Dixmude
(Vûsion d'avri 1916)
Tot moussant foû dèl wêde, li pazê s'arèstêye:
« On n' passe pus! » Lès téres sont totès vètes…
Lès sminces ont djômi
Nole trace di l'aute såhon… Siya, dès mwètès foyes
Å pîd dèl håye d'årdispène tote florèye…
Cès fleûrs-là sont bin bèles èt leûs frizès hinêyes
Fèt qu'on rtûse bin lon…
Å mitan des bouteures qui l'solo sonle wêtî
Ine neûre creûs halcote,
Et l'neûr casse qui lî chève di corone
A co l'air dè man'cî…
Lès s'minces ont djômi so l'fosse qu-è-st-aband'nêye
L'osté monte tot doûç'mint……
On djoû, lès pôtes d'ôr sèront grandes,
Ele sèront tél'mint grandes qu'on n'veûrè pus l'neûre creûs,
Lès-oûhês pass'ront là sins qui l'pawe lès fèsse taire;
Et tot sèrè roûvî…
Mutwèt…