Linwe-ehåyaedje
E walon, on prezinte sovint les deus sistinmes ortografikes, Feller eyet rfondou, come estant disconte n’ onk l’ ôte.
Les cis k’ uznut noste ortografeye, c’ est des vayants. Eyet les cis k’ eploynut l’ ôte, c’ est des måcreyants. Sapinse « zels », todi. Come si on sereut-st oblidjîs di tchaire dins l’ manikeyisse.
Ci sôre d’ opôzucion la, e l’ politike, ça s’ lome do populisse. Come si ça n’ sereut nén possibe di siervi les deus sôres d’ ortografeye. Çou ki Lucyin Mahin fwait, come dji l’ a ddja mostré l’ ôte côp (Rantoele 105, p. 8).
Al copete do martchî, gn a des djins k’ ont sayî d' askepyî des maxhaedjes inte li Feller eyet l’ erfondou. C’ est çk’ on lome les « rfondants ». Egzimpes : sacwantès ouves da Jean Goffart eyet da Jacques Desmet.
Dins « Dji m’ lome Mèliye… », Djan Goffart a podbon trové èn arindjmint beldji-bedje [compromis à la belge]. Nonna : nén mete d’ acoird les Walons eyet les Flaminds ! Mins sayî d’ raprepyî les deus ortografeyes. Tot wårdant des piceures do Feller-carolo, il a stitchî sacwants traits do rfondou ki l’ arindjént bén. Tot çoula est racsegnî mo clairmint dins les 12 pådjes al fén d’ l’ ovraedje.
Jacques Desmet ès rifondant n’ est nén l’ minme ki l’ ci do scrijheu tchålerwetî, come di djusse. Si dår, lu, c’ est puvite on metaedje-eshonne di puzieurès sôres di Feller. Copurade les accints do Roman Payis avou l’ « walon d’ après Nameur et avår la ».
L’ adierça [cible, but] des rfondants, c’ est d’ agrandi, dins les scrijhaedjes, li stindêye d’ ès prôpe diyaleke po-z esse comprindou ene miete pus lon. Sins piede les ptitès piceures di sacwants mots.
Come les diyalekes (pårler d’ ene redjon) – virpus [voire] les patwès (pårler d’ on ban) – sont ki disparexhnut, les rfondants sont dazår l’ avni do sistinme Feller. Veyanmint ki l’ Feller ès raspoye so les fômes coinreces do lingaedje.
Avou les rfondants, les scrijheus e Feller ni sont pus vraiymint oblidjîs d’ aler rcweri les miers accints d’ leu viyaedje, come il ont stî rashious e 1935 dins l’ Atlas des Lingaedjes del Walonreye.
Mins nerén, les rfondants n’ sont nén des werixh-tot [panacée]. El rujhe di passer a on rfondant po on u ene felerisse, c’ est l’ minme ki por lu u leye passer e rfondou. Ça fwait ki : ubén l’ Feller serè abandné, ubén l’ Feller va divni on novea rfondou. Po vir cwè, i fåt k’ el tins passe.
El tins n’ est nén l’ seu mzura a-z aconter. Gn a-st eto : cwè çki les soces ki boutnut al tcherete do Feller vont fé ? Si vont ele mostrer wårdiveuses ? Dj’ ô bén : meskeure l’ idêye des rfondants ? Oudon avanciveuses ? Dj’ ô bén : accepter l’ idêye des rfondants. Ou pår regregnî les rfondants come des scrijhaedjes Feller ?
Ça, mes djins, dji n’ so nén felerisse. Adon, dins ç’ match di tenisse la, el bale n’ est nén di m’ costé.
sicrît el 26 d’ awousse 2023; gn årè-st on ratournaedje e francès sol waibe Revues.be