Les avoyoûs
Ciste ouve ci egzistêye eto divins ds ôtès ortografeyes : Rifondou walon.
Dumandeû (Dm.) - K'est ç' ku tu djos ? Mon.nonke Émile, cand i duvnot vî ?
Albert Mahin (A.M.) - Cand i duvnot vî : k’ i m’ dijot ? « Èle nu côpe nén, la soyète. Tu la rawîjrès in pôⁿ, la, dis ! » « Ây, dis-dj’ ! » Èt pî ç’ côⁿp la, il alot ou bwès. Èt pî, i rarivot l' londmwin. « Siè, èle va bin, la, mês : fous-î co in côp (d’ lime), èlle îrè co mî » dit-st i.
Dm. - Avu cwè k’ on la rawîjot, nosse pére ?[1]
A.M. - Avu ène lime, hin !
Dm. - Avu ène lime.
A.M. - Awè ! I falot rawîjer les dints comifaut. Èt alôⁿr çu côⁿp la, ç’astot nin la soyète ki n’ alot pus. Ç’astot l’ brès, valet !
Dm. - Èt gn avot nin des machines pou rawîjer les soyètes ?
A.M. - A non ! Des machines, non !
Dm. - Èn avoyoû ?
A.M. - Awây ! Ç’astot po mète la vôⁿye, ça.
Dm. - Comint k’ ç’astot, èn avoyoû ?
A.M. - Bin come ène pince, la, avu in vis′ pou rêgler pou n’ nin zesse dupus fwârt d’in costé ku d’ l’ôⁿte, cwè. Tu sèros ; gn avot in ptit vis′ k’ alot a stok, èt ça n’alot nin pus lon. Ç’astot tous les min.mes dints.
Dm. - L’avoyoû… ç’astot nin si souvint k’ i falot la rpasser a l’avoyoû ?
A.M. - Abin non ! Èt pî ça dèpand in pôⁿ du bwès k’on soyot, hin ? Si t’ soyos du vèrt bwès, falot k’ l’avoyoû sôⁿye in pô pus laudje. Ôⁿtrumint, cand ç’asteut du bin sètch, i s’ soyot tout seû. I n’ falot cauzu pont (d' vôⁿye), pou cmincer.
Dm. - Awây, c’est ça.
A.M. - …pasku, pus′ ku l’ vôⁿye est laudje, pus′ k’i faut hatcher.
Dm. - Ç’astot èn avoyoû pou les soyètes, èt pî… les grandes rucèpes, mètans ?
A.M. - Abin ây, mês ç’astot èn ôⁿte, (in) spécial, alôⁿr.
Dm. - Ç’astot ène ôte sôⁿrte d’avoyoû ?
A.M. - Ây, avu ène pus laudje machwâre pou mète la rcèpe dudins — (nin come) la soyète, hin… — pou passer la lame.
Dm. - Tchèke soyète su-n avoyoû ?
A.M. - Nin tchèke soyète, mês ç’astot la lame. Cand ç’ astot ène rucèpe, par ègzampe, hin, falot in grand avoyoû ; lu circulêre, falot in pus grand avoyoû ; ça dèpand la lame, hin.
Li tecse a stî eredjistré so ene cassete e moes d' octôbe 1994, pu réndjolijhî sol fén des anêyes 2010; pu riwmaistrijhî a l' assulon e moes d' djulete 2021;
Nén eplaidî so papî.
Les passaedjes inte åtchetes sont metous po rimpli des elipes dins l' cåzaedje (li respondeu cåze todi ene miete rade).
Pî-note
- ↑ Li dmandeu cåze avou s' prôpe pere.