Li liberté ki ns avans tot shuvant l’ Criss
1. Adon, vikez dins l’ liberté ki l’ Criss nos a dné. Ni vos leyîz nén ridivni des sclåves des lwès et des rîles.
2. Dji vos di platkizak : si vos vos fjhoz circonci paski vos vos vloz tni al lwè Moyisse, adon, li Criss ni vos pôrè hourer.
3. Dj’ el ridi co ene feye, aiwdirotchmint : li ci ki s’ fwait discaloter, i doet eto shuve totes les ôtès rîles del lwè Moyisse.
4. Vos avoz l’ epinse ki vs ploz esse pardonés d’ vos petchîs tot vos atnant al lwè Moyisse. Mins adon, vos n’ avoz nén mezåjhe do Criss. Ca, Lu, i n’ vos pardone nén paski vos l’ meritez pa vos bounès keures, mins paski vos avoz fiyate e Lu.
5. Mins, did på Sint Spér, dj’ estans seurs et certins ki dj’ alans esse pardonés d’ nos petchîs, paski dj’ creyans.
6. Ca, si vos schoûtez l’ Criss, ça n’ a pupont d’ impôrtance si vos estoz ctaeyî inte deus creyances, come ashîts inte deus tcheyires. Gn a ki l’ creyance k’ a d’ l’ impôrtance, li creyance k’ est veyåve pa vos faitindjes ki seront plinnes d’ atimprance po åtru.
7. Vos avîz si bén ataké a shuve li boune novele ! Kî çki vos a vnou mete des xhames e l’ voye, tantea ki vos n’ shuvez pus l’ vraiy messaedje ?
8. Ciste idêye la ni vna nén did Lu, ki vos aveut houkî a Lu !
9. Tuzez ene miete a çoula. Ene poureye peme fwait gåter tote li tchentêye. Si ene seule djin est måle, ele pout moenner totes les ôtès djins sol mwaijhe voye.
10. Dji so seur ki vos seroz d’ acoird avou mi so çoula. Mins les cis k’ ont-st asprové di vos fé tourner cazake, et vos moenner dins li stramlaedje, i seront pûnis, savoz, et bén pûnis ! Tolminme kî k’ ça fouxhe !
11. Frés et sours, si dj’ apudreu co ås djins k’ i s’ doeynut fé côper li ptite pea, pocwè, dabôrd, sereu dj’ porshuvou et rtraké ? Mins ci n’ est gote li cas, paski li messaedje del croes, ci n’ est nén ene sacwè ki doet fé araedjî les djins, et lzî dner des rujhes por zels viker l’ cour etait.
12. Les djins ki vos moennîz insi dins ene sifwaite ewaeråcion, et vos brouyî vos idêyes, c’ est come s’ i vos årént dmandé di prinde on coutea et di vs côper vos-minmes a deus.
13. Frés et sours, vos avoz stî houkîs dilé l’ Bon Diu po-z esse libes. Mins vos estoz trop schitåds po profiter di ç’ liberté la, et vos n’ vloz fé k’ a voste tiesse. Oyi mins nonna ! C’ est l’ contråve di ça k’ on vos dmande : c’ est d’ vos vir voltî n’ onk l’ ôte.
14. Ca tote li lwè Moyisse pout esse rascourteye e deus mots : « Veyoz vos soçons voltî, ossu voltî ki vos vs inmez vos-minmes. »
15. Mins si vos vos rwaitîz ddja inte di vozôtes come des tchéns d’ barakî, fåt nén dmander ki vos vos etraidîxhe cwand gn årè des arokes.
16. Dji vou dire çouci : « Leyîz vos codure på Sint Spér, et nén come des pinsamis u des bon-por-lu.
17. Paski çou k’ vos vloz egoyismint, c’ est djusse li contråve di çou k’ li Sint Spér vout d’ vozôtes. Et çou k’ li Sint Spér vout d’ vozôtes, c’ est djusse li contråve di çou k’ vost egoyisse vôreut bén. Dabôrd, vos n’ divoz nén djusse fé çou k’ vos avoz dins l’ idêye, tot n’ pinsant k’ a vos-minmes.
18. Mins si vos vos leyîz moenner do Sint Spér, adon, vos n’ avoz pus k’ fé del lwè Moyisse.
19. Çou k’ ele djereye après, noste egoyisté, c’ est åjhey a comprinde : si må cdure dins les rapoirts do seke, dj’ ô bén : viker divins les sekelreyes.
20. C’ est, avou : adorer des fås diès, fé des emacralaedjes, vey evi ses soçons, esse djalot sor zels, èn pinser k’ a lu, esse todi grigneus et mwais so les ôtes…
21. C’ est co todi : touwer, esse todi fén sô, esse todi e ribote, et vos nd årez et vos nd åroz. Dji vos haireye, come dji l’ a ddja fwait si sovint did pus timpe, po k’ vos vos houwîxhe di totès ces målès keures la. Ca les cis ki vicnut insi dins l’ disbåtche, n’ årè nole plaece por zels e Rweyåme do Bon Diu.
22. Mins schoûtez çou k’ a stî edvinté do Bon Diu : c’ est li vir-voltî, li djoyeusté, li påye inte des omes, l’ atimprance, l’ amiståvisté, li bonté, li fwè, l’ aidance azès pus flåwes, li solåciaedje des cis ki sont sins l’ penin, li mwaistrijhe di lu-minme.
23. Tot çoula, vos l’ trovoz ossu bén dins nosse bone novele ki dins li lwè Moyisse.
24. Les djins ki volnut viker a môde da Djezus-Cri ont språtchî podbon leu-z egoyisté, et tot çou ki va-st avou.
25. Dabôrd, leyîz vos moenner på Sint Spér. A ç’ moumint la, avou l’ åjhmince do Sint Spér, vos dmorroz todi-måy sol droete voye.
26. Vos n’ divoz djamåy potchî foû d’ vos clicotes, et s’ amwaijhi po des réns, ni vos acweri n’ onk l’ ôte, ni nerén esse djalots onk di l’ ôte.