li ptite pea, zels-minmes ni shuvnut nén li lwè Moyisse. Mins i vôrént bén ki vos frîz come zels po fé bebele ås Djwifs, si s’ poleur vanter dvant ces-la come cwè i vs ont fwait candjî d’ idêye.

14. Mins mi, dji n’ a fiyate ki dins l’ croes da Nosse Signeur Djezus Cri, ki c’ est par leye ki l’ monde a stî crucifyî por mi, et k’ mi, dj’ a stî rcrucifyî po tertos.

15. Paski, Djezus-Cri, i nd a d’ keure ki vos soeyoxhe discalotés u nén. Çou k’ Il a-st e cour, c’ est ki l’ Bon Diu a fwait d’ tchaeke di vozôtes ene novele djin.

16. Dji sohaite li påye et l’ foice a totes les djins ki s’ tegnnut a çoula, et a tot l’ peupe då Bon Diu.

17. Adon, ki nolu ni m’ vegne co assåder avou des kesses et des messes po vey si dj’ a bén stî evoyî på Bon Diu. Paski vos n’ avoz k’ a rwaitî totes les plåyes et les kernaxhes k’ i gn a so m’ coir : vos vieroz bén ki dji so on sclåve då Signeur Djezus.

18. Dji preye po k’ nosse Signeur Djezus-Cri soeye bon po vozôtes dins totafwait, et k’ il amousse avou tote si foice dins vost esprit, mes binamés frés et binamêyès sours.

  1. Dandjreus ki c’ esteut on scrijheu publik k’ aveut scrît li restant do tecse. Est çki sint På el fwait esprès po bouxhpi sol clå ? Des corwaiteus k’ i gn a ont volou ki l’ apoisse ni veyeut pus bén clair.