XX
Primo Litalo
Dispièrté foû d’ sès sondjes, Primo pinse qu’i va moru. L’alin.ne ni passe pus pa s’ gârguète sipotchîye, sèréye come dins on vèrin.
Lès cint kilos d’ niêrs, clincîs au d’zeû d’ li, rilachenut leû prèssion divant d’ si staurer dins-on fastrou.
Silvin Pèloso tchûle. I bloncîye, di d’vant, di d’drî come on’ èfant autisse. Sès-ouys fén rodjes, rinflés come dès bales di ping-pong, bolenut foû di s’ tièsse. Sès massales èt s’ front rilûjenut d’ souweû.
Primo a mètu s’ mwin su s’ gôrlète.
« T’ès malade ou qwè !… T’as manqué d’ mi stron.ner. Dj’a manqué d’ ravaler m’ linwe. Qu’èst ç’ qui t’as co ? Comint… comint as’ abroké ? »
« Li dobe di tès clés pa d’zo l’ pot d’ fleûrs, pôve ènocint ! Ti n’as nin vèyu al tévé ? Li gazète causéye do djoû ? Non, in ! Mossieû dwat ! »
« Ti causes di d’ qwè là ? »
Li maca à cénq dwègts da Silvin a spotchî l’ brès dèl fastrou.
« Di d’ qwè ç’ qui dj’ cause ? Di d’ qwè ç’ qui dj’ cause ! Ti sés quî qu’ c’èst l’ cia qu’on-a spotchî avou s’ banseléye di biyèts ? »
« Arète di bwârler come on vèchau ! Rapauje tu, s’i vos plaît ! »
Primo s’a rastampé èt s’aler prinde on vèrkin dins s’ bâr po s’ ramouyî s’ garguète qu’il aveût co mau. Dispôy li nût dèl Noyé, i saveût po li p’tite Dècrampes. Si fré Sècundo, tchèrdjî à bale, lî aveût tot raconté. Li cayute, ci qu’ Dècrampes aveût d’vu d’ner, li crapôde sitron.néye… Li pasquéye mousseût dins totes lès maujones pa l’ bwèsse à imaudjes ! Quén diâle li cia qui pout s’tron.ner on’ èfant ? Quén diâle, li cia qu’a pèté èvôye avou lès deûs miyons d’eûros ? L’ police qui n’avance nin !
Qwè ç’ qu’èle faît l’ police… Avou one djoûrnéye d’avance sur zèls, Primo aveût bin è l’idéye qu’èle ni r’montreût jamaîs djusqu’à zèls deûs. À paurt lès rotes dès bindeladjes, qu’avin’-t-i ? Rén d’après s’ frére. Èt lès cias qui sondin’ lès-ètangs d’avaurci, ravalerin’ leûs botâyes à aîr divant d’ trover one saqwè. Lès risses vègnenut todi dèl costé qu’on s’î ratind l’ mwins’. Audjoûrdu, il è d’moreût deûs. D’abord lès-ouys dèl sitron.neû : i d’veût awè vèyu èt prinde li numèrô dèl plaque d’auto da Silvin. I n’ taudjereût pus wêre divant di r’monter djusqu’à lî come on feu di strin. Pa l’ minme ocâsion dji sèrè prins dins l’ nasse èto.
Li deûzyinme risse, c’èsteût Silvin, lî minme !
Lès mwârts, lès pwin.nes dès familles, i s’è fouteût. I n’ si vèyeûve nin padrî lès baraus d’one grande maujone. Li bouneûr èsteût télemint près : à l’ djonde !
Dins l’ fond, li seûle aroke qu’i d’moreût, c’èsteût l’ bourique sitauréye dins s’ fastrou.
« Ti n’as rén dit à t’ feume, dj’èspère ? » a-t-i d’mandé Primo, d’one sètche linwe.
« Adon come ça, ti sés tot ! On-a spotchî l’ dirècteûr d’one fabrique. Si fèye s’a faît stron.ner ; èt t’ minme, ti dwas ! Mins t’ès co pîre qui l’ diâle. »
Primo lî a prusinté on vèrkin d’ fwate gote. Silvin èsteût foû d’ li.
« Asteûre, nos-avans d’pus d’ cint jandârs à nosse cu. Dès tchéns, dès-èlicoptêres ! Nos-èstans cûts si… »
Il a aspalé l’ vèrkin.
« Alez, on-i va, donne m’è co onk, i nos va falu do coradje ! »
Li visadje da Primo s’a r’ssèré.
