C'est paç' qui po nos-ôtes èl'-ont tant rindu pwinne,
Qui dj' les wè si voltîye, les mwins d'nosse grand'moman,
Si vîyes qu'èles ni féyenut leûs mouvemints qu'en tronnant,
Si mwinres, qui pa dzos l'pia, on vwèt des grossès winnes.
I gn-a dèdja lontimps qu'èles ni filenut pus l'linne,
Ni l'twale po fé des lagnes a tos ses p'tits èfants,
Et tènawète ossi - èle li conte en brèyant -
Po z-èsévl'i des mwârts, anias brijîs dèl tchinne…
Et asteûre qui grand'mére ni sait pus travayî,
Ses dwèts ridenut doucemint l'long d'in tchaplet d'pauquî,
Po soladjî ses djins qui ont fait l'grand voyadje.
Qui dj' vôréve bin vos rinde, ô pôvès vîyès mwins,
Totes vos térès caresses qui dj' sin co su m'visadje !
Di raquiter mes dètes, qui l'Bon Diè m'done li timps !
Li tite est e grandès letes, mins l' årtike « les » est scrît sins accint ådvins do tecse.