XXVI
Li tchèsse dèl fwarceû
Li stron.neû n’aveût nin yeû malaujîy po r’trover l’ nom dèl prôpiètaîre dèl plaque di l’auto. C’èst come ça, quand t’as dès caurs…
Maugré ç’ qu’il aveût pièrdu au casino, i lî è d’moreût co assez po rècrauchî l’ potche d’on foncsionaîre nin trop r’waîtant. Èt ç’ nût ci, i compteût bin, — minme si po ça, i lî faleût co touwer — rawè sès deûs miyons d’eûros.
Dins l’ariére coû, il a fwârcî lès rayènes d’one fignèsse. Il a colé trwès spècheûs d’aclapant su on bokèt d’ veûlîre. Il a finemint pigneté tot-autou avou l’ crosse di s’ rèvolvêr. Li vêre s’a disclapé sins tchaîr al têre. Ci n’èsteût pus qu’on djeû d’abroker dins l’ maujone. I n’a nin stî oblidjî d’ fé dèl lumîre. I vèyeût assez, rén qu’avou lès gayètes qui morin’ à p’tit feu dins li stûve. Il a trivièrsé l’ bèle place. Prinde li prumî uch drovu. Si r’gârd a pèsé su li p’tit cwârp qui d’moreût sins boudjî dins si p’tit lét a baurias. One poupène : èle dwarmeût lès brès au laudje, sès blankès p’titès mwins ricroléyes su sès paumes. Si massale drwète rabatuwe su s’ tièstêre ? Pus on soflèt d’alin.ne ni solèveûve sès peûmons qui n’ cachin’ pus à s’ rinfler. Poqwè ?
Il a moussî dins l’ grande tchambe su l’ drwète di l’ome qui dwârmeût. Èt todi nin one faflote di brût. I s’a d’vu clincî po veûy on filé d’alin.ne solèver l’ linçou. On drole di strindadje l’aveût apicî. Poqwè ? Nin one faflote di brût !
Il a tûzé à sawè pa ou èdaumer po cachî à r’trover sès liârds. Fougneter dins tote li batisse, ça lî pudreût trop d’ timps. Il a prins l’ pus coûte dès vôyes.
Il a mètu l’ gueûye di s’ rèvolvêr su l’orâye di l’ome èt l’ cheûre di l’ôte mwin. Come i rimouweûve nin d’pus qu’onk qui n’a pont d’ niêrs, i l’a cotapé co pus fwârt. Todi rén…
Il a rauyî l’ linçou ? Avou l’ crosse dèl Smith & Wesson, il a flayî dins lès cwasses. I-gn-a yeû come on djèmetadje, divant qu’ Silvin bwârléye di mau, rôle su s’costé èt tchaîye djus di s’ lét. L’ome s’a r’ssatchî conte li meur près’ à satchî.
« Dji vén r’qwêre mès liârds. Ti m’ vas dîre èwou qu’ tè l’s-as catchî, man.nète bièsse. Drove ti bètch, sinon djè l’ toûwe… »
Li pwinte di l’ârme voyadjeûve di l’ome à s’ feume. I s’a rapèlé l’ pôsicion dèl gnognot dins s’ bèrce. C’èsteût l’ minme véci. Pupont d’ soflèt po solèver l’ linçou.
Bordèl di mèrde ; èwou a dj’ co foutu mès pîds ?
Silvin s’aveût racoveté, lès mwins su sès cwasses. I lî choneûve qu’i riv’neût d’one longue tape. I n’âreût pus soyu dîre quand ç’ qu’i s’aveût èdwârmu. Quén djoû qu’on-èsteût ? Poqwè s’-t-alin.ne pouweûve-t-èle li gote ? Poqwè on mau d’ tièsse à dispièrter on mwârt ? D’èwou proveneûve-t-i, l’ bardouchî qui bwârleûve à sès-orâyes ?
Li lumîre l’a asbleuwî ; l’ome vineût d’alumer l’ lampe.
