In Rat d’ môjone èyèt d’eûwî,
Avèt stî qué l’ Rat d’ pachis,
Pou v’ni sins cèrèmonîye,
Mougni in plat d’ ritchitchis.
Su ‘n rèche couviète as broquètes,
On boute leû plat’néye d’asto,
Pinsèz, achîds a purète,
Ç’ qu’il-ont stran.nè, lès deûs stos !
L’ din.nér n’èstèt nén si bièsse,
C’èstèt a r’lètchi sès dwèts !
Més ‘n saqui vént brouyi l’ fièsse,
Tins qu’yun mougne, èyèt qu’ l'ôte bwèt !
Asto d’ l’uch dèl tchambe, pa ‘n crâye,
V’la qu’il-intind'nut du brût,
L’ rat d’ môjone pète rade as gâyes,
Èyèt s’ camarâde èl chût.
Pus pont d’ brut, is n’ont pus l’ vèsse,
Tout d’ chute près′ a s’ radayi,
L’ rat d’eûwî dit : « Mougnons l’ rèsse,
Du bouli sins yèsse brouyis. »
L’ rat d’ pachis rèspond : « Bonswêr !
Vous′ vèni d’mwin m’ vîr dins m’ trô ?
Gn'a nén tant d’ mindji ni d’ bwêre,
Gn'a nén d’ couviètes pa t’t-avô,
« Més, vî sto, rén n’ mè dèsrindje,
« Dj’ mougne tranquîye, sins awè peû.
« Mèrci du pléji quand t’ mindjes,
« Avè l’ vèsse come in galeûs. »
Morâle
I vôt co mieus mougni ‘n crousse,
A s’n-ôje, dins l’ guèrgnî, d’zous l’ twèt,
Qu’ via, poûye, tôte, boubounes a l’ lousse
Dins ‘n sale, rède, bièsse, èt jin.nè.
L’ rat d’ môjone èyèt l’ rat d’ pachis
L’ rat d’ môjone èyèt l’ rat d’ pachis
rortografiaedje da Jean-Luc Fauconnier
El Bourdon lº 750, 1872 (mwaisse) / 2022 (rortografiaedje)
L’ rat d’ môjone èyèt l’ rat d’ pachis