Qui c’est trisse, qui c’est moirt !
Li cir est sins clârté,
Li nîvaie coûve li térre
Tos les âbe sont d’fouyeté.
Leus branche po tote verdeûre
Poirtet on blanc mossai,
Et l’bîhe qui hoûle et pleûre
Y remplace les ouhai.
Qui c’est trisse, qui c’est moirt !
On n’tuse wère ès ç’moumint
Qui magré tot, l’hiviér
Deut fér plèce â printimps.
Elle est pas deûre qui l’pîre
L’aiwe dè plaihant rouwâ,
Qui chantéve ès s’colire
Tot rafrèhihant l’vâ.
On n’ôt pus sos les thiér
Ni ès fond dè cotehai
Li hièdrêsse di s’voix clére
Rassonler ses tropai.
Qui c’est trisse, qui c’est moirt !
On n’tuse wère ès ç’moumint
Qui mâgré tot, l’hiviér
Deut fer plèce â printimps.
Si d’vin on pus bleû cîr
Ade on solo r’luhiant,
Si des steule les loumire
Blawtet comme des diamant,
Lon d’enn’ avu de l’jôie
On tûse âs malhèreux
Et por zelle on s’annôie :
Il vont souffri dè freud.
Qui c’est trisse, qui c’est moirt !
On n’tûse wère ès ç’moumint,
Qui mâgré tot, l’hiviér
Deut fer plèce â printimps.
« Oh ! nos n’riveûrans mâie
» Li saison qu’on aime tant ! »
Tot d’on cop v’la qu’ès l’ hâie
Sipit on joyeux chant…
On louk’, int’ les coh’ neure,
Min qui déjà boutet,
C’est l’roupeie plinte d’aweur
Qui chante : les bais jou v’net.
C’n’est pus si trisse, si moirt !
Et rimpli d’contint’mint
On s’dit : bin vite l’hiviér
Va fer plèce â printimps.
Qwand par on grand malheur,
L’homm’ vint d’esse écrasé,
Il pinse divin s’doleur
N’esse jamâie consolé.
Nou plaisir ni l’ahâie
A monde il dit : Adiet !…
Mais comm’ l’ouhai d’ès l’ hâie,
Ad’vin il’ôt in’e voix…
J’l riknoh’e qui l’espoir
Es s’cour chante bin doucemint,
Et q’mâgré tot l’hiviér
A fait plèce â printimps.