El nouvèle èst tcheûte !
Quand dji vos d’vîsse d’ène saqwè, c’èst souvint d’ène victwêre. Mins nén s’côp-cî !
P’tit Louwis èsteut disbautchî. El Crique s’a s’capè pou l’dérin côp. Nén pou gâgnî ène coûsse. Mins pus râde, il a pièrdu l’vîye. L’ome, yin dès mèyeûs coureûs walons, nos-a quitè. I ‘steut orijinére di Deûs-Acren, in vilâdje fèyant pârtîye di Lèssines. Il aveut v’nu au monde èl 11 di janviè 1957. I ‘steut in gamin di cinsî èt c’èst lauvau qu’il aveut donè lès preumîs côp d’pèdale. Estant djon.ne, i v’leut d’djà gâgnî. Pou cominchî, bén seûr, c’èsteut dès p’titès coûsses dins l’réjîyon. Pou chûre, gn-a yeû l’toûr di l’Av’nîr. In toûr qui r’chèneut adon au toûr di France, mins pou amateûs. Il aveut 20 ans. L’anéye chûvante, i passe mon lès profèssionèls dins-ène èquipe èspagnole (KAS) èyèt i rèpôrte dirècque èl Samwêne Catalane. Claudy Criquielion, pou s’preumîyère anéye ès’moustère tout d’chûte en-apougnant dès bèlès places.
Adon, ène èquipe bèlje s’intèrèsse au coureû qui discrotche in bia contrat mon Splendor. Il i d’meur’ra neuf anéyes. Il èst vré qui durant lès-anéyes 80, il a yeû l’ocâsîyon d’moustrer qu’i sinteut lès coûsses avou ène swèssantène di victwêres di 79 à 91. Lès pus bèles : èl Flèche Brabançone en 82, èl Grand Pris du Midi Libe en 86 èt 88, èl Classica San Sébastian en 83, deûs Flèches Walone en 85 èt 89, èl toûr di Romandîye en 86, èl toûr dès Flandes en 87, … Il a ètou stî tchampîyon d’Bèljique en 90 avou l’mayot di Loto, èquipe qu’i d’meur’ra deûs-ans. Il a stî lomè mèyeû spôrtif bèlje di l’anéye 84 après-awè gâgnî l’tchampionat du monde à Barcelone. Etou, bran.mint di places dins lès dîj preumîs come 3ième du toûr d’Espagne èt 5ième du toûr di France.
« Dji seû st-in coureû d’in djoû », dijeut-i. Lî, i rêveut d’ène victwêre dins l’pus bèles dès classiques : Lîdje-Bastone-Lîdje. I n’âra pont d’victwêre dins l’Dwèyène. Il a souvint arivè trop coûrt : deuzième en 85 èt 91, trwèsième en 87 èt quatième en 82. Mins adon, l’arivéye ès’ f’yeut su l’boul’vârd d’èl Sauv’nîyère. Domâdje qui ça n’èsteut nén come asteûre, dins l’gripète di Ans.
Comint ètou rouviyî l’drame di Renaix. Adon qu’èl Crique d-aleut rèpôrter l’ès’print finâl, il a stî balancè dins lès bâyes pa l’canadîyn Steve Bauer. El fautif a stî disclassè, mins c’èst Fondriest qu’a mètu l’mayot ârdiè dissus sès ‘spales.
Quand i s’a djoquè di couru, il a d’vènu dirècteûr spôrtif mon Loto èt pou chûre mon Landbowkrediet-Colnago.
Ene coûsse pôrte ès’nô « èl Grand Pris Criquielion » qui s’coûre fin du mwès d’mé.
Pou chûre, il a pris cès distances avou l’vélo èyèt a r ‘vènu viès cès racènes dins s’vilâdje. Dispus 2006, i ‘steut Echevin d’èl Vile di Lessines.
El 16 di févrî, èl Crique a yeû dès problèmes di coeûr (èn-AVC) Mwin.nè à l’opitâl dins-èn-ètat grâve, i nos-a quitè èl 18. El cén qui d’meur’ra yin dès tous grands tchampîyons d’amon nos-autes èsteut in modèle pou lès djon.nes qui cominchît dins l’monde du vélo. El Crique s’a d-alè saquants mwès après no Pino Cérami. Dji gâdje qu’is-âront bran.mint di souv’nances à s’raconter au paradis dès cyclisses. Ar’vwêr tchampîyon ! Ar’vwêr èl Crique !