Endon k’ c’ est bon, ene boune cråsse pinte
K’ on boet e plin mitan d’ l’ esté
E riyant, e stant dvins ene bele binde
E rwaitant l’ feye do cåbaret ?[1]
Ene pinte di bire, endon k’ c’ est bon ?
Waitîz l’ eschome, lujhante, bén claire,
Blanke come nedje, ledjire come l’ amour.
C’ est tot ene fiesse dins vo ptit vere;
Ça crape å long, ça brotche å boird.[2]
Ene pinte di bire, endon k’ c’ est bon ?
Ça sint l’ solea, ça sint l’ loumire;
Ça sint meyeu k’ on frisse bouket;
Ça sint les tchamps, ça sint l’ esté.
Boere ene pinte, c’ est dire ene priyire
Mins n’ bevoz nén ça come del yô;
N’ clitchîz nén ça come dins-n on trô:
Metoz î del syince, metoz î d’ l’ apresse;[3]
Ça vos rmouwrè come ene caresse.
Trimpez vos lepes tot doûcetmint;
Onk pa onk, ramouyîz vos dints;[4]
Stindoz bén l’ bire tavå vo boutche
Fijhoz l' glissî pa finès coûtches
Sucez lu ! N’ vos dispaitchîz nén !
Boere trop rade, l’ amisse, ça n’ våt rén
Vos sintiroz ene veye sins pareye
Cori d’ vo front disca vos tchveyes !
Mins sortot, n’ bevoz nén tot seu :
Po bén boere, i fåt esse a deus
Endon k’ c’ est bon, après s’ djournêye
D’ boere a ptits côps, e fjhant ene tatlêye
N’ riyoz nén ! Ça sreut sins råjhon !
Ene boune cråsse pinte, endon k’ c’ est bon ?
Pî-notes