E l’ anêye 1096, li pâpe Orban II [Urbain] apèle tos les Crustins a nn aler libèrer Djèruzalem. Amon nos-ôtes, èl Waloniye, c’ est Godfrwè, duc di Bouyon et qu’ a vnu å monde, dist-on, a Båjî addé Nivèle, qui dècidêye di nn aler èto, et qui vind si dutchî a l’ èvèke di Lîdje po-z-avu des liârds. Li convôye, fêt di Walons, di Francès do Nôrd et di Lôrins, ènnè va li 15 d’ awous 1096.
One miète divant, li prêtcheû Pîre l’ èrmite houke les pôves et les ptitès djins po pårti èto dèlîbèrer li tombe do Criss. Zels, må ôrganizés, ni pârvinront måy a Djèruzalem.
Al difin do mwès d’ awous, les pèlèrins ritrovèt l’ Rin k’ i sûvèt djusk’ a Worms. La, apurdant ki li crwèzåde des pôves s’ a fêt cohatchî è-z arivant èl Hongriye, i si rvindjèt so les Djwifs del vèye di Worms, k’ il acuzint di tos les mås del têre. I continuwèt adon djusk’ a Ratisbone.
Li convôye state on ptit tins a Tulln, li mêsse-vèye di l’ Ôtriche di ç’ tins la.
Adon, c’ est li cmincemint d’ ene vôye ki, po les djins d’ adon, n’ èst pus è l’ Eûrope : li Hongreye. El Hongreye, li crwèzåde da Pîre l’ Ermite et des ptitès djins î aveut dja passé èto et èlle aveut fêt des ravädjes. Sintoz bén qui Godfrwè et les ôtes n’ estint nén les bénvnus. Po-z èspêtchî qu’ i n’ åye co des batayes et des mwärts, Godfrwè s’ a arindjî avou li rwè di Hongreye et nos djins ont plu trèvåtchî l’ payis djusk’ a l’ Drâve sins pont d’ rûjhes.
Après li Drâve, on sût l’ Danûbe et on-z est cåzu tot d’ sûte a Zemoun (asteûre, c’ es-st on vinåve [quartier] di Belgrade). C’ est l’ prumîre vèye di l’ Impîre di Bizance. L’ Impèreûr si dmèfiye di tos cès djins qui, por li, ni sont qui des « barbâres » vinus did bén lon. Alexis Comène – c’ est si nom – ofère don bråmint des cårs et des pîrreyes ås crwèzés po qu’ i dmeurèxhe påjhîres et n’ pont fé d’ må ås Grècs. Godfrwè èva djusk’ a lî promète tos les tèritwêres qu’ il årè rpris åzès Muzulmans. Et nos tayons si rtrovèt divant li pus grande vèye d’ adon : Constantinope, avou pus di 700 000 habitants.
{{c|Amon les « infidèles »
Après avu passé li Bosfore (li ptit passädje d’ êwe inte l’ Urope et l’ Azeye), nos djins arivèt do côp a Nicêye. C’ est la qu’ i rèscontrèt po l’ prumî côp les Turcs et qu’ i les batèt a plate costeûre. Mins, après, Godefrwè et ls ôtes si rindèt conte di çu qu’ c’ èst, l’ Turkeye. Ût mwès qu’ i lzî fårè po-z avni a Antioche, di l’ ôte costé do payis, so l’ Mèditèranêye. A Antioche, les Crustins sont èradjîs, pace qui les Turcs ont profané l’ èglîjhe qu’ a stî li prumîre batiye pa Sint-Pîre, qu’ a stî li prumî èvèke d’ Antioche. Et, po si rvindjî, i touwèt branmint des djins, come todi. I n’ fieut nén bon ni nén èsse crustin èl Turkiye di ç’ tins la. Mwärts di fwin et foû scrans nåjhis, nos tayons årint minme mougnî les cwärs di leûs innemis...
{{c|On dmeûre ene miyète èl Turkiye
On-z est dja o prétins 1098. Bådwin, li ci ki srè rwè d’ Djèruzalem, si djoke a Edèsse et il î monte li prumî Etat crwèzé di tot l’ Oriyant. Avou les Armènyins et ls ôtes Crustins d’ avårla, on archèvèché catolike veut l’ djoû a Edèsse è 1099.
{{c|Li « vrêy » Oriyant !
O cmincmint di 1099, anfin, les crwèzés dècidèt do rprinde li vôye po Djèruzalem. Asteûre, on-z arive o Liban, èwou ç’ ki nos djins discovrèt li cane a suke et sayèt po l’ prumî côp çu k’ i lomèt « del låme di cane ». I passèt sins wêre di rûjhes pa Tripoli, Byblos et Beyrouth.
{{c|Djèruzalem
Li 14 di djulèt’ 1099, cåzi trwès ans après nn avu nn alé, les pèlèrins et les crwèzés (i n’ è dmeûre ki 15 000) purdèt li vèye di Djèruzalèm. Li londdimwin, i sont so l’ tombe do Criss.
Eplaidî e l' Rantoele di l' ivier 1996/1997, p. 4, avou kékes mots ratournés e francès.
Replaidî e rfondou 2005 so l' Aberteke