Hongrèye

Èn årtike di Wikisource.
Ciste ouve ci egzistêye eto divins ds ôtès ortografeyes : Rifondou.
Hongrèye

Hongrèye

Binamèyes Ranteul’rèsses, binamés Ranteûlîs,


Dji m’ va sayi, come on m’ l’ a d’mandé di v’ djâser dèl Hongrèye. I m’ sonle qui c’ èst-st-on sudjèt qui tome â bon moumint, la qui l’ an qui vint l’ Hongrèye va moussî è l’ Unin Européyinne èt qui l’ payis vint dè s’ fé r’mârquer tot sinant l’ lète dès ût po-z-aspoyi Bush. Al copète dè martchî lès Hongrèt lowèt âs Amèrikins dès grandès sitârèyes militères, po-z-î fé fe l’ ègsèrcisse a dès sôdârds irakiyins, dès inn’mis d’ Sadam Hussein.

Eune deuzinme rèzon po ‘nnè djâser, c’ èst qui, d’vins l’ timps, i n-a st-avou dès mèy di Walons èl Hongrèye, dès vièdjes ètîrs !. On pout minme dîre qui c’ èst zèls qu’ ont métou so pîd l’ ètat hongrwès. Vola ‘ne saqwè qu’ èsteût bin roûvîye di tot l’ monde. Mins nos ‘nnè r’djâs’rans torade.

Po comprinde li Hongrèye d’ asteûr, i nos fârè bin fé eune miyète d’ istwère, aler veûy çou qui s’ î a passé.

On pout côpé l’ istwère dè payis è treûs boquèts. L’ antiquité. Li Rwèyôme di Hongrèye. Li hongrèye « modèrne ». Inte lès treûs i n-a-st-avou dès sôrs di tronl’mints d’ tére istoriques, qu’ ont v’ nou tot bouhi djus. On pô come li fameûse mètèorite qu’ a v’nou dè fî fond dè cîr sprâtchî lès cabus d’âs dinosôres.

Mins, wice èst-èle li Hongrèye ? Li Hongrèye èst-st-è plin mitan d’ l’ Eûrope (Mittel Europa). C’ èst po lès jéografes « li bassin dès Karpathes ». C’ èst-st-on plat payis, avou dès montagnes so tos sès bwèrds. Di nosse dè costé, c’ èst lès Alpes. Vos polez adon comprinde, qui l’ vint d’ ouwès, « li vint d’ plève » a malahi passer èt qu’ èst-st-on payis qu’ i n’ î plout wêre. Come il èst d’dja à pus d’ mèy kilomètes dèl mér dè nôrd, lès ostés i sont brâmint pus tchôds qu’ vèci. Et lès iviérs pus freûds. Mins, çou qu’ aspite âs oûy, qwand c’ èst qu’ on wête eune carte, c’ èst qui l’ Danûbe passe è plin mitan. I s’ î va minme ployî è deûs : C’ èst li fameûs cron dè Danûbe, là wice qui condje si coûse èt prind so l’ sûd. I fât comprinde qui l’ Danûbe èsteût ‘ne grande vôye èss’-ouwèss’, po lès peûpes èt po lès martchands, la qui trawe lès montagnes (Veûy les Niebelungen, les Creûh’lés). Mins i n’ aveût ossi dès ôtès vôyes, come « li vôye di l’ ambe », qu’ aléve dèl mér Baltik’ al mér Mèditèranéye èt qui passéve à Sopron (vèye tot conte li frontîre avou l’ Ôtriche).

C’ èst dire qui n-a vèla dès djins dispôy fwèrt longtimps. Qwand dè timps dè Vî Hinri, l’ ârmèye di Rome s’ a fêt mêsse dè pays, c’ èsteût dès dreûts cuzins da nosse, dès Cèltes qu’ î d’morît. Cisse pârtèye la d’ l’ ampîre si louméve PANNONIE. Lès Romins î ont d’moré dès sièkes, minme qui l’ pére da Sint Martin di Tours (li ci qu’ côpa s’ pal’tot è deûs po ‘nnè d’ner l’ mitan a on pôve), èsteût oficî romin à Szombathely.

Mins, vos sèpez bin çou qu’ s’ a passé. Lès frontîres di l’ ampîre ont volé a boquèts èt totes sôres di peûpes ont rouflé so l’ payis, distruhant tot. Ça a stou li prumî tronl’mint d’ tére. Lès pus k’nohous d’ tos cès peûpes, c’ èst lès Huns : c’ èst zèls qu’ ont d’né leû nom â payis. On pinse qu’ Atila a morou è s’ palâ d’ Estergom, sol Danûbe.

