Li pris « teyåte » del Kiminålté Walonreye-Brussele 2020 ala mitan-mitan po deus pîces istorikes. Li prumire, da Rose-Marie François (e picård) «Filipet et Djihan» eyet l’ ôte da Michel Meurée avou Michel Robert : «Vauban, todi lu».
Li pîce e picård mostere Froissart, on né-natif di Valinchinne, ki va trover li rinne d’ Inglutere, ki provént do minme payis, et ataker a dvizer e picård.
Tant k’ a « Vauban, todi lu », dj’ el diveu-st aler vey a Djerpene li 27 di nôvimbe, mins couye berdouye ! gn aveut ene kimere k’ aveut-st atrapé l’ cron virûsse, et l’ djouwaedje a stî rmetou. Bawaite ! ci serè kécfeye pol moes d’ måss.
« Vauban, todi lu » si passe do tins ki li rwè d’ France Louwis catoize aveut prins Tchårlerwè, et si årtchiteke vini vey çou k’ aveut flantchî dins les disfinses, po médyî les difåts.
Li pîce ki nos end alans cåzer, pol djoû d’ ouy, ele si passe cint ans après, do tins d’ Napoleyon. C’ est l’ ouve da André Mus, on scrijheu k’ a djouwé teyåte a Djilî avou « Les Disciples de Chenier ». Elle î a stî creyeye e 2015.
Mins leyans li scrijheu espliker les ca et les ma.
Dimandeu (Dm.) : - Vos av sicrît ene pîce di troes akes. El ploz raconter ?
André Mus (A.M.) : Po dire li vraiy, l’ istwere comince dins l’ såle. C’ est on grand-pere ki va cweri ès pitite-feye a scole. Ey el pitite-feye, ele påle do tins passé, ou çk’ i gn aveut des belès cotes ‒ c’ est tot çou k’ elle aveut ritnou. Mins l’ grand-pere esplike ki : tincion ! i gn aveut cwanlminme des målåjhistés ; on n’ aveut nén tot çk’ on a asteure po viker ; c’ esteut pus målåjhey ; on-z aveut froed, d’ l’ivier, et tot ça.
Et ça, ça vént do fond del såle. Ey adon, cwand il arivnut toprès del sinne, la, i gn a l’ ovrî ki dit ‒ pask’ i sont-st e trén di rfé l’ toet del måjhone ‒ « Di ! on a rtrové on saetch. »
Efectivmint, i gn aveut on saetch avou… des afwaires didins. Et dins l’ saetch, i gn a ene blouke ; ene blouke ås tchveas. Et i gn a on live, on cayé ‒ on direut asteure, dji n’ sai nén, mi ‒
Dm. : - On djournå ?
A.M. - Oyi, c’ est ça ! Eyet l’ pitite feye, elle est e trén d’ lére sol boird del sinne. Ey e minme tins k’ ele lét, el ridea s’ drove. Ey adon on voet Violinne ki scrît çki l’ pitite feye lét. Ey adon, elle esplike tote ès-n istwere.
Et l’ istwere, el fi, c’ est : elle aveut èn amoureus, k’ esteut ene miete vif. Elle a eto on bon camaeråde, mins ki s’ va maryî avou ene di ses amiyes. Ey elle est télmint continne k’ i s’ va maryî avou s’-n amiye k’ ele li prind dins ses bresses. I sont ureus, cwè, mins sins… sins pont di...
Dm. : - Sins må sins malice !
A.M. - Sins må et sins malice ! Adon, a ç’ moumint la, i gn a s'-n amoureus ki voet ça et… ki pete å diåle. I va disca l’ cinse k’ est la pus lon ; i prind on tchvå et i va po s’ egadjî dins l’ årmêye di Napoleyon. Alôrse, ele n’ a pupont d’ noveles, et tot ça.
Et on voet, a on certin moumint, el bîwak, inte Beamont et Flipveye. Et la, i rescontere on djonne ki lyi esplike ki, di totes manires, non ! i gn aveut rén inte di zels, puski lu, èç gårçon la, i s’ va maryî avou ene ôte. I s’ aveut completmint brouyî.
Infén, e gros, c’ est ça, hin.
Et po fini, i rvént cwanlminme. Et ça s’ arindje.
Et cwénze ans après, el gayård, il est co evoye. Paski c’ est l’ revolucion bedje.
Ey adon, la, i rvént. Ey adon, ele prind… ‒ pask’ i gn aveut on såbe eto dins l’ saetch ; ça dj’ aveur rovyî d’ el dire ‒ ey adon, ele prind l’ saetch, ele mete li såbe dins l’ saetch, avou l’ cayé et tot l’ bazår. Et c’ est adon k’ c’ est fini, cwè.
Vla !
fitchî son eredjistré pa Lucyin Mahin li 22 d’ nôvimbe