Lès championats du monde, c’est toudis dès bèlès-afêres à wètî dins l’bwêsse à imâdjes. Bén-ètindu, p’tit Louwis ènn’ p’leut rater çoulà. Is s’passît à Berlin.
L’émocîyon ‘steut fôrte èl dimègne quand on-a fét l’ouvèrture. Vos l’pinsèz ! C’èst rolà qu’avit dèdjà stî fét lès Djès Olympiques di l’anéye 1936 woù ç’qui l’amèricain Jesse Owens aveut fét in tèrîbe afront à l’propagande da Hitler èyèt consôrts en rèpôrtant 4 mèdâyes.
- Mi, çu qu’dji ratind, c’èst d’vîr èl fameû Usain Bolt dins lès cint èyèt deûs cint mètes !
Em’n-ome, il èst toudis avou in lôdje sourîre èyèt i fét l’bièsse. El « Jamaïcan academy » domine à crèver èl monde du sprint, qui ça fuche amon lès feumes ostant qu’lès-omes. Parètreut qu’is-ont çoulà dins l’sang ! Dèdjà à s’cole primére, i gn-a dès compèticîyons avou dès-entrin.neûs.
Pou d’è r’vènu à Usain Bolt, adon qui lès-autes coureûs ès’ concent’nut, lî, i rit èyèt i fét dès sindj’rîyes pa-d’vant lès camèras. Gn-a nén à dîre, mins il èst seûr di lî.
Arive adon èl finâle du cint mètes. Ca sinteut l’poude pace qui lès rivaus avît fét fôrt en quârt èyèt d’mi-finâle. El tripe champîyon du monde à Osaka, Tyson Gay èyèt èl pus rapîde en quârt, Asafa Powel avît l’espwêr d’èl bate.
Tèrtous, nos-avons co dins l’tièsse lès-imâdjes d’ès’ trîyonfes à Pèkin quand il-a spotchî sès advèrséres pou d’vènu tchampîyon olympique du cint mètes. Es’ djoû-là, on l’a spotè : I’éclér, Mins i n’vout nén s’ joquer insi èyèt i vout d’vènu ène léjende du spôrt.
Mins r’vènons à Berlin, on s’dimindeut si … Bah wète, pour l’ome èl pus rapîde du monde, ça a stî ène formalitè. Pou l’cint mètes, c’èsteut 9 sucondes èyèt 58 cintièmes. Pou l’deûs cint mètes, i l’a fini en 19 sucondes èyèt 19 cintièmes.
- Il èst trop fôrt, vos dis-dje ! Dès mwéjès linwes pâl’nut d’djà di dopâdje. Saquantès samwênes di d’vant cénq djins ont co stî controlès positif. Mins i n’faut nén vîr sès droques-là pa-t’t-avau tout.
Pou l’pètète istwêre, Usain Bolt n’a nén r’çu qui dès fleûrs èyèt dès mèdayes. El Vile di berlin a t’nu à onorer Bolt en lî ofrant in bouquèt du meûr di Berlin. L’aute crwèyeut qu’i d-aleut l’mète come souv’nance dins s’n-apartumint. Bah wète, i f’yeut 4,3 mètes cârè èyèt pèseut 2,7 tones ! On va lî èvoyî pa batia !
Pou chûre, l’ome di Kingston a v’nu couru pou l’dérène mantche d’èl « Golden League » à Brusèles. Lès-organisateûs avit arindjî ène nouve pisse en caoutchouc naturèl avou dès trôs d’dins pou lèyî passer d’l-ér pa d’z-ous. Ene téle pisse pèrmèteut d’è d-aler pus râde. Eyèt d’vinè qui ç’qu’a v’nu l’inaugurer ?
- Bén-ètindu. Is-ont fét v’nu Usain Bolt, l’ome qui d’mande in cachèt di 200.000 Euros pa mèting.
Eyèt èl cén du Heizèl, i l’a fét, mins s’a djusse alignè dissus l’deûs cint mètes. Eyèt il a batu l’èr’côrd du stâde, vî di 32 ans !
On s’dimande èyu ç’qui s’djoqu’ra. Es’popularitè èst tèrîbe, mins il arive à d’meurer simpe. Faut dîre qui c’è-st-insi dispus l’âdje di 15 ans. L’ome mârqu’ra à jamés l’istwêre du spôrt. Dji d’è seû seûr !