Li bêté s' riskêye
Foû dèl neûristé,
Tapant sès bwèrgnêyes
So lès tchamps d'seûlés.
Å cîr, come dès pièles,
Mèye siteûles blaw'tèt;
Li zûvion sofèle,
Èt lès håyes tchantèt.
Èle tchantèt lès ponnes
Dès coûrs aband'nés,
Et dj'èl veû qu'i sonne,
Li ci qu' dj'a k'trawé.
Adon, come dèl tére,
I m' sonle qui dji veû
S'èlèver on spér,
On blanc spér, tot dreût.
Li pawe ki m'ètchinnêye;
Dji hoûte sins moti,
Divins lès bouhêyes,
Ine flåwe vwès qui dit:
Sôlêye di caresses
On djoû, sins l' voleûr,
On done si djonnèsse,
Come on done ine fleûr.
L'èsblawante êreûr
Tchèsse li nut′ å lon;
Li solo mosteûre
Si vizèdje tot rond.
Li djonne oûhê såye
D'ènn′ aler tot seû,
Dismètant qu' lès håyes
Rid'hèt leû respleû.
Èle tchantèt lès ponnes
Dès coûrs aband'nés.
Èt dj'èl veû qu'i sonne,
Li ci qu' dj'a k'trawé.
Lès håyes tchantèt
Ciste ouve ci egzistêye eto divins ds ôtès ortografeyes : Rifondou walon.diviè 1920
Lès håyes tchantèt