Djâquelène seûle
Gardiène ayou ! qu'èst-ce tot çoci ?
quéle tristèsse, quéle anôye voci !
i n'y-a qu' deûs' treûs djoûs qui dj' pinséve,
— tot costé tot l' monde mèl dihéve,—
qui nos-alins miner bone vèye
â mariyèdje di nosse djône fèye,
qu'on nos-aléve fé si grande fièsse
qu'on-z-eûhe djèté foû po l' finièsse
lès-ouh, sipiyî lès possons
èt ç' qu' i-ny-aveût d' bê èl mohon,
èt s'eûhins-n' tot è crâhe fondou.
Tos lès pourcês eûhint corou,
lès vês èt lès moutons rostis,
avâ lès vôyes èt lès cortis,
li coûtê planté d'vins lès rins
èt on pan d' sèt' lîves inte lès dints.
Bèni ! n'èst-ce nin po arèdjî
qwand dj' veû qu' tot çoula èst roûvî?
Li diâle s'è-st-i bin v'nou mèler
dè fni cisse hâsplêye dik'mèler !
Dj'arèdj'reû bin qwand c'èst qu' dj'î pinse,
ca dji n' pou pus s' dji n' pièd' pacyince !
Mins n' veû-dj' nin là m' cuseune Marôye?
C'èst lèye-même qui rèbise si vôye.
Bon djoûr èt santé, grande cuseune !
Quî ? qwand ? quéle bone ou mâle fôrteune ?
pârlez, qu'èst-ce qu'i-ny-a qui v' rètchèsse ?
qué mâva vint qui v' done âs fèsses ?
Marôye
Pa ! ciète, bâcèle, dj'a trové bon
d'è vite aler foû d' cisse mohon :
'l î fait pus trisse qu'âs monumints !
Dji creû, si dj'eû stu djusqu'à d'main,
dj'eûhe difnou pus sètche qu'ine èstale :
tot î èblave ! tot î èhale !
on sospère, on djèmih, on pleûre;
ine saqwè d' blanc î avise neûr.
Qwand dj'a vèyou ci r'mowe-manèdje,
dji v's-a bin vite trossé baguèdje,
èt s'a-dj' tchâssî mès grands sabots,
s'a-dj' corou foû sins dîre on mot.
Dj'a corou foû po l' pwète di drî;
dji pinséve rascûre noste Andrî :
dj'arè dèl pône dèl ratraper.
Djâquelène
Amor di bâcèle, ratindez :
Vos 'nnè rîrez tot-asteûre ;
dimorez cial on p'tit qwârt d'eûre.
Prindons ciste afaire pus-avont ;
racontez mèl turtot-â long.
Marôye
Qui l' grand diâle vous-s' qui dji t' raconte ?
Il èsteût d'â coron dè monde
vinou è hâsse on djône baron
po sposer l' fèye di nosse mohon.
Li pére èt l' mére èl volint bin,
mains l' fèye a dit qu'ile n'è f'reût rin,
qu'ile si lêreût putwèt qwât'ler
qu' di s' lèyî d'in-ome cadjoler.
Li pére èt l' mama toûr à toûr
lî alint fé dès longs discoûrs,
po lî r'mostrer tortot doûcemint
li twèrt qu'ile féve à sès parints,
li twèrt qu'ile si féve à lèye-même
d' rèfûser on s'-fait ome qui l'aime;
s' lî racontint totes lès ritchèsses
dè djônê qu' lî boutint èl tièsse,
qu'il èsteût bê èt qu' 'l èsteût bon,
pitit, djoli, friyand, mignon,
qu'il èsteût v'nou d'on lon payîs,
rin qu' po avu l' bin dèl vèyî.
A tos cès sièrmons nosse djône fèye
aveût dès stopes si plin l's-orèyes !
si bin qui s' pére èt s' mére cor'cîs
kimincint bin fwèrt à l' man'cî;
Mains ine bèle nut′ qu' po tote li tère
i féve, creû-dj', pus neûr qu'èn infièr,
ile riplôye tot doûcemint s' paquèt,
si s' ritère-t-èle sins dîre adiè.
 matin s'èlîve li vacarme :
on crèye â feû, on crèye âs-armes.
I n'y-aveût ni dj'vâ ni tchèrète,
carotche ni clitchèt ni bèrwète :
portant, on s' mètéve è cèrvê
qu'èle n'èsteût nin lon dè tchèstê.
Onk coûrt èt l'aute qwîrt d'on costé;
lès-autes sond'lèt sins rin trover.
Onk dit qu'èle a passé 'ne rivîre
sins nêveû èt sins nole navîre.
Dji n' mi mèle pus di tot çoula.
Diè v' don bon djoûr ! por mi dj'è r'va.
Djâquelène
Vièrdji-Marèye, qu'ille a stu sèdje
di s' tirer foû di ci passèdje !
Treûs qwate djoûs après l'acwèrd fait,
tot l' monde si r'pint di l'avu fait :
Èt l' baron dè monde li pus bê,
'ne samêne après, c'è-st-on houlpê.
Çou qu' c'èst dè monde èt d' sès plaisîrs !
ci n'èst qu' vint, ci n'èst qu' dèl foumîre !
Marôye
Tot l' monde sèl boute èl tièsse ainsi ;
mi, dji m' l'î boute asteûre ossi.
Dji n' m'a mây ripintou qu'ine fèye
dè n' nin avu d'moré diône fèye
tos mès longs djoûs. Il èst bin vrêye,
qwand cisse-là eûhe situ mariêye,
qu'èle eûhe aou à l'abandon
tot çou qu'i-ny-a di bê èt d' bon;
mains èle ni qwîrt nin tot çoula;
d' l'oneûr dèl tère èle n'è fait cas.
Tot çou qui dj' creû qu' cisse bâcèle qwîrt,
n'èst nin al tère, il è-st-â cîr.
Djâquelène
Marôye, dj'ènn' a-t-assez oyou
po m' nin marier di m' vèye, si dj' pou.
Vola l' cîr qui va difni neûr :
po 'nnè raler v' n'avez qu' voste eûre.
Dihez-m' li bone nut′ à vos djins"
Marôye
Bone nut′, Djâquelène ! djusqu'à aute tins !
Eplaidî po on prumî dins l' Annuaire dela Société Liégeoise deLittérature wallonne, 19, 97-113; rimetou divins l' live Djihan Haust avou dijh vîs tecses so les cmeres et l' mariaedje, pp 62-70