IIILès tagueûs
Fonderîyes Mélotte. Costé dèl parking dès-autos dès dirècteûrs. Dîre qui l’en d’dins èst grumî d’ camèras po waîtî s’i-gn-a pont d’ baligands qu’abrokenut, èt qu’on-a yeû qu’one chaléye baurîre à zoupeler po p’lu machurer leû d’vanture à façâde. Méyenût, l’eûre dè régler sès comptes.
« Done mu cor one bombe di rodje ! »
« C’èst l’ dêrène, dispêtche tu ! dji djale ! »
On fèl plaîji pwârtéve Silvin Pèloso. Asteûre, c’est lès veûy èvi qu’i fieûve dispôy qui l’ fabrique aveût stî sèréye po d’naler yèsse rimontéye è l’Èspagne. Li râje boleûve dins sès vwin.nes. Li, qu’aveût d’dja d’vu viker li fén dès mines à tchèrbon avou s’ pa. Qu’aveût d’vu chômer dès-ans divant di r’trover d’ l’ovradje, véci à l’ fabrique Mélotte, vola qu’i s’ritroveûve barakî tot-ute yinte lès mwins dès cias què lî avîn ridoné l’ausse di mia viker.
Mi r’trover pus bas qu’ têre cor on côp ! Â nèni, i mè l’ payeront.
Maugré l’ djaléye què lî d’neûve di l’ongléye, il aspouyeûve à mwârt su l’ boton dèl bombe à rodje… èt lès-afronts courin’ su lès murâyes.
Co deûs munutes èt Primo Litalo aveût racouru èt l’ gougnî :
« Èt qwè ? T’as bin rade faît ? »
« Oyi, cès d’mé-cougnîs là, ènnè sèront quite di rispaumer leû d’vantûre. »
« Dj’a tot machuré come ti m’ l’as dit d’ fé ! »
« I faut qu’i pâyenuche ! On va waîtî à vos r’trover d’ l’ovradje : qu’il ont dit ! »
« Lès pouris ! Ça faît dès mwès qu’on pwinte. » Primo a r’loukî on daîrin côp s’-t-ovradje al lumîre di s’ lampe. Des tags t’t-ossi laudjes qui dès wagons di tch’min d’ fiêr. On toûrmint po lès cravates èt lès blankès paumes dès-envèlopes di fén d’ mwès à chîs chifes.
Si keûr a manqué d’ taurdjî quand il a vèyu l’ fin d’ l’andèle machuréye dissu li d’vantûre :
« Solia, t’ènn’as pus po lontins ! » « Silvin ! Tant qu’à fé, ti p’leûves mète ti signature ! Solia ! T’ataques nosse dirècteûr di l’ONEM, i sâront rade qui c’èst nos-ôtes qu’a r’blanki l’ fabrique à nosse môde ! I n’âront wêre à cachî. »
« Ratind one miète ! Avou tos lès-ovrîs qu’il ont mètu à pîds, i n’âront… »
« Rèface ça tot d’ sûte ! »
« T’as vraîmint l’ cu strwèt, dji n’a pupont d’ coleûr. »
« Boudje tu ! »
Avou ç’ qu’i-gn-aveûve co dins lès bombes, il a polu r’catchî lès scrîjadjes què lès-arin’ yeû vindu.
Primo à soflé : « Corèdjî ! T’èsteûs trop mwaîs qu’ po t’ sawè rasténre ? »
« Djè l’ veû èvi. Djè lî freû ravaler s’ cravate di râje chaque côp qu’ djè l’ veû ! Dj’ènn’a plin lès guètes di couru èt d’ fé tos lès-uchs po trover d’ l’ovradje. Chaque côp i-gn-a one chîléye di man’dâyes qui mougnerin’ lès pègnons d’ leûs-orâyes po-z-awè l’ seûle place qu’i-gn-a, èt ça n’ rote jamaîs ! »
« On-î ariverè, dji tè l’ di, mins tot ratindant, i nos faut fé l’ gros dos. Alez, on pète èvôye ! »
Il ont r’passé l’ baurîre co pus rwèd qui l’ vint d’ bîje. Rabrokés à yute dins l’ 305, il ont drovu one canète di bîre.
« Damadje d’ènn’arivé là, mins bon, à t’ santé ! »
Il ont t’nu leû linwe sins motî. Lès mwaijès sovnances rimontin’. Pupont d’ fabrique, pupont d’ovradje, one tène envèlope à sucî. Li Noyé sèrè co pus tène, li. Faute di bûre, on mougne do stofé !
« S’on-z-èrireût pa lès-éyoliènes, i-gn-a pèrson.ne su cès novèlès vôyes là. Dji poureû rôler rouf-rouf po fé passer tot ç’ qu’on-z-a è nosse tièsse. »
« Ça n’ mi va nin d’ trop. Couru come on dislachî, ça n’ mi va nin d’ trop… »
« Alez ! Laî m’ fé, po mostrer qu’à trinte ans, on n’èst nin co mwârt. »
L’auto à dèmaré come po-z-aler d’ssus Auve. Quausu yute d’ Èrnadje, èle a prind à drwète su l’ vôye di r’mimbrimint èwou qu’ lès molins à vint tournin’ à fé d’ l’ èlèctricité. Primo aveût r’trové sès dîj-ût ans, il a spotchî l’ pèdale à fond. L’auto à choré, todi pus rade, sins lampe, po passer pa d’vant one cayute di bwès, racwètîye dins l’ toûrnant. Cint, li long do p’tit bwès, cint èt trinte al tayète, l’idéye dè yèsse pus fwârt qui tot, èfoufî, rouf-tot-djus…
Èt l’arocadje, one croque à n’ nèn crwêre…