Dès ôtes peûpes ont sûvou : lès Lombards, lès Avars, … èt final’mint lès Magyars.

Lès Magyars si font mêsses dè pays è l’ annèye 896. Leû chèf Arpad aveût parvinou à rassonler âtou d’ lu lès « sèt tribus magyares ».

Qwè-èst-ce qui cès Magyars-la ? Bin, c’ èst dès sâvadjes. Dès rôbaleûs qui viquèt d’zos dès tintes, dès djins qu’ ont v’nou di d’ l’ôte dè costé l’ Oural et qui n’ djâsèt nin on lingadje « indo-européyen.. Mins c’ èst ossi dès moudreûs qui towèt, qui hapèt, qui broûlèt. I vont aler bin lon po haper. Leûs bindes di bandits vinront dusqu’ a chal, sol bwèrd di Sambe. I vinront toûrnicoter âtou dè moustî d’ Lobbes qu’ ènnè djâse divins sès vîs papîs. Mins il eûrit-st-on mirâke. I touma dè cîr eune si fwète lavasse qu’ on r’trova lès Hongrwès èl bèrdouye dusqu’ al pîpe. Lès braves monnes lès ont parèt-i rascoyou èt ènn’ ont fêt dès bons crustins. C’ èsteût âtou l’ an 950 ; Fât dîre tot l’ minme qu’ on a stou ahèssis di c’ timps-la ! A sûd, n-aveût lès Arapes, â nôrd èt a l’ouw èss’, c’ èsteût lès Vikings, à l’ èss’ lès Hongrwès ! Rimarquons, tot passant, qui l’ Principôté d’ Lîdje ni fourît mètowe so pîd qu’ è 980. Divant çoula, c’ èsteût li Lotharinjie.

Todi ènn’ èst-i qui lès fis da Arpad ont stou sûtîs. Il ont vèyou çou qu’ c’ èsteût qu’ nosse civilisâcion. Et il ont compris ! Il ont compris qu’ si volît on djoû poleûr div’ni on rwèyôme è l’ Europe. On vrèy rwèyôme rik’nohou da turtos, i s’ faléve fé crustins èt andoûler l’ pâpe.

C’ èst-st-insi qui Istvan div’na li prumî rwè dèl Hongrèye. C’ èsteût è l’ an 1001. I r’çûva d’â pâpe eune bèle corone, qu’ on a co todi pol djoû d’ oûy èt qu’ èst l’ simbole dèl Hongtrèye. Istvan (Sint Istvan asteûr, mâgré qu’ on n’ pout sûr nin dîre qu’ ‘l a stou a « sint » a fwèrci s’ peûpe a s’ fé crustin. Po s’ fé êdî a fé dè payis on payis crustin èt « modèrne », il a d’mandé « d’ assistance teknique ». Et on lî a èvoyî dès hièdes di monnes èt d’ ovrîs d’èmon nos-ôtes.

Di d’ wice vinît-i : dè Payis d’ Moûse, di d’ lîdje, di d’ Nameûr, di d’ Mètz… C’ èst qui lès rwès inmît mî prinde dès djins di d’ ôte dè costé d’ ampîre jèrmanique. I n’ avît nin roûvî qu’ c’ èsteût l’ ampèreûr Otton qu’ èlz-aveût batou po d’ bon è l’ an 855.

Ni comptez nin qu’ tot âye sitou come so dès rôlètes. qui dè contrêre. I n-a-st-avou eune révolte èt câsî tos lès monnes s’ont fêt mascrâwer. Sint Djèrâ par ègzimpe qu’ èst li pus k’nohou. Onk dès grands ôtéls di Budapèst pwète si nom (Gèllért).

Mins, al, fin dè compte, li rwè André a tot r’mètou d’ adrame. Dès mèy di Walons èt d’ monnes cistèrciyins ont-st-acorou èt il ont bâtî li rwèyôme di Hongrèye (Covints, tchèstês, administrâcion, èglîses). C’ èst zèls qu’ ont scrît lès prumîs tèkstes è hongrès. Mins i n’ vinît nin po rin. C’ èst qui, tot div’nant rwé Etchiène (Istvan) aveût div’nou mêsse di tot l’ payis (dominne rwèyâl). Il a d’né dès tèrritwèrs âs walons, avou totes sôrtes di libèrtés (po lès takses, li dreût djâser leû lingadje…). Mins i d’vît bâti dès tchèstês, dès vièdjes, distrûre lès bwès po ‘nnè fé dès tchamps èt dès vègnes. C’ èst dès vègnurons dè bwèrd di Moûse qu’ on « fêt » l’ vin d’ Tokay. Il ont-st-apwèrté là li civilisâcion dé Payis d’ Moûse. Lès monnes zèls ont-aminé leûs maçons, leûs sculteûs èt ont bâti lès moustîs cistèrciyins.

