-Dji seû binauje ! Mins mi, dj’é toudis stî seûr qu’is dalît skèter l’barake ! C’èsteut min.me ène mîyète trop aujîye d’ès’ qualifier. Asteûre, faura vîr au mwès d’jwin !
Lès p’tits bèljes finich’nut preumîs di leû groupe avou èl totâl di 30 pwints dissus trente. Is s’ront don tièsse di sérîye pou l’tirâdje au sôrt.
El displas’mint di novembe en Russîye èsteut d’èl pus waute. Lès-èspéciâlisses wèyeut çoulà come ène finâle conte ène èquipe qui toûne a plin réjime. Sauf qui deûs djouweûs dès pus-impôrtants ènn’ sont nén alignès ès’ trouvant à l’infirmerîye : c’èsteut Cherysshev èyèt Golovin.. El pârtîye a stî ployîe en 20 munutes. I faut dîre ètou qui lès fréres Hazard èstit en fôrme. Thorgan a mârquè l’preumî dins l’gayole èyèt Eden èl deuzième èt trwèsième. Lukaku a ètou fét rintrer l’balon intrè lès piquèts. Dj’âreu min.me invîye di dîre qui c’èsteut trop aujîye à Sint Pétersboûrg pou lès roudjes diâbes. El chapîte s’a don sèrè pou 2019 avou l’pârtîye conte Chypre en ratindant l’tirâdje au sôrt du 30 di novembe à Bucarest.
Qwè qui, vos savèz, quand on pâle di tirâdje au sôrt, c’èst n’mîyète èc.sagèrè, puce qui nos savons dèdjà qui gn-âra l’Dan’mârk èyèt … l’russîye dins leû groupe.
Ene aute afêre qui nos savons, c’èst qui lès tièsses di sérîye djouw’ront « à domicile » … sauf qu’èl Bèljique n’a pont di stâde capâbe d’awè ène pârtîye di Coupe d’Europe ! Coulà ètou, i faut yèsse amon nos-autes pou z-awè n’téle afêre, seûchant qu’èl coupe d’Europe ès’ djouw’ra dins 12 payîs difèrents. Bén oyî, quand on-a in gouvèrnemint d’incapâbes dins s’payîs, c’èst dins tous lès domènes èyèt i gn-a nén qui dins l’enplwès, lès pinsîyons, lès swins d’santè, lès …
C’èst domâdje qui no stâde nacionâl n’èst pus valâbe pou ène téle compèticîyon. L’arindjî ausès nôrmes coustreut trop tchèr. Quant à d’è batî in nouvia, faureut s’mète d’acôrd èyèt çoulà c’è-st-ène aute pére di mantche pou l’fé su l’platia du Hézél. El batî à ène aute place ènn’ f’reut nén pléjî à yin dès deûs costès (flamind ou co bén francofone). Pou d’è r’vènu au plan dès spôrts, l’entrin.neû Martinez, quand à lî, ènn’ pout qui yèsse contint dissus sès troupes. I trouve qui l’èquipe a bén grandî èyèt èst pus matûre. Dispus s’n-arivéye, çoulà fét 34 victwêres, chîj nuls èyèt seûl’mint trwès côps batus.
I d’mèreut don èl pârtîye du mârdi conte Chypre. Rolà, ça a stî d’ène facilitè come anoncî. Qwè qui, un tout p’tit momint di bat’mint a fét qu’is-ont mwin.nès di 0 à 1 pa Ioannou à l’quatôzième munutes. Mins ça n’a durè qui 120 sucondes divant qui Benteke mârque rad’mint. Dins leû nouvia mayot èyèt avou ène èquipe candjîye pou cause di sayî dès-autes djouweûs, lès diâbes ont continuwè leû mârche à l’tièsse du class’mint.
- Dj’é invîye di dîre qui c’è-st-ène boune cuvéye.
Mins qui d’vra l’prouver au mwès d’jwin. Divant çoulà, dèdjà en mârs, i gn-âra dès-amicâlès pârtîyes qui d’vront yèsse prîjes sérieûs’mint.