Li cminçmint del sinne si passe al rowe di Nimi, a Mont.
Wice ki t' cours insi, hon, Dedefe ? On direut k' t' as l' feu a t' cou.
Dji m' va vir on bea mariaedje, feye.
Ké mariaedje, hon ?
El mariaedje del feye Chôze a Sinte-Isabete. Dji so bén seure k' on va djeter des liårds a dikeclake. Dji sayrè d' è ramasser ene boune pougneye, mi ; èm-n ome a ddja dit k' i s' fotreut ene boune tchike a leu santé ; eyet mi, dj' frè ene bamboche å tchocolåt avou des blancs pwins d' madame, avou deus troes vijhenes.
Bén oyi ! Ele si va maryî, insi, cisse pucele-martire la ! Bén va ! si ele n' a nén trové on marieu di pus boune eure, ci n' est nén fåte k' ele n' a nén des liårds assez, todi.
Ti n' as måy si bén dit di t' veye. Mins diss ! est ki ti n' vas nén vni avou mi ? Djans !
La ene cråne idêye. Rintere on moumint ; dji m' va mete ene bråye ey on lignrê å cou di m'-n efant, et pu nos ndirans a deus.
Dispaitchîz vs, savoz; pask' i n' nos fåt nén trinner, la k' i va yesse dijh eures.
Mousse todi èn åvé, va. On n' frè rén sins nos deus ! Et dj' va disfaxhî m' crikion. Djezuss Maria ! come èç-n efant le est arindjî ! Waite mu on pô come il est eberné ! I nd a sca dzo ses bresses ! La l' danse di tos les djoûs, tinoz, feye ! Maryîz vs, bele djonnesse ! Lijhoz ! La l' biyet ! Bén va ! Si l' feye Chôze voereut ç' bea placård la, diåle k' ele ni sreut pus si pressêye po s' maryî, va !
T' as bea dire, feye ; on n' pinse nén a tot ça cwand on s' mareye ; on voet ttafwait do bea costé ureuzmint ; ôtrumint sins ça, el monde perixhreut. Est çki t' årès bénrade tot fwait, hon ? Et n' mete nén tant d' espingues, va ! Po vni a l' eglijhe avou èn efant, i n' fåt nén tant d' imbaras.
La ! vo l' la bén refaxhî, tinoz ! Nos plans daler. Bon ! la k' i va braire, asteure. Tén ! prins l' tete, et waite di t' taire, fotou råskignoû ! Ôtrumint sins ça, dji t' fote el tiesse å meur, mi.
Pacyince, Madlon, pacyince ! ti n' es fok a t' prumî. Cwand t' end årès aclevé shijh come mi, ti voerès ké novele! Sins conter k' i nd a deus k' ont yeu les poketes volantes, eyet troes k' ont manké d' mori del five ås botons. Eyet co onk k' a yeu l' dissintreye l' esté passé a foice di mindjî des pronnes di tchvå, ki passént totoute di seles, el pôve efant, k' i l' åreut ttaleure falou shuve avou on ramon ey ene loke di måjhon. Tén ! dj' î tuze; savoz bén avou kî çki l' feye Chôze ès mareye ?
Nonna. Èm-n ome m' a bén dit k' ele s' aléve maryî; mins i n' m' a nén seu dire avou kî; eyet ça pask' i n' sait nén lére el lete sicrîte. I n' sait fok lére el lete molêye.
Ebén m' feye ! C' est avou onk do costé d' Ate; d' Ate et nén d' Ate, do forbot d' Bracgniye ; on monsieu k' a bråmint des çanses. On dit k' elle a fwait s' conoxhance e dalant nedjî a Spå, do costé d' Lidje ; cwand i l' a yeu veu, il a dmandé totshûte po lyi djåzer.
Téns ! asteure, la co do novea : trover in galant e dalant bagnî a Spå. Bén va ! nozôtes, i n' nos a nén falou cori si lon.
Dji croe bén : mi, i n' m'a fok falou daler in côp a l' dicåce do Crås-Moncea; Djåcot a couou sot totshute après mi.
Eyet mi ! cwand dj' a yeu fwait on valsé avou Polite, å Plantchî, a l' dicåce d' Iyon, i n' lyi end a pus falou d' ôte ki mi.
Dabôrd k' i n' nos fwaiynut nén caroter ene eternité, e-n atindant k' i fouxheche maryîs, al comene todi, i va co bén.
Way ; paski Penêye, li grete-papî del comene, i n' è finit nén avou tos ses imbaras; eyet il est agreyåbe come ene poite di prijhon, l' pus bea do djeu.
Taijhe tu ! Il aveut bén cachî margaye a m'-n ome cwand il a stî al comene avou m' ome efant.
Eyet Djacot n' lyi a nén fotou ene imådje ås cénk doets so s' vizaedje ?
Bén i n’ pout må, taiss ! Bén ti sais bén k' il est bon come el pwin, endon ? I l' a leyî berdeler, i n' lyi a djamåy respondou.
Bén va ! Dji nnî åreu fotou, mi, des berdelaedjes; est çk' i n' est nén payî po servi totes les djins, ttossu bén les pôves ki les ritches ?
Oyi, mins, avou des liårds, feye, on passe todi dvant ls ôtes, po ça.
To l’ a dit ! Et t’ vierè bén k’ ådjourdu, i n' berdelrè nén, alez, po ces-ci, cwand on lyi stocrè l’ pougn avou on gros biyet d’ cint-z uros.
O ! ti sins bén, ça ! I va fé des sierviteures a cou doviet, come el boûsse d' èn advocåt.
Si ç’ sereut mi, dj' lyi metreu purade ene bele crote di tchén dins s' mwin, purade ki d' lyi bayî ene cloutche.
Hê ! Dji croe k' la les carotches ki vnèt foû del Coû del Måjhon d’ veye.
Djusse ! Vo ndè la cénk shijh al cawêye. Corans abeye, feye, po-z atraper ene boune plaece e l' eglijhe. Nos nos metrans conte el balusse.