Ötchamp è toudi sté in viadje fwârt rètroclé. C’esst a cauze du ça, alèz, dandjreûs, k’il è cotinuwé a pratiker les vîs aladjes dud dinltins. Mètans, adjinsner l’ouvradje des djins dou viadje, a sûjant l’ sistème des dîjin.nîs.
In dîjin.nî, c’ére in rassan.na du dîj maujons, k’alint fwêre toutes leûs ouvradjes assan.ne.
Asteûre, la coumint sk’on fjot pou paurti les dîjin.nîs. Pou cmacî, lu mayeûr tirot in mènadje al buche. Mètans: Djan Matî.
Djan Matî duvnot lu numèrô yink dou prumî dîjin.nî. Çu côp la, a toûrnant coume lu solê, on purnot nûf z ôtès maujons. Ça fwêt k’ vous avîz insi lu prumî dîjin.nî. La maujon d’après, on cmaçot l’ deûjime, èt insi d’ swite. Cand ç’astot pou paurti les virêyes, û les saurtadjes du deûjime anêye, pou les dgnêsses [parts de genets], la coumune fujot ostant d’ paurt ku d’ dîjin.nîs. Duvins l’ dîjin.nî lou-minme, les djins s’arandjint atur zès.
Lu dîjin.nî, c’ére coume ène grande famile. Lu djoû k’i gn avot yink ki touwot l’ couchè, i pwartot in boudin dins tchèkine des maujons. C’astot aler rtriper les vèjins, k’on djot. S’i gn avot èn afant ki vnot au monde, toutes les fames dou dîjin.nî astint al batizâré (ene pitite fiêsse duvant l’ batème).
A l’iviêr, on fjot deûs troclêyes du djins, èt al nute, les fames arivint avu leû molin a fiyî. Ttautoû doul lantiêne a l’ôle du golzau, k’astot pinduwe après l’ crama, dju v’ pu bin dire ku les molins a fiyî alint… èt les lingues ossi, dayeûr.
Dins su dvantrin, tchèkine du zèles avot apwarté in gros bouket d’ pwin d’ swâye. C’astot bon, vouzôtes ! Al fin doul chîje, la fame ku ç’astot a leû maujon k’on chîjnot fujot a cafè. Èt nin doul lapète, da. On n’ wèyot nin Glêreûse ou fond.
C’astot ça, la, k’on djot « rbancter ». On rbanctot, û on rcinot, cwè. C’astot mougnî in bouket al fin doul chîje, avè dîj eûres, dîj eûres èt dmiy. S’i gn avot yène k’astot fwârt taurdiye, èt k’arivot avu s’ bwêchèle k’onz astot cauzu pou rbancter, on djot: « wête in pô, la les racaweûses du chîje !»
Lu dîmatche, inte les deûs sounadjes a messe, les fames su ratroclint amon yène û l’ôte. Falot les vey tourtoutes avu leûs bârètes (in grand blanc bounet), leûs pèlisse (ene djakète du coton a fleûrs) ki ravôtiot ène jupe a rôyes blantches èt roudjes èt in dvantrin d’ nwâr satin. Ille avint co mètu leû croû d’ôr èt l’ keûr ki pindot a in ruban d’ nwâr vuloûrs. Ille avint vourmint grande êr.
Ile pwartint bin prècieûzmint leû tchaplet èt leû lîve du messe avu in gros cloyoû d’acî. A ruvnant d’ messe, ile sayint l’ nouvê pwin, fwêt avu dou nouvê grin. Pasku, dvant messe, i falot naler al comugnon, èt pou ça, i falot djun.ner duspus lu djoûr du dvant al nute.
Pou les ouvradjes coumunaules, onz ahoucot tous les dîjin.nîs, û ène paurtiye, toudi. C’astot mètans pou rabiner (abate les crawieûs aubes dins les virêyes, èt les cés ki vont zesse sutoûfés), rulver les bîs (rnètyî les yêbes dins les bîs d’ rêwadje après l’iviêr), tirer al nîve, èt vz a-n auroz.
S’i gn ére ène vëve û ène djint d’ malaude, c’est les ôtes ki fjint la bzougne a s’ place.
sicrît d' après des esplikêyes da Annie Lambert, d’Otchamp, ki l' tunot d’in vî mwêsse du scole d’Ötchamp, poul Soce d’istwâre èt des viys aladjes du ban des Lîbins (ancyin ban du Viance), ratoûrné a rdawé walond dou payis d’ersè.