Novea roman istorike e walon
C’ est on roman e walon, sicrît pa Jacques Warnier ey eplaidî ås edicions Tétras Lyre (dins l’ coleccion « Di Walonreye ») e 2021. Li fåve est publiyeye e walon sol pådje di hintche avou l’ ratournaedje francès vizon vizu (sol droete pådje).
Dandjreus ki l’ Djåke Wargnî a stî rapexhî ene viye racsegne istorike — ou est ç’ ene racontroûle ? — so on viyaedje k’ åreut disparexhou dins les bwès di l’ ancyin ptit ban del Grande Han.
Aveut la seur on molén, poy ki l’ no d’ plaece a dmoré : li Molén d’ Fåvnale. Ci lomaedje la est co rlevé insi dins les anêyes 1930 dins l’ live Haust so les nos d’ plaece del Walonreye.
Li scrijheu est eto radiowisse. Adon, i lyi a stitchî ciste idêye ci : c’ est les schoûteus di si emission « Li sîze walone » ki vont moenner l’ paskeye. Come di djusse, so on cwacwa [énigme] ki c’ est lu k’ a metou e-n erote : pa ké sint l’ hamtea d’ Fåvnale s’ a-t i dispeuplé ?
Po fé pårticiper ses schoûtants, Djåke lezî dmande ene kesse al fén di tchaeke emission. Li prumî ki respond djusse, i lyi propôze troes voyes po l’ fåve si porshure dins l’ tchaptrê d’ après. C’ est l’ voye ki l’ schoûteu·se a relî ki serè tchoezeye po l’ shûte di l’ istwere.
Fåvnale, di ces trevéns la, c’ est don bén on hamtea do conteye di Derbu. Gn a ene tchapele, k’ on pout dire ene eglijhe, poy k’ i gn a on curé. Les hamteas les pus près, c’ est Pitihan et Biron. C’ est la k’ les djins ki cwitèt Fåvnale si vont rastapler. Nos estans do tins d’ l’ Ancyin Redjime, dins les Bas Payis otrichyins, dandjreus. Mins pår divant l’ ringne di Djôzef II d’ Otriche. Kimint l’ sait on ? Paski dins si dvanzouve [avant-propos], li scrijheu nos aprind — u nos rmimbere — ki, e 1783, Djôzef II disfinda k’ i gn åye co des ermitaedjes so ses tere. Et k’ al fén do roman,… Mins i n’ fåt måy dire li fén d’ on roman, paret !