« Ti causes di d’ qwè là ? »
« À t’-idéye, bièsse di grègne ? On va aler foute li feu dins tos lès biyèts, s’ dismacraler dès preûves ! I m’ faut r’lâver m’ consyince, Primo, tè l’ pous comprinde ça ? Dji n’ lès vou pus veûy. Nos-avans touwé on’ ènocint èt, sins l’ sawè, s’ fèye èto ! Dji veû trop voltî m’ feume èt m’ crapôde po leû catchî totes cès man.nèstés là. Dji n’ veû nin comint m’è dismacraler ôtrumint. On brûle li magot, nos s’crèts s’èvoleront dins lès fumêres. Gn-a pont d’ôte tchwès po nos chaper !… »
Primo s’a asglignî pa d’vant li, tot pèneûs.
« Choûte mu bin : ç’ qu’èst faît èst yute. Nin moyin di r’comincî à l’èdaume. Poqwè ramin.ner ça su li d’zeû. Minme si nos n’ârin’ nin yeû stî là, qwè ç’ qui t’ dit qui l’ moudreû n’âreût nin yeû touwé pére èt fèye. I n’ laîyenut jamaîs one rote qui pôreût lès vinde. Touwer ; ça coûre dins sès vwin.nes. Brûler lès caurs, ça sièvrè à qwè ! Laî l’ dwârmu èwou qu’ nos l’avans ètèré ! Sondje à t’ crapôde, al vicaîrîye qu’èlle ârè ! »
« Come di jusse, dji t’ l’aveû dit ç’ djoû là, dins l’auto, ti t’è sovéns ? Al prumêre aroke, on foût l’ feu dins tot. C’èsteût trop bia, on sondje, pfffft… rèvolé… »
Primo a faît rider s’ mwin su l’ visadje da Silvin, come on mwin.ne l’âreût yeû faît po lî d’ner s’ pârdon.
« D’acwârd, ti n’ t’ ocupes pus di t’ paurt, mins l’ mène, i as’ sondjî ? Dj’a è l’idéye d’ènn’aler l’ pus lon èri di d’ci. On n’ mi r’vwèrè pus jamaîs par ci. Ti m’ rovîyerès ! »
Silvin s’a volu disclaper di s’ fastrou, mins s’ tièsse èsteût d’dja bin pèsante.
« Nin quèstion d’ ça… On-a paurtadjî po gangnî… On paurtadjerè èto po piède… Si ti n’ véns nin avou mî… djè l’ frè mi minme… tot seû… Miyârd, dj’a m’ tièsse qui toûne ! Qwè ç’ qui… »
« Primo s’a rècrèsté, on mwaî pli d’ssu sès lèpes. Il a lampé s’ vèrkin.
« Mi grand pére à bouté dins lès mines tote si vîkaîrîye. I d’chindeûve à cénq cints mètes dizo têre tos lès djoûs avou one gayole èt deûs trwès canaris. Nin po lès choûter tchanter, sés’, i n’ tchantenut nin d’so têre, i faît trop nwêr. Qui ç’a fuche come âveû, come piqueû, po mougnî, i lès guigneûve à tot momint. Ti sés poqwè , Dji wadje qui t’ nè l’ sés nin ! »
Silvin aveût todi pu malaujîy à solèver sès paupîres.
« Dji m’ tè l’ va raconter. À chaque côp qu’ sès mouchons tchèyin’ di leû djokwè, ça v’leût dîre qui l’ grisou rôleut avou s’-t-alin.ne di mwârt. Mi grand pére fieût l’ sacrifice di sès p’titès bièsses qu’i vèyeût tant voltî, po spaurgnî s’ vicaîrîye, po yèsse sûr qui pèrson.ne ni dècide por lî d’ l’eûre di s’ dêrène bauye. I voleûve yèsse si maîsse… Ti m’ comprins ? »
« Ti… Ti m’as… d’né… qwè ? »
Dins s’ tièsse qu’i n’ controleût pus, Silvin vèyeûve bablou. Primo richoneût au diâle.
« Dèl drogue po t’èdwârmu ! Rén d’ grâve, mins i nè l’ faut nin machî avou do pèkèt. T’ès foû sqwêre, vî coyon… Choûte… I m’ faut do timps d’vant mi po tuzer… Dji n’ vôreu nin qui t’ vêreûs foute li tchèt dins lès poyes. Dji so seûr qui ti m’ donerès t’ pârdon, in, Silvin ? Di mè l’ on pau ! »
« Èspéce di mau bèl-aîr… »
Drogué à mwârt, Silvin à brûlé sès dêrènès fwaces po s’ rilèver foû dèl fastrou. Il aveût l’ dôrnis’
« Dji… t’va tou… »
« Chit’ ! Ti n’ mi dones nin on côp d’ mwins. T’âreûs p’lu d’morer dins t’ cwane sins motî. Dj’âreû yeû pus aujîy sins twè. »
Silvin s’a èdwârmu su l’ cossén dèl fastrou…
Primo sinteût bin qui ç’ qu’il aveût èmantchî, d’veûve ariver : il aveût drovu l’uch à one machine di mwârt…