XXVIII
Al tchèsse au magot
« Poqwè awè touwé li p’tite dins l’ cayute ?
« Clô t’ gueûye, èt avance, bièsse !
Silvin cotoûrneûve lès bouchons di spines, man’cî pa l’ canon do rèvolvêr. Si tièsse n’èsteût pus qu’on machadje di râje, di pwin.ne, èt d’awè ausse di moru. Dîre qu’il âreût p’lu yèsse avou zèls deûs, lauvau, soladjî po todi ! Quand l’ pènitince sèreût yute, i lès-ireût r’trover. Dins l’ nwêr, il a lèvé sès-ouys su l’ tèri. One bosse di sov’nances : lès sofrances dès djins dèl fosse, lès scrèpadjes di gwadje, lès mwêrs ratchons.
« Vosse man.nète cassète èst todi là ; dj’aveû mètu quate cayaus d’ssus, i sont co là. Dji vôreû qu’èle vos-apwatereût ostant d’ miséres qu’à mi. »
« Taîje tu, fougne, li rèsse, c’èst mi qui s’ènn’ocupe ! »
One crapôde c’èsteût pus tène. Mins on cint d’ kilos, qui vos-apougne, ça p’leût co mau toûrner. L’ome si d’mèfieût. On côp l’ magot è s’ potche, i pètereût au cint diâles èt co pus lon, sins pont lèyî d’ ronlin.nes. Oyi, mins comint n’ pont lèyî d’ ronlin.nes. I lî faleut trover on plan. Lès deûs… Ça a potchî foû di s’ tièsse… Lès deûs : onk qui min.neût l’ danse, èt l’ôte qui sûveût. Li cia qui sûveût èsteût d’dja r’tchèrdjî à bale po touwer l’ôte. Gn-aveût pus qu’à arindjî l’ rèsconte èt tchipoter avou l’ vèrité…
Silvin à tchèssî l’ locèt d’ totes sès fwaces, I s’a stî planter dins li scwace d’on’ aube. Il aveût manqué l’ tièsse. L’ôte lî a èvôyî on côp d’ savate al pwinte di s’minton. Silvin a baké. Èt s’ ritrover avou s’ tièsse pa d’zo l’ pîd dèl touweû.
« Grosse bièsse, ricomince cor on côp, èt dji t’ frè sofri qui ti n’ sarès pus op ! Ramasse li cassète, èt l’ drovu. »
Li stron.neû pormin.neût s’ lampe dins l’ fond dèl cassète. One vûsion : dès gazètes ? Dès vîs « Vers l’Avenir »
« Qu’as’ faît dès biyèts ? Èt taudje on pau d’ qwinkeler come on gorèt. Taudje, oudobin, dji t’ faî sauteler t’ tièsse. »
« I… I m’a… couyoné… C’èst mi qui v’leût qu’on-ètêre tot véci. Divant qu’on n’ monte, i… i m’a mostré on daîrin côp lès biyèts dins l’ cassète. Dji m’a r’toûrné po qu’on gripe… Dj’a passé pad’vant… I d’veûve ènn’awè one deûzyinme dins s’ cofe… Èt di ç’ timps la, il ârè yeû l’ timps d’ lès tchandjî. »
Di râje, li touweû s’a dauré sur li, lî d’ner one tane, lès côps tchèyin’ à r’laye. Li crosse dèl rèvolvêr lateûve dins lès cwasses, dins lès rins, su l’ tièsse. Lès côps pîds volin’ dins sès djambes.
« Vola, come ça ti sarès qu’ dj’ènn’a m’ soû d’ vos-arindjemints sins ku ni tièsse. »
I faleût qu’i s’aprinye à lès veûy èvî, po p’lu monter à s’minces li djoû qui lès touwereût, tos lès deûs.
« Min.ne nos djusqu’à s’ maujone. »
Silvin a r’faît l’ vôye à l’aurviêrs, prinde li pî-sinte qu’ amin.neûve dins l’ cu d’ satch padrî l’ coron. I son.neût dins s’tièsse. Dès crapes di song plaquin’ à sès tch’vias. Mins lès plâyes r’aussin’ li râje è s’ capotine. I n’ ratindeût pus qu’awè Primo dins sès pates po r’vindjî lès deûs pièles qu’il aveût pièrdu ? Yinte lès batisses dèl tchèrbonadje, il a prins dins l’intréye d’one maujone, todi avou l’gueûye dèl rèvolvêr dins sès rins. Passer su li d’drî, gangnî l’ tèrasse, solèver on pot d’ fleûr po-z-î prinde one clé, èt l’ later al têre divant l’ touweû.
« Come ça t’ârès pus aujîy po moussî d’dins. »
« Bon ! Asteûre tè l’ ramasses èt ti droves l’uch sins brût. »
« I-gn-a pèrson.ne, L’auto n’èst nin dins l’ coû di d’vant. »
« Dji m’ ragrance por twè : qui s’ ramin.ne au pus rwèd. »
Il a rawaîtî s’ monte : « Dji ratind l’ piquète do djoû, après dji t’ toûwe ! »
Il a faît moussî Silvin à côps d’ pîds dins lès rins. Silvin à mougnî do pavemint.
« Tot ratindant, ataque à fougneter, flate di vatche ! »…