- Adon qu’on n’sént pus qwè advinter pou diminuwer l’CO2 èt pou djoker l’rèchauf’mint climatique, lès vwètûres di ralîye roul’nut toudis en poluwant.
ès comiques di Grène pice èyèt Ecolo s’arindj’nut pou qu’èm’ pètite vwètûre ènn’ roule pus dins lès grandès Viles sins roubliyî qu’is tap’nut dès tac.ses dissus l’dièsel. Eyèt no p’tit Louwis di continuwer : « Lès gros batias (paqu’bots pou crwèsîyères) èyèt lès-avîyons poluw’nut bran.mint d’pus’. Quand ausès-usènes, èles achèt’nut dès drès di poluwer ! Pou tous lès gros, on lès lént fé » !
Eyèt pou lès vwètûres di ralîye ? Rolà, on-i pinse …Mins on n’sént nén co qwè fé ! Lès constructeûrs di vwètûres èyèt l’Fèdèrâcîyon djouw’nut au ping-pong en s’dijant qu’i faureut prinde èl vèrt tchimwin (come lès djon.nes qu’èvont manifèster dins lès rûwes), mins is pins’nut surtout à l’qualitè du spèctaque !
Faureut tout d’min.me ès’ dècider à prinde èl bon virâdje : c’èst n’saqwè qu’èst dins l’ér du timps. Mais gn-a saquantès samwênes, Peugot, VW èyèt Audi ès’ sont minme èrsatchî du Mondiâl di ralîy’cross à cause qui c’n-èsteut nén clér avou l’problème.
Parètreut qu’lès constructeûrs ènn’ voul’nut nén candjî lès règlemints. Mins d’èn-aute costè, is wét’nut fôrt près ausès nouvès tèc.nolojîyes. Is trouv’nut qui c’èst st-à l’Fèdèrâcîyon di moustrer l’vôye à chûre. Du costè d’èl Fèdèrâcîyon, is lach’nut qui lès constructeûrs duv’nut drouvu dès pisses di rèflèc.sîyon.
- Quand dji vos d’vîseu di ping-pong !
Ene afêre èst seûre : is voul’nut trouver dès solucîyons pou n’nén diminuwer lès perfôrmances èyèt l’èspèctaque, èyèt co, à l’condicîyon qui ça n’cousse nén trop tchêr !
En résumé, yin dit ène sôte èyèt l’aute dit ène aute afêre.
Ene vwètûre di course dwèt rouler avou in moteûr à combustîyon èyèt continuwer à fé du brût !
In grand coureû a trouvè ène solucîyon, c’èst Makinen ! Quasimint tous lès ralîyes finich’nut l’djoûrnéye avou ène ètape èspéciâle. Adon, pouqwè nén fé rouler l’vwètûre in djoû en « normâl » èyèt l’lèd’mwin en-« ibride » !
Bén seûr qui ça n’tént nén d’astampè hin çoulà !
Quand à no tchampîyon walon, Neuville, i trouve qui l’ibride poureut passer. Eyèt minme myeû qui l’élèctrique. Mins i r’conèt ètou qui tout ç’qu’i s’passe en matîyère di rècupèrâcîyon d’énèrjîye s’ra toudis bran.mint mwins en ralîye qui dissus in circwuit, ènn’ fuche dèdjà qu’au frin.nâdje woù-ç’qui lès mwin.neûs fèy’nut rider l’auto!
Eyèt l’sécuritè là-d’dins ? Gn-a co souvint dès-ac.cidints dins lès ralîyes. Adon fé n’rajoute ènn’s’reut nén l’bénv’nu. Pèrdons l’èc.simpe d’ène vwètûre qui s’èscape su l’costè d’èl route. Lès djins èvont rad’mint pou l’poussî : gn-âreut adon dès risques d’èlèctrocucîyon. Lès constructeûrs ènn’ sont nén prèsse à prinde dès risque pou l’sécuritè èyèt insi côper l’brantche qu’is sont st-achîds d’su.
Vos compèrdrèz qu’s’i faut radjouter dès (vèrtès) bat’rîyes, ça f’ra du pwèd. Lès pèrformances vont bachî. El pwèd va yèsse di 200 à 300 kulos di pus. Quand gn-âra in choc, ça s’ra pus dandj’reû. Quant au pris … On n’èst nén co sôrtî du problème qwè !