Po tos les cis ki n’ ont rén fwait d’ bon foû d’ leu veye ;
Po tos les målureus k’ n’ ont måy avou d’ coulêye
Po s’ rischaper påjhûle et rovyî leu måleur ;
Et po tos les pôves coirs ki n’ savèt pus cwè dire
Dismetant k’ n’ ont pus l’ foice di lever leus påpires,…
…I n’ årè måy di ptit bouneur.
Les djins k’ on bombårdêye, po les cis k’ on mitraye,
Les ôtes k’ on plake å meur come des grandès canayes
Sins lzî dner ene seule tchance di sayî di s’ fé croere ;
Po tos les cis k’ poirtèt sins s’ poleur arester,
Li paw å vinte, li pwès di leus idintités,…
…I n’ årè måy di ptit bouneur.
Po tos les sins-abris et les sins-domicile
Ki n’ ont minme pus – c’ est pé – li ricfoirt d’ ene famile
Et po s’ vini confyî, ki s’ bouxhèt l’ tiesse å meur ;
Po totes les åmes findowes et les cours disfoncîs
Paski nolu djamåy, n’ a sayî d’ les inmer,…
…I n’ årè måy di ptit bouneur.
Epwis po tos nozôtes ki doet porshuve si voye
Sins måy nos ristourner ki so nos prôpès cnoyes ;
Ossu k’ po fé ene sacwè, i fåt poleur oizeur ;
Ns avans-st avou nosse pårt, fåt i co rataker ?
Mi, dji croe bin k’ awè, po k’ nos polanxhe tchanter…
…K’ i n’ årè måy des ptits bouneurs.
Les ptits bouneurs
Ciste ouve ci egzistêye eto divins ds ôtès ortografeyes : Feller.Les ptits bouneurs
Li Rantoele,
Les ptits bouneurs