Lès bièsses malådes dèl pèsse

Èn årtike di Wikisource.
Aller à la navigation Aller à la recherche
Emojione 270F.svg Ciste ouve ci egzistêye eto divins ds ôtès ortografeyes : Ortografeye do scrijheuRifondou walon.
Lès bièsses malådes dèl pèsse
ratournaedje da Lucien Mahin
2020
LÈS BIÈSSES MALÅDES DÈL PESSE

On må qui fêt lès cours tocter,
Må qu’ Dièw, on djoû di måvasté,
Trova po fé spani sès pètchîs à nosse tére,
Li pesse (pusqui dji deû l’ batizer di s’ vrêy no),
Qu’è-st-à minme so quéques djoûs di nos ètèrer tos,
Féve ås pôvès bièsses ine fèle guére.
Èle ni morît nin totes, mês turtotes malårdît :
On n’è veyéve nole po s’êdî,
A lanwi quéquès eûres, lumeciner håre ou hote ;
Nou bokèt n’ gostéve à l’ pus glote.
Li r’nå n’aléve pus à l’afut
D’ine pôve poyète èrî di s’ vôye ;
Les colons ni s’ riqwèrît pus :
Evôye l’amor, adiè lès djôyes !
Li Liyon t’na consèy èt d’ha : mès bons-èfants,
Dji pinse qui Dièw mèt’ èn-avant
Po nos måfêts cisse maladèye.
Qui l’ pus mètchant, li pus calin,
Si lîveûre à l’ colére di nosse mêsse sovèrin ;
Mutwè ratchetêyerè-t-i nosse santé èt nosse vèye.
Dj’a léhou ine sawice, divins dès vîs papîs,
Qu’on a vèyou dès s’fêts martchîs.
Insi n’ nos spårgnans nin ; loukans sins nou distoûr
Chakeun’ è pus parfond d’ nosse coûr.
Po m’ pårt, à continter mès gos’ èt mi-apétit
Dj’a magnî traze èt traze bèrbis.
Qui m’avît-èle fêt ? — rin dè monde ;
I m’ mestouma, creûs-dj’ minme, saqwants côps di magnî
Li bièrdjî.
Dji done don m’ vèye por vos, s’èl fåt fé, mês dji conte,
Qui chakeun’ tot come mi deût fé s’ mèyå culpa ;
Il è-st-à sohêtî, ci n’èst qui djustice peûre
Qu’on fêsse pèri quî qu’èst l’ pus neûr. —

Sîre, vos-èstez bin bon, bêcôp trop’ dit-st-i li r’nå ;
Vos mostrez, à dîre vrêy, trop’ di délicatèsse.
Là ! magnî dès berbis, peûre tchin’trèye, sotès bièsses,
Èst-ç’ fé pètchî ? Nèni, Sègneûr, vos l’zî fèrîz
On grand oneûr à lès crohî :
Po çou qu’èst dè bièrdjî, dj’ wèse dîre
Qu’i mèritéve co bin ôte tchwè ;
N’èsteût-i nin d’ cès djins qui vôrît nos fé l’ lwè
À nos, qu’ Diu fèrit lès prumîrs ?
Insi pårla li r’nå ; vivå d’hît lès plaqueûs.
On n’ wèza trop’ avou lès leûps,
Avou lès tigues, lès ours’ èt lès ôtes gros voleûrs,
Djåzer di leûs pus lêdès keûres.
Tote måle tièsse, tote fwète gueûye èt djusqu’ås pus simpes tchins
À z-oyî l’onk èt l’ôte, n’èstît qui dès p’tits sints.

À s’ toûr l’ågne si k’fèssant dérit : « dj’a-t-ine dotance
Qu’ine fèye èmé l’ wêde d’on covint,
L’ocåsion, l’ fim, li foûre qui m’ montéve djusqu’à l’ panse,
Li diâle, pinse-dju, m’ tèm’tant å d’vins,
Dji paha foû dè pré come mi linwe, nin pus lådje ;
Dji n’èsteû nin è m’ dreût, s’èl fåt dîre come il èst. »

I n’aveût nin fini qu’on djuréve so l’ bådèt.
On leûp, d’mèye avocåt, fa on discoûrs d’ine pådje
Po prover qu’i faléve moudri sins piède nou timps
Ci pèlé, ci pouyeûs d’ wice vinéve tot l’ mèhin.
On djudja qu’on té fêt méritéve li potince.
Magnî l’ jéèbe d’on covint ! hê ! vite ine bone sintince !
C’èsteût ine trop doûce pènitince
Qui l’ mwért po ç’ brigand-là. On lî fa bin vèyî.
 
V’là come i va, parèt, d’vins lès palås dès princes
Fwért, on v’ frè dès mamèyes ; flåwe vos sèrez striyî.