El leu eyet l’ agnea

Ciste ouve ci egzistêye eto divins ds ôtès ortografeyes :

Ratournaedje da Leyon Bernus (19inme sieke) — Ratournaedje da Horace Pierard (19inme sieke)

.

1872 (mwaisse) / 2024-2026 (modêye rifondowe)

El leu eyet l' agnea

Cwand on-z a ene solide pougne, et k’ on s’ sieve bén del lûte,
On-z a sovint råjhon ! No l’ mosterrans totshûte :

On djonne bedot, dlé ene gregne, sins s’ ertourner beacôp,
Beveut dins l’ fosset l’ long del cinse ;
On leu ki crevéve di fwin l’ waitive sins piede pacyince,
E cachant on moyén, po bén emantchî s’ côp :
— Kî çki t’ dit d’ rischurer tes mannets pîs dins m’ boere ?
Dit-st i l’ Leu, e mostrant s’ machwere.
T’ årès ene rôlêye, t’ es bén trop franc ! »
— Monsieu, dit-st i l’ agnea, i fåt esse boun efant,
I n’ vos fåt nén esse mwais si rade !
Vos rmarkêyroz, tcher camaeråde,
Ki dji vos sai rén fé, puski dj’ boe
Dins no fosset
Co pus d’ vint pîs erî d’ vos brokes.
Insi dji n’ såreu disrindjî,
Vo boere ni vo mindjî ! »
— T’ el disrindje, dit-st i l’ Leu, ki lyi vleut fote ès croke !
Nén èn an t' as stî dire do må d’ mi tocosté !
— Ça n' si pout nén ! Dj’ n’ esteu nén co velé,
Dit-st-i l’ Bedot, bén dj’ prins co l’ tete !
— Si c’ n’ est nén ti, c’ est t’ fré putete.
— Bin dji nd a pont ! — C’ est onk di vo binde si c’ est nén lu.
Vo m’ mastinez tertos, vos tchéns et vos bierdjîs,
Nole pårt asteure, dji n' mi sai mete a houte,
Patocosté dj’ so-st al porshûte !
Vos avoz mibme consyî on tchesseu d’ vos vijhéns
Di m’ fote on mwais côp dins les rins !
On m' l’ a bén dit, i fåt bén ki dj' m' ervindje ! »
I vo l’ l’ apougne pa l’ pea do dos,
Fote si camp avou lu dins les bos,
Et le, i l’ dispece et i l’ mindje.

Tuzaedjes

C’ e-st a s’ fote el tiesse å maur ! On voet ça tos les djoûs,
Onk est pus foirt k’ èn ôte, fåt k' i moustere ses sidjes,
I spotche les pîs des djins, i fwait tos les cint côps,
On n' oize rén dire beacôp !
I cache dispute ! On mot, rade i rtrosse ès tchimijhe !
Èn ôte feraye tofer, eyet s' i dvint adroet,
A l’ late, a l’ lûte, baston, ou pistolet,
A ene ene påjhire djin, i n' cachrè k’ plåyes et bosses,
So vo pa et vo mame, ptete vo sour, come on losse !
C’ e-st on duwel !! Radmint
Il evoye ses temoens,
Po daler sol terén !
I fåt spôzer vo pea, po on duwel k' i cache !
Si vos n' vloz nén daler, on dit k’ vos stoz on låtche !
On apele ça d’ l’ oneur !! Si vos mostrez vos brokes !
Insulté, vos dalez, vos atrapez vo gnoke
Stindou, touwé pa ene poke,
Vo leyîz padrî, po on vårén :
Ene feme eyet ds efants, sins sotén, avou rén !
Ene dispute tchait inte deus djins, on dvreut rade mete les béns.
Insulté, ataké, noeri pa ene mwaijhe malice,
N’ avans ns nén l’ tribunâ, no droets, l’ råjhon, l’ djustice ?
Cwand ene sakî come no djhans
Po s’ plaijhi s’ fote des djins, eyet cache des råjhons,
On dvreut tchaire tertos dsu, eyet a côps d’ baston,
Lyi fote ene boune luçon.