« Mins… qwè… ? »
« Li cassète, Lès deûs miyons d’eûros. Dispêtche tu, dji n’a pont d’ timps à piède ! »
Silvin s’a trin.né su l’ bwârd do lét. Il aveût on daurnion. Il aveût ausse di r’nauder. Sès-ouys ont tchaît sur l’ cwârp di s’ feume. Blanke mwate. Lèye, qu’aveût todi l’ somâye lèdjêr, douvént qu’èle ni d’djeûve rén ? I s’a dauré d’ssu, l’ prinde dins sès brès, l’ cocheûre djusqu’à yèsse arèdjî. Adon, il a comprins qu’èlè ni sèreût pus dins sès brès qu’one marionète sins cwade, à mitan tchôde, mins d’dja lon èri d’ lî. Li song n’ bateût pus dins sès vwin.nes !
« Dji n’sé nin ç’ qu’i s’a passé avou t’ feume, mins ti m’ rinds mès caurs èt dji t’ laî tranquile. Ni m’ fwârcîye nin à t’ touwer.»
Silvin brèyeût sès-ouys tot foû. « Qwè… Qwè ç’ qui s’a… passé… ? Poqwè ? »
L’ome sinteût s’ tièsse ènn’aler. Sès-idéyes n’arivin’ pus à s’ cèrvia. I s’ sinteût lèdjêr come prins par on voyadje dins dèl drogue. I n’ si rindeût nin compte qui l’ monocsîde di carbone continoûweût à si spaude autoû d’ zèls.
« Dji compte djusqu’à trwès èt dji tîre. Sondje à ti p’tit gnognot. »
Do côp, Silvin s’a rastampé, divant d’ potchî foû do lét, sès mwins pa d’vant s’ tièsse.
« Dji v’ donrè tot ç’ qui v’ vouroz, mins lèyiz m’ veûy mi crapôde, s’i vos plaît ! »
« T’ârès tot ç’ qui t’ vourès après, d’abord lès liârds ! »
« Vos caurs sont-st-ètèrés su on tèrî à Châlèrwè… S’i vos plaît ! »
« Rabîye tu, on î va ! »
« D’abôrd mi crapôde ! »
« O.K. Atincion, ti m’ djoûwes one quénte, dji tîre ! »
Silvin s’a r’moussî, fén frèch di strinse, il a couru djusqu’al tchambe di s’-t-èfant. Quand il a mètu s’ mwin su li p’tit cwârp, il a bwârlé d’ râje dissu l’ Bon Diu èt tos sès sints. « Poqwè ?… Poqwè nin mi ? »
L’ome s’avot r’ssatchî dins one cwane. I lèyeûve Silvin dins sès disbautchances. Tot sondjaud, si tièsse ènn’aleût… Totes cès-afaîres là… On tchôkemwârt… One tchin.ne sins fén… lî qui compteût r’prinde sès caurs sins mau… Sins co d’vu touwer. I s’ènn’-aveût cayî… Poqwè awè tchandjî sès-abitudes…
Il èstin’ à deûs. Il avin’ èbârqué l’ dispouye da Dècrampes. I-gn-aveût onk qui comandeût, èt l’ôte sûre. Èt si…
« Ti sés, dji pinse qui t’ soçon a tot arindjî po t’ touwer, Twè, èt tote ti famile po ténre li cassète por lî tot seû ! On baligand tot-ute ! »
Silvin n’è p’leûve pus. I bèrceûve sins fén si p’tite gnognote dins sès brès. Si tièsse a tchandjî, tot d’on côp. Sès-ouys lancîn’ dès blames di râje, dès-agnûres d’aragne.
« Dji vôreû bin carwaîtî one saqwè… Li stûve. »
« Sins motî, l’ome a faît sine dèl canon. Silvin a passé pa d’vant li. S’avancî djusqu’al bûse. L’èplausse èsteût churéye, agrandîye…
Primo aveût bin indjolé s’ mwârt, sins spaurgnî s’ feume, ni s’-t-èfant. On paupau… Il aveût touwé on’ ènocin.ne al fachète…