Faut-ë crwêre

Èn årtike di Wikisource.
Faut-ë crwêre

Faut-ë crwêre

Faut-ë crwêre quë dj’èsto d’djà byin malade po skèpyi dins-on-opëtal, lë djoû d’vant l’ Noyé 1943. Mins non.na, nosse man avot d’djà yë one masse dë rûjes en 1939 avou l’ pës vî d’ mès fréres. Èlle avot d’mèré deûs djoûs ètîres dins lès maus. Èt, come dj’èsto bén là èwou qu’ djë m’ trovéve, fénèyant d’vant l’eûre, djë m’ fiéve priyi po rèche. Pës quèstion dè ravëker cès djoûrnéyes-là à yèsse mau bèsognîye : c’èst come ça qu’ mès pére èt mére m’ont fait v’në së têre dans one clënëque amon lès Flaminds à Lovin. C’èstot co cëtella qu’èstot l’ pës près d’ nosse maujone. Avou nosse vrai nom d’ famële — Desmet — pës taurd on m’ pëdrè pës aujiyemint por on vrai flamind ! Ça, c’èst po lès pondants èt lès djondants !

Cor one miète on m’ lome « Noyé » ! Më marëne Maria, qu’a todë drèssî s’ tchapelèt come on drapia, èl voléve à tote fwace. Më parén Jëlbêrt, lë, ël avot dët « Poqwè ni Jésus ? » Mins avou lë, ni moyén dè soyë së c’èstot po rîre ou po braire. Ë n’avot ni pës chënard quë lë.

Ël avot falë qu’ nosse pa, capon diâle, rëmousse dins l’ tchambe po fé tchandji lès ëdéyes dë mès deûs saîweûs.

« Vos èstoz dè l’ boune anéye vos deûs, on va rire dë m’ gamin po l’ rèstant d’ sès djoûs ! »

« Rire po Noyé, vos n’ crwèyoz ni à Dië, ni à Diâle, vos ! Vos-èstoz on-ome sins fwè ni lwè. »

Më, po m’ fé ètinde dins l’ forbatadje, dj’avo pèté m’ prëmëne râje. Faut crwêre qu’on m’a mau comprins. Nosse man m’a prësinté one tète. Come c’èstot à m’ gout dj’ènn’a rovi l’ rim-ram.

One blanke moussîye sougnante avot d’mandé qu’on laiye nosse man së r’pwâser. A paurt më pa, èlle avot tchèssi tot l’ monde à l’ëch. Nos n’èstîn’ pës qu’ nos trwès.

Lèye, maman, sôyîye è quate së s’ lét èt quë n’avot co rén dët, avot tapé on-ouy pa l’ fënièsse dë s’ tchambe.

« Qwè yèsse por on clotchi qu’on vwèt là, par en d’fou ? »

« C’èst l’ clotchi d’ l’èglîje Sint Jacques. » avot-ë rèspondë nosse pa.

« Bén, nos l’ loumerans Jacques, don Maurice, mins në l’zi dëjoz co rén asteure. »…

Ël a bén manqué quë djë m’ loume Noyé quand min.me, po fé plaîjë à m’ marëne, tièstoûwe come on boc’, sins-èfant, insëdon marëne dë sëke.

Avou lèye dj’aléve oyë po lontimps à coude ! Pëtëte nwêre méguèrlote, avou one loque à pouchêre dins sès mwins, èfoufîye come one poye qu’a pièrdë s’-t-oû, combén d’ côps a-t-ë falë quë dj’èl rabrèsse avou s’ moustatche dë gendarme.

« Rabrèssiz vosse marëne Maria, vosse marëne dë sëke, donez li cor-on bètch !… »

Dj’a tchandji d’ nom en 1945, quand lès Amèrëquins ont passé pa nosse maujone së l’ fén dè l’ guêre : dëspôy adon, on m’ lome Jacky.

Ë-n-a bén trwès këlomètes po-z-aler à scole gardiène adlé lès « Ma chère Soeur » Nosse man m’i min.ne à vélo tos lès djous. L’anéye quë vent nos-i vaîrans à pids avou m’ frére Michel, 18 mwès pës djon.ne quë më. Po l’ momint djë fais dès pëqu’tadjes èt dès trèlassadjes à m’-y-auje. Lë pës dêr, c’èst co dè causer è françès come lë « Ma Soeûr ». Po comprinde, ça, ça va, mins po rèsponde, ë m’arëve co pës sovint dè causer come on m’ l’a aprins è nosse maujone. Èt pwis, on sét mia ç’ qu’on vout dîre è walon. L’ôte djoû, dj’a volë doner on bètch à lë p’tëte Lisa, èle m’avot aîdi po rabotner m’ këlote quand’ dj’avo sti pëchi. Lë Ma Seûr a rademint acourë po nos sèparer, dj’a bén vèyë qu’èlle èstot mwaîje. D’ayeûrs, èlle a bèrdèlé së l’ paradës èt së l’infiêr po l’eûre quë d’mèréve dë l’avant prandjêre. Djë li a d’mandé së lès tchéns èto alîn’ en-infiêr, pace qu’ël arëve co bén qu’ nosse Diane, vént m’ doner on rëde côp linwe èt ralétchi m’ massale…

Djë so-st-en prëmëne anéye, adlé l’ maisse Vanôve : c’èst lë qu’a lès trwès prëmënès anéyes. Më frére Armand, qu’a quatre ans d’ pës qu’ më, est dins l’ place da costé adlé l’ maîsse Dëpont avou lès trwès-ôtès-anéyes. Nosse man li a bén r’commandé dè rawaiti à më. Mins volà, Armand n’ vwèt ni volti lë scole, on djoû së deû, ë d’mande po-z-aler pëchi… èt on n’èl rëvwèt pës dè l’ djoûrnéye. On côp, on lë r’trove dins l’ chavéye dau tiyou, on-ôte, ë racoûrt adlé s’ marëne Madelin.ne quë d’mère au Saut. Nos n’èstans qu’a trwès dins noste anéye, lë Maurice « Bouboune » Albert, lë Marcel « Postëlârd » Vanderhulst, èt më lë Jacky « Barbi » Desmet. Nos-avans lès chîs places dè l’ prëmi banc po nos trwès. Come djë so lë pës stokasse dè trwès, lë maîsse à fait passer lès deûs-ôtes dëvant më, ës sont pës spëtants. Ça fait quë dj’ so jësse àstoke dë lë stuve. Djë n’a ni à m’ plinde, djë scri mès lëgnes dë « i » èt dë « u » come ë faut à l’ crôye së m’y-ardwèsse, èt dj’a rade yë atrapé l’ tour po lès cârkëls. Së djë n’ so ni prëmi, ni daîrén, djë sèrè seûr deûzyin.me ou avant daîrén, èt dj’arè todë mès pîds au tchond !

Dëvant, adlè lès « Ma Chère Soeur », djë rèspondéve co bén è walon, mins vaîcë : djë so dobe, lë maîsse në vout pës. Djë vwè bén qu’ ça li va lon dë m’ margougni quand’ djë stëtche on mot è walon dins mès rèsponses. Èt à chaque côp, djë vwè sès lèpes quë s’ findenèt èt sès-ouy fén bënaujes. Dëvant lès-ôtes-èfants, ël èst bén oblëdji dë m’ doner dès pûnëcions, mins lë lèddëmwin, ë n’ më d’mande jamais quë djë l’zi rapwate.