Lète à Maujeni

Èn årtike di Wikisource.
Lète à Maujeni
rortografiaedje da Jacques Desmet

Lète à Maujeni

On Gobtindjî
Quë d’meure à Gobtindje
1370 Mélin-Djodogne
Maujeni
Quë scrît è wallon d’ssë Facebook
Gobtindje lë prëmî d’awous’ 2020

Maujeni,

Bondjoû,

Come ë-n-a d’dja one fameûse tapéye qu’on n’ s’a pës vèyë, djë t’apwate sanquants novèles dë Gobtindje.

Më, vî grëseleûs dë d’vant l’guêre, djë vén d’ fafî, èvou on maske, èvou onk dë tès vîs copins.

Ël èstot dins s’ djardén, tot dësbautchî télemint qu’ë fiéve sètch !

Ë-n-avot ni grand tchôse dins sès canadas, dès nûléyes dë sprouwes avîn’ bètchi sès salades. Èlle avîn’ mougni totes sès cèréjes, Sès bëlokes èstîn’ plin.nes dë viêr’. Lë tiyou pièrdéve dëdja sès fouyes. Èt sès cabës, t’t-ossë bén lès vètes, quë lès blancs èt lès rodjes, leûs fouyes avîn’ tourné à rén ! Èt sès fleûrs, lë qu’ènn’-avot tant sogne, lë solia lès-avot tote rostë. Ë n’ dëmèréve pës qu’ lès fleûrs d’ôrtîyes.

Ë brèyéve sès-ouys tot foû, tot r’waîtant sès plans quë crèvîn’ à l’ tchaleûr dè l’ solia !

Djë lî a dët, « Frote tès-ouys, së non, ë va co fé pës sètch ! »

Të sés bén one novèle : Tintin èt Milou ont rabroké d’au Congo, vaicë à Gobtindje, avou totes leûs tchënëstrîyes, minme leû camèra. Èt leûs deûs valises, èstîn’ plin.ne dë p’tëtès bièsses qu’on noume : « lë colonia virus’ ». Të t’ rinds compte : deûs vîs rus d’on côp. Ça va co yèsse on bia bordèl po vëker à Gobtindje.

Ça va co fé grogneter lès cinsîs, minme së l’awous’ èstot achèvé po l’ 31 dë djëlèt’. Ë-n-a co quë vont fé one tièsse dë pourcia à tchèrète, valèt ! Ë-n-a ni dandji d’oyë dès-ouys dë Pitrin po lès comprinde ! Vola qu’on à baré nosse vôye. Comint vont-ë fé lès cinsîs po pwarter d’ l’aîwè à leûs bièsses dins lès pachës. Ë vont yèsse oblëdjî dë l’zeü pwârter d’ l’aîwe, à l’ mwin, èvou dès sayas. Tos l’ monde mèt s’-t-auto padvant s’-t-èch. Ë n’ lès rintërnèt minme ni dins leû garadje ou dins leû p’tët djardén pad’vant leû maujone. Ë parètrot qu’ c’èst po laiyî l’ vôye po lès-èfants djouwer. Mins poqwè laiyî lès-autos là d’abôrd, èle pëd’nèt tote le place : dè laudje, dè lon, dë d’trëviès. On-ârot p’lë rèflèchë one miète dëpës, sins dîre que l’arméye mèt à vinde lès vîs-èlicoptêres dë Bauvètchén ! »

Tant qu’ c’èst po rîre, ça va co !

Ë-n-a on brût quë coûre : ë-n-a one djon.ne safrète quë va rëv’në à Mélin. D’abëtëde, èle pwate dès mini-cotes, mins là, èlle a dandjî d’on novia foûrau à fleûr. Èle cache après one saki po v’në prinde sès mèsères. Come djë sé qu’ t’ès pwârté d’ssë l’afêre, djë vous bén sâyi dë t’ rëcomander, ça s’ pout fé à tot momint minme dins sès mwais djoû.

Mins tot ça pourot co tchandji : lë 19 d’awous’, c’èst l’ novèle lëne, lès fwatès plaives pourîn’ arëver, bouchî l’ chavia, èt lès Gobtindjîs co së r’trover nèyî dins lès brous.

Quand të passerès co pa Mélin, n’ rovîye ni d’ passer pa Gobtindje, nos-îrans èchone adlé l’ vî drole, ël a co dès-afêres à t’raconter.

È ratindant, pwate të bén èt mindje bon !

Èl Gobtindjî


(Rèsponse)
Maujeni
Lon Èri, lë sèt’ d’awous’ 2020
Pièrdë, a2
Monsieû Gobtindjî
Gobtindje 100 nëmèrô
1370 Mélin

Monsieû,

Djë so tot fén bënauje dë r’çûre vosse lète. Djë m’ rafîye d’î rèsponde tot së rade.