Mins, kimint n’ ont-i nin stou nèyi â mitan dès Hongrwès ? Pace qu’ il-avît leûs prôpes vièdjes èt qu’ il n’ lèyît nin leûs feumes aprinde li hongrès (Lès Al’mands, Sachsen, ont fêt parèy èl Transsilvanîye wice qu’ il-ont d’moré dusqu’ al fin d’ Ceauscecu) I n-a à Lîdje dès vîs papîs d’ âtou d’ 1450 qui djâsèt d’ Hongrwès djâsant l’ walon. Lès Hongrwès loumît lès Walons Olasz, çou qui asteûre vout dire itâliyin. On mot qui vinéve, parèt-i, d’ l’ al’mand Walsch. C’ èst-st-on nom qu’ on pout co r’trover asteûre divins dès noms d’ vièdjes.

Lès rwès d’ Hongrèye ont marié dès princèsses d’ foû tos lès pays d’ Europe. I n-a st-avou dès Anjou, po n’ djâser qui d’ zèls èt â qwinzinme sièke eune hiède d’ ârtisses a v’nou d’ France. On sayéve al coûr dè viquer « à la française ».

C’ èst-st-adon qu’ advina li deûzinme tronl’mint d’ tére. Li payis touma âs mins dès Turks. Tot fourit distrût ! Lès Walons, qu’ èstît là dispôy pus cinq cints ans fourît mascrawès. Dès palâs, dès catèdrâles, dès èglîses, i n’ dimora nin pîre so pîre. Et lès Turks ont d’manou là cint ans.

Qwand on veût qu’ lès Saks, qui zèls n’ ont nin stou distrûts dès Turks. (Poqwè ? Est-ce pace qu’ il-èstît eune miyète foû dèl vôye di l’ ârmèye turke èt qu’ il-ont polou fé bèbèle avou zèls ?). Qwand on veût qu’ lès Saks n’ ont qwité leûs vièdjes qu’ a pâtrir di 1989, après l’ mwèrt da Ceaucescu, on s’ pôreût d’mander çou qu’ ‘l’ âreût-st-advinou d’ nos Walons. Mutwè sèrît-i co todi là ?

E l’ annèye 1683, l’ ârmèye turque ataquéve Viène èt grâce à Diu, on l’s a batou. Dji di « on » pace qui dès Walons di d’ chal avît pris l’ vôye di Viène po l’ aler disfinde I n-aveût on rèdjumint d’ Hu, avou l’ jènèrâl Vièrsèt. Il avît raminé eune dozinne di drapês hapés âs Turks, po l’s ofri à Notru Dame so l’ Sâte. Dji m’ sovins fwèrt bin d’ cès drapês hâgnés so les meûrs di l’ églîse. Qwand lès Dominikins ont qwité l’ covint, i n-a vint cinq ans, li novê curé lès a wèsté po lès aler hèrer dji n’ sé wice.

Lès Habsbourg avît wâgnî, èt il-ont traké lès Turks foû d’ Hongrèye. Mins, li payis èsteût div’nou on dézèrt.

Li pére da Marîye-Tètése èvoya adon so plèce dès Franciskins èt dès colons swâbes po ribâti èt ripeupler l’ payis. Lès Walons zèls, avît tot a fêt disparètou. Ci n’ èst qu’ dièin’mint qu’ ont-z-a rataquer d’ ènnè djâser. Dèdja, Fèlik Rousseau aveût eune miyète ataqué l’ sudjèt. I fât surtout aler veûy divins lès vîs papîs dès moustîs, mins i n’ dimeure nin grand tchwè. Dièrinmint dès « ètno-musicologes » hongrwès ont stou tot èsbarés dè discovri qui leûs pus vîyès balades (onzinme sièke) n’ èstît qu’ dès adaptâcions di vîyès balades d’ èmon nos-ôtes qui nos avît aminé vèla.

Vola lès Habsbourg mêsses e payis èt oblidjis dè fé v’ni dès colons foû dès payis djondant. Dj’ a di qui l’ payis aveût div ‘nou on dézèrt, c’ èst vrèy pol l’ Transdanubie, ca dè costé dèl Transsilvanie, i n’ aveût deûs princes qu’ avît roté avou l’ sultan èt qu’ avît sogne dè l’ impérialisme di Viène. Li pus fameûs c’ èst l’ prince Françwès Rakoczi. E l’ annèye 1701, i prind l’ tièsse dès Koroutz, lès sôdârds dè peûpe hongrwè.. Dîh ans â long i va miner l’ guêre âs Ôtrichins. Batou, i qwitrè s’ payis po-z-aler mori èl Turkèye Po lès Hongrwès, Rakoczi èst on héros nacionâl.

