On Rat d’ måjhone eyet d’ aiwî,
Avaut stî cweri l’ Rat d’ paxhi,
Po vni sins ceremoneye,
Magnî on plat d’ ritchitchis.
So ene rexhe coviete ås broketes,
On boute leu platnêye d’ astok,
Pinsez, ashîs a purete,
Çk’ il ont stronné, les deus stoks !
El dinner n’ esteut nén biesse,
C’ esteut a rletchî ses doets !
Mins ene sakî vna brouyî l’ fiesse,
Tins k’ onk magnive, et l’ ôte boere !
Astok di l’ ouxh, pa ene craeye,
Vla k’ il etindnut do brut,
El rat d’ måjhone pete ås gaeyes,
Eyet s’ camaeråde el shût.
Pupont d’ brut, i n’ ont pus l’ vesse.
Totshûte presses a s’ radayî,
L’ rat d’ aiwî dit : « Magnans l’ resse,
Do boli sins esse brouyîs. »
El rat d’ paxhi dit : « Bonswer !
Èm vouss vini vir dins m’ trô ?
Gn a nén tant d’ mindjî ni d’ boere,
Gn a pont d’ covietes pattavå,
Mins, vî stok, rén n’ mi disrindje,
Dj’ magne trankile, sins awè peu.
Merci do plaijhi cwand t’ mindjes,
Avou l’ vesse come on galeus. ! »
Moråle
I våt co mî magnî ene crosse,
A s’-n åjhe, dins l’ gurnî, dzo l’ toet,
K’ vea, poye, tåte, boubounes a l’ loce
Dins ene såle, roed, biesse, et djinné.
El rat d' måjhone eyet l’ rat d’ paxhi
El rat d' måjhone eyet l’ rat d’ paxhi
rortografiaedje da Lucien Mahin
1872 (mwaisse) / 2022 (rortografiaedje)
El rat d' måjhone eyet l’ rat d’ paxhi