Vos p’loz bén dîre à vosse vî grëseleû dë d’vant l’ guêre, djë m’ va pëtôt dîre « nosse » vî grëseleû, peûsquë nos l’ conèchans bén tos lès deûs, quë dj’ nè l’ rovîye ni. Èt dè momint qu’on sèrè yëte dès grossès tchaleûrs, djë v’ promèt d’aler bèrdèler dëssë l’ dos dès djins d’asteûre èvou vos deûs. Ça nos rapèlerè nosse bon vî timps èt l’zi mostrer qu’ nos-avans todë yë nos-ouys drove fén laudje po d’ner on côp d’ mwins tot-autou d’ nos.

Audjoûrdë, ça n’èst pës come ça, c’èst d’abôrd por më : djë vëke à m’ môde èt të, tëre të plan.

C’èst l’ vèrëté ; quë fait sètch, cët-anéye cë. Më, djë m’ sovén qu’ nos avans yë dès anéyes dë plaîve èwou qu’ë faléve aler r’toûrner lès dîjas d’ frëmint së nos tères pacequ’ël èstîn’ fén frèches, tot crës d’ plaîve, èt qu’ lès grins djèrmîn’ së pîds. Tot ça po t’ dîre qu’ë faut prinde lë timps come ë vént, ça n’èst ni nos-ôtes què l’ va soyë tchandji !

Të m’ racontes co qu’ c’èst Tintin èt Milou quë nos-ont rapwârté l’ colonial virus : là, të m’è boûres one boune, in ! Pacequë l’ colonial vî rus’ ë coûrt pa d’lé nos-ôtes èto. Èt, cë n’èst ni tot chôpëchant tès-ouys quë tè l’ vas fé passer. Dès mëséres, on-n’ènn’-a todë yë. Èlle ont passé come èlle on v’në. Come lë grëpe quë r’vént chaque anéye èt qu’ nos vîs méd’céns d’ campagne, savîn sognî au mia po deûs mastokes, èvou dè vin rabolë, one miète dë laume, èt on vêre dë fèle gote. Au djoû d’audjoûrdë, t’aros on p’tët mau dëssë l’ bètchète dë t’ linwe, të troves tot d’sûte one dijin.nes dë « spécialësse » po t’ dîre n’impôrtë qwè èt s’ contraire…

Djë vou bén wâdjî qu’ c’èst co seûr dès « spécialësses » èto, qu’on fait barer t’ vôye quë coûrt tot l’ lon dèl rë. Djë m’ demande todë bén, comint ç’ quë lès cinsîs vont d’vë fé po passer èvou leûs mwèssoneûses, zèls quë boutenèt po noste amindjî… Mins të vwès, dins ç’ vôye là, djë wadje, quë-n-a bén one dîjin.ne dë spécialësses por on cinsî qu’î d’meure co : c’èst ça qu’on noume lë dèmocracîye asteûre.

Të m’ causes èto, d’one safrète quë va rëv’në à Gobtindje ? Djë n’ vwès ni quî qu’ c’èst. Quéquefîye bén one qu’on-a vèyë à l’ tèlèvësion po causer d’ Gobtindje l’ôte djoû ? Së tè l’ rèscontëre, të lî dirès dë m’ paurt qu’èle n’avot ni à-z-aler à Pîtrin ou à Wauve po causer d’ Gobtindje. Qu’èle n’avot qu’a roter à pîds dins tot l’ vëladje po fé l’ toûrnéyes dès tchapèles, d’ascauchî dins nos vôyes dë campagne quë passenèt pad’vant l’ Tëyou, pad’vant nos bèlès cinses qu’on-è cause dins tot l’ payës èt co pës lon.

Tant qu’a prinde sès mèsères, djë so bén bënauje quë t’auye sondjî à më, mins… lë timps faît s’-t-ovradje èt mès-ostës ont prins leû pension èto…

Nos ratindrans don l’ novèle lëne, mins djë pinse qu’ë-n-arè waire dë tchandjemint. Ë faut prinde lë timps come ë vént, të n’ sâros fén autrëmint…

Djë glète dëdja d’ nos r’veûy onk dë cès djoûs, è ratindant, djë t’ dë : parèglëmint por twè, po t’ fème, po tès-èfants, tès p’tëts-èfants, pwâte të bén, èt djë pâyerè lès « spécialësses ».

Maujeni

Vënoz tortos à Gobtindje.

Tecse eplaidî so Wikipedia, sol pådje « Jules Tits », li 21 d’ awousse 2020 pa Jacques Desmet, displaecî dins l’ rubrike Wikinoveles et rmetou so Wikisourd li 15 di djanvî 2021.