Dîh noûvinme sièke : eun ome, li comte Szechenyi, li pus grand dès Hongrwès mine li payis sol vôye dè progrès. Mins, come divins lès ôtes payis d’ Europe, lès novèlès idèyes avancihèt, èt i n-ârèt è l’ annèye 1848, eune grande révolution disconte lès Ôtrichins, On r’tinrè Lajos Kossuth, li politiciyin èt Sandor Pètöfi, li pus grand powète hongrwès. Mins lès rèvolucionêres sèront batous. Mins ca k’ mince a aler mâ po lès Ôtrichins : i s’ vont fé bate è l’ Italîye. I s’vont fé bate dès Pruchins èt i vont comprinde qu’ il èst timps d’ fé bèbèle avou lès Hongrwès. E l’ annèye 1867, c’ èst l’ compromis, c’ èst l’ crèâciyon dèl dobe monarchîye. On direût asteûre qui c’ èst l’ confédéralisme.

Guère di catwaze : lès Hongrwès si batèt avou lès Ôtrichins. 1919, c’ èst l’ révolucion èt l’ fondâcion dèl république di Hongrèye. I n-a-st-avou eune révolucion communisse, pwis eune révolucion « blanke », qu’ à mètou al tièsse dè payis l’ amiral Horthy. Mins, li payis a pièrdou l’ guère, èt èl va payî tchîr ! C’ èst fameûs trêté d’ Trianon. I va piède lès deûs tiérs di s’ tèritwèr èt swèssante pourcint d’ sès djins. (Transsilvanie, Slovaqie, Croatie, dès boquèts iront a l’ Ukraine, à la Sèrbie.) Et dès miliyons d’ vrèy Hongrwès.

C’ fourit eune plôye malahîye à r’wèri, èt vint ans pus târd, Hitlèr èt Mussolini vont-st-èmantchi « les arbitrages de Vienne » qui vont rid’ner âs Hongrwès dès tèritwères di Slovaquie èt d’ Roumanie, wice qui lès Hongrwès èstît majoritères. Si bin, qui qwand Hitlèr va-st-ataquer l’ Russie, lès Hongrwès lès vont sûre èt vont piède li deûzinme guère mondiâle.

Et ci sèrè l’ communisme dusqu’ a l hirâde dè « ridô d’ fièr ».

Et Asteûre ?

Li Hongrèye èst-st-on p’tit payis (sîh côps l’ Walon’rèye po dîh miyons d’ âbitants).

Po l’ économique, lès vîyès ouhènes ont pièrdou leûs vîs martchî (U.R.S.S.). I n-a brâmint dès novèlès ouhènes, la qui l’ min d’ oûve èst bon martchî, corèdjeûse èt qui n’ a câsî nou sindicat. (Ex : lès grands botiques drovèt nute èt djoû.). Mins i k’mincèt tot l’ minme dè veûy çou qu’ c’ èst li capitalisme èt l’ mondialisâcion (I.B.M. qui après cinq annèyes sins câsî payî d’ takses bage èl Chine)

Mins lès govièrnumints tinèt bin l’ hèrna èt leû manôye èst fwète.

Tot candje rademint. C’ èst-st-on novê martchî. Mins si n-a dès djins vayants èt plin d’ idèyes qui div’nèt ritches èt f’sèt avancî l’ payis, lès pris gripèt todi. Brâmint d’ djins ont malahi viquer, si plindèt èt dihèt rigrèter l’ « bolché vita ». C’ èst dès fonksionêres, dès pinchonés… Mins lès djins sont corèdjeûses èt ovrèt brâmint èt dj’ a lès pinse s qui d’vins quéquès annèyes i sèront§ parèy a nos.

Po l’ politique, i vont moussî è l’ europe, èt leûs vwèzins avou. Coula d’vreût arindjî bin dès problèmes, po çou qu’ èst dès Hongrwès di Slovaquîye èt d’ Roumanîye. I sèront-st-oblidjîs avou dè fè eune saqwè po lès Djîpsins (vèla on lès lome Tsigânes) qu’ avît r’clamé à Strasbourg.

Coferince dinêye å Noû-Lovén, li prumî d’ måss, adjinçnêye pal soce « Li Rantoele ».