Lès tchafiâdjes da p’tit Louwis/48

Èn årtike di Wikisource.
Ciste ouve ci egzistêye eto divins ds ôtès ortografeyes : Rifondou walon.
El coupe du monde 2018 fotbale 2018

- Dji ratindeû çoulà come in tchat après n’sorîs ! El coupe du monde di fotbale !

Bran.mint dès djins avît critiquè pace qui ça s’passeut en Russîye. Mins gn-a yeû wêre di trèyins.

Tout aveut bén cominchî en tchansons avou Robbie Williams pou l’inaugurâcîyon à Moscou. Quant au fotbale, l’èquipe di Russîye l’aveut rèpôrtè di 5 à rén conte l’Arabîye Séoudite.

Pou chûre, c’èsteut dès deûres rintréyes pou l’France èyèt l’Angletére. Mins c’èsteut ène vréye catastrofe pou l’Al’magne èyèt l’Colombîye, batus tous lès deûs. A pwêne mèyeû pou l’Arjentine èyèt l’Brésil qu’ont d’vu s’continter d’in nul.

El lindi 18 di jwin, c’èsteut l’preumîyère pârtîye dès bèljes qui rèscontrît èl Panama à Sochi. Ene victwêre di 3 à rén èsteut di boune augûre. Pou continuwer dissus leû lancîye, nos djouweûs bèljes avît batu l’Tunisîye pa 5 à 2 avou dès doublès da Eden Hazard èyèt Lukaku.

Adon, pîre qu’èl défète d’èl preumîyère pârtîye, gn-a yeû in mèrcrèdi nwêr pou l’Al’magne batûwe pa l’Coréye du Sud di 2 à rén à Kazan. El tènant du tite finicheut dérin d’ès’ sérîye èyèt pus grâve, èsteut éliminè divant lès wîtièmes di finâle d’èl coupe ! Pou l’Bèljique, èl pârîye conte l’Angletére ènn’ compteut pus qu’pou du bûre, mins is l’ont gâgnî di yin à rén avou ène èquipe résèrve. Is finichît preumîs grâce au but da Januzaj. Mins d’èn-aute costè, is risquît di tchére (à l’condicîyon di passer) conte èl Brésil èyèt pou chûre èl France !

Ene aute constatâcîyon, c’èst qu’i gn-aveut pupont d’èquipes d’Afrique.

El sèm’di 30, deûs vedètes ont d’vu s’è d-aler : Messi èyèt Ronaldo, éliminès èl min.me djoû. Pupont d’Arjentine èt di Pôrtugal ! Lès p’tits bèljes tchèyît en witième di finâle conte èl Japon. En formalitè d’après lès-èspéciâlisses. Mins non fét ! Ene pârtîye dwèt yèsse djouwéye. Eyèt come di djusse, lès japonès ont mwin.nès di deûs à zéro. Ca a stî 2-1 pa Vertongen qu’a mârquè d’èl tièsse n’mîyète vènûwe di nule pau !

Lès bèljes ont fini pa s’rèvèyî, surtout grâce à deûs djouweûs rintrès : Fellaini èt Chadli. Deûr pou lès japonès, mins èl victwêre s’a dèssinè dins lès-arèts d’djeû à 15 sucondes d’èl fén d’èl pârtîye!

Gn-aveut pus qu’a rèscontrer l’Brésil avou toutes sès vedètes en quârt di finâle. Tout a bén cominchî pou lès diâbes, Fernandinho a mârquè conte sès couleûrs èyèt De Bruyne a fét 2-0 à l’31 ième munute. Lès bèljes ont ployî avou l’but da Augusto à l’76 ième, mins is-ont t’nu l’côp ! C’èsteut don l’dèmi-finâle conte nos vijins françès.

Bén qu’is-èstît fôrt critiquès pou leû façon d’djouwer, avou bran.mint trop d’anti fotbale, is-ont tout d’min.me batu l’Bèljique pa yin à rén … Et pou chûre ont batu lès crowates èyèt rèpôrtés l’coupe du monde 2018.

Quant à no n-èquipe bèlje, èl a rèpôrté l’pètite finâle en batant di 2 à rén l’Angletére. Ene vréye fièsse avou quasimint tous lès djouweûs mètus su l’tèrén qui s’con’chît bén come is djouwît tèrtous en Angletére.

Quand is-ont rintrès au payîs, ça a stî fièsse avou l’passâdje au Palès du Rwè èyèt pou chûre dissus l’Grand-Place di Brussèles. Faut dîre qui jamés, ène èquipe bèje n’aveut stî en d’mi-finâle. Lès djouweûs l’mèritît bén!