El På, c’ est on vintricåzeu d’ mestî k’ a yeu èn accidint k’ on lyi a dvou fé ene trakeyotomeye. Li chowbizz, por lu, c’ est pol diåle. I tuze a ratinde matene avou ses popenes, k’ i lzî cåze come a des djins.
Vudî l’ restant d’ blanc vén. I nd a d’ keure di l’ ôre k’ on lzès doet boere, les véns, dins les tåvlêyes des djins bén metous…
Et pu, il a-st enondé on spitch po ses rwaitants, ki dmorént bén påjhûles dins leu coine. Elzî rmimbrer el tchimin di s’ reyussite. Di leu reyussite. El pitit monde ès loukive lådje, bén seur, di s’ vey assoçner al cårire di l’ årtisse, come cou et tchmijhe. Mins po l’ På, i n’ esteut rén sins zels. Si dveut i pårtaedjî totafwait avou zels.
Ça fjheut ddja on boket k’ i n’ cåzéve pus avou s’ vwès d’ robot, mins k’ i s’ aveut metou a dvizer avou ses soçons, djusse dins s’ tiesse, e pinsêye.
Froumadje. Fé l’ fén do rodje.
Les idêyes do På ès kiboutént. I gn aveut des låmes dins ses dierinnès sondjreyes. I comincive a vey ses copleus come dins ene brouheur, come cwand on rote e spès tins.
Il a mindjî on boket d’ buche k’ esteut rassapinante ådla.
Tot riyant do gros des dints, il a tapé l’ dierin boket d’ bos dins l’ feu a l’ aisse. Il a lontins caressî l’ termosse di cafè, si vudî ene foumiante djate et s’ rashire. I tuzéve. I faleut k’ ça soeye fini enute.
Dins l’ fond del respulete avou l’ banket d’ Noyé ki s’ planket Djåke lyi aveut abouté divant l’ shijhe, etur les papîs d’ wårniteure, gn a des spites di loumire k’ ont comincî a danser. Li sclat del fouwire so l’ veule di deus mignonetes d’ armagnak. La djusse çou k’ i faleut po atchver ès tot dierin Noyé.
Il a co cåzé on pô ‒ todi dins s’ tiesse, sins moti ‒ avou ses copleus, etot vudant les deus armagnaks. Pu, sins s’ end abaiti, i s’ a-st essokî.
El vî Djerôme, ashî å mitan des dozes, a rlevé l’ tiesse.
‒ Dijhoz, les amisses, on nel va nén leyî tchaire, cwanlminme !
‒ A nonna, la ! Ça sereut pår li foete ! k’ il a dit l’ clône Bouli.
‒ Cwè çki ça t’ pout bén fé, ti, Djerôme ? Vos avoz todi stî khigne-khagn !
‒ I n’ m’ a djamåy leyî so l’ costé. I n’ m’ aveut nén tchoezi, mins i m’ a wårdé, m’ a trové ene vwès et m’ a bayî on vicaedje come ene djin.
El Djerôme a moussî foû di s’ malete di cwårton et s’ a-st avancî adlé l’ På k’ esteut cloupé so s’ tcheyire, les keutes divant çki lyi aveut siervou d’ assîte. El pantin aveut dins les ouys ene louweur di slo ki s’ leve. Il a gripé sol tåve e s’ agritchant ås nipes do På.
Divant l’ ouxh, il aveut cmincî a payter [neigeoter]. Des flotcheyes grosses come des pîces di deus uros, ki tcheyént tot bén doûçmint. Po l’ côp, li lune n’ esteut pus tola...
Cwand il a ataké a fé trop froed, el På a yeu des frumjhons. I s’ a cohossî come on canård ki mousse foû d’ l’ aiwe. El bodet å bos, k’ esteut vude divant k’ i n’ si metaxhe a sokî, esteut rimpli. Sins s’ dimander cwè, il a prins deus schinetes et les a hiné dins l’ feu. Pu i s’ a metou a shofler so les braijjes po ratoker l’ blamêye.
Il a-st apougnî l’ termosse, ey apicî l’ djate. Mins cisse-ciale lyi a schapé foû des mwins po s’ aler peter a cassons sol pavmint.
‒ Nodidju ! k’ il a boerlé.
Il a dmoré tot reyusse divant l’ son di s’ vwès. Il a rwaitî ses cpagnons onk après l’ ôte, tot purdant s’ tins. Pu, avou s’-n eridoet [index], il a cwerou après l’ trô so s’ goidje. Li trô del trakeyo. Mins ‒ sereut ç’ on miråke di Noyé ? ‒ i n’ a sintou k’ ene pelete bén lisse...
I veyeut sol margoulete di ses popenes on riya d’ binåjhté. Et dins leu rwaita ene blawete di malignansté. Neni, ci n’ esteut nén li rglatixhaedje do feu !
Li nedje s’ a djoké. El grosse lune a dischiré les nouwaedjes ey espåde ene loumire di fiesse pattavå l’ tchambe. Pu, tot dansant padrî les firlotches des nûlêyes di l’ åmatén, elle a leyî vni, tot belotmint, el solo d’ ivier k’ aléve bayî ene rôze coleur a l’ blankeur del nivaye.
Cwand l’ solea k’ on-z a dit arivrè assez hôt dans l’ cir po dire ki l’ djoû est tola, nosse På årè ddja ataké a scrire ès novea spectåke...
Motoit on spectåke di Noyé…