Dji vs vôreu todi prinde
Dins mes bresses sins ratinde
Et vos dire tote èm djoye
D' vos awè rescontré,[1]
Télmint dj’ inme bén daler
Avou vos m’ pormoenner.
Tos les semdis å niût,
Dins les bos, sins fé d’ brut[2]
Paski dins mi ptit cour
Dji rsint bråmint d’ bouneur.[3]
Gn a bén pacô del plouve,
Mins tchaeke côp, dji vos rtrouve
Et k’ impôrte les såjhons,
Dji so todi dins l’ bon.
S’ i gn åreu do foirt vint,
Dji vos tindreu bén l’ mwin,
Mågré l’ bijhe ki shofele
So vos doucès mashales.[4]
Et cwand rvénrè l’ prétins,
Dji rtrovrè mes anêyes vint.[5]
S’ i gn åreut do solea,
Dji sreu bén dins vos bresses[6]
Dji rtrovreu co m’ djonnesse
Po vos fé des caresses.
Cwand s’ evont les nouwaedjes,
Vla k’ dji pinse å mariaedje;
Mins dji tén a vos l’ dire,
Ki ça n’ såreut esse pire :
Ki d’ totes les ptitès stoeles,
C’ est surmint vos l’ pus bele.[7]
Dji n’ èm sin nén tot seu,
Et, dj’ endè so-st ureus.
On betch so vo mashale:
Ça î est, vla k’ dji triyane;[8]
Dji triyane come nén deus
Paski d’ vos, dji so bleu.
Dji rwaite dins vo coirsaedje,
Dji rabresse vo vizaedje,
Ki dj’ oize a poenne toutchî
Peu d’ serer vos beas iys.
Vos belès mwins tindowes
Èm sohaitnut l’ bénvnowe.
Çou k’ dji pou sohaitî,
C’ est bén d’ vos vir voltî
Eyet çoula podbon,
Endon mi ptit poyon ?
Diclaråcion d’ amour
Ciste ouve ci egzistêye eto divins ds ôtès ortografeyes : Feller-Goffart.Diclaråcion d’ amour
Li Rantoele lº 80,
Diclaråcion d’ amour
]]
- ↑ Ritche rimaedje « jwè » / « rèscontrè » dins l' mwaisse modêye.
- ↑ Ritche rimaedje « gnût » / « brût » dins l' mwaisse modêye.
- ↑ Ritche rimaedje « keûr » / « boneûr » dins l' mwaisse modêye.
- ↑ Ritche rimaedje « choufèle » / « machèles » dins l' mwaisse modêye.
- ↑ Cron pîtaedje ossu dins l' mwaisse modêye.
- ↑ Ritche rimaedje « solia » / « bras » dins l' mwaisse modêye.
- ↑ Ritche rimaedje « stwèle » / « bèle » pout dmorer e prononçaedje zero-cnoxheu.
- ↑ Ritche rimaedje « machèle » / « trimbèle » dins l' mwaisse modêye.