20 di nôvimbe 2020
Li Covite 19[1] moenne li danse sol tote li Tere dispu des moes ! Les courbeures del parminêye montèt todi dpus.
Les cenes et les cis ki sognèt les djins si touwèt a l’ ovraedje. L’ oreca (les caftîs, les plaeces k’ on-z î magne…), i sont tertos ki s’ råyèt leu dierin tchvea.
Et les scolîs sont-st e scole did lon, e scole « éndjolike » sapinse k’ on n’ dit.
Les djins ki bodjèt bråmint, come les sportifs, sont-st ossu toutchîs pal minêye. Ci mwais cayet la a rindou patrake nos vicaedjes. L’ ome roye et l’ Bon Diu disroye, dit-st on. Mins, asteure, gn a pus nolu ki roye. Nos idêyes so l’ avni sont-st evoyes !
Fåt trover des ôtès idêyes po n’ nén divni fô ! On s’ î fwait u on î passe !
Poûssez a tins sol boton « poize » et profitez di ces moumints ci, ki vos n’ estoz nén todi tchôkîs å cou po shuve èn aeura. Et s’ prindoz l’ veye do bon costé ! Ni schoûtez nén vos niers et tcheryîz pus lon, påjhûlmint, trankile come Batisse. Ni vos leyîz nén stofer pa des hisses et des fobeyes. Dijhoz vs k’ on è rexhrè bén on djoû !
20 di decimbe 2020
Après on deur recloyaedje, vo nos la sol boune dischinte ! Bén åy : les courbeures ridchindèt, et rade ! Mins dji n’ î estans nén co, al taeye ås fraijhes ! Pont d’ Noyé, pont d’ novele anêye ! C’ est teribe !
Les botikes sont drovous mins nén tertos.
Pont d’ cwefeu ! Pont d’ masseu ! Dji vons sey des ipîs et des achurnåves (cåzu paralijhîs).
Les djins cmincèt a s’ discoraedjî. Ça va tourner må, la, tot ça !
Schoûtez bén, vozôtes, les djins ki sognèt les niers : vos åroz d’ l’ ovraedje ! Et vozôtes ossu, les sogneus et sogneuses. Co dpus k’ les docteurs.
Å passaedje, on vos rdit co merci bråmint des côps ! Deus mercis ni s’ batèt nén.
Djans ! Fåt viker ! Et bén viker ! Ni nos leyans nén disbrôler. Et, come li djheut Annie Cordy…
Ça irè bén mî dmwin
Et tot finixhrè bén ;
I fåt prinde li veye
Come ele vént !
10 di djanvî 2021
Come dj’ el dijheu, i nos fåt prinde li veye come ele vént. Ey ele vént bén. Waitîz, enute, å prumî moes d’ l’ anêye 2021, ebén, on vos va piker, si vos vloz bén !
Mins, ni tchictez nén, målureus, vozotes. On l’ doet fé, si on vout moussî foû del minêye. Ça srè ene dilivrance po tertos !
25 di djanvî 2021
Et on pike, on pike,… mins pattavå l’ Daegne !
Ké-n ovraedje di nûton !
Cénk, shijh sôres d’ eploctas !
Et l’ bon, c’ est l’ ké, po contrer l’ ôte camaeråde k’ a skepyî e l’ Nonne-Afrike, ou s’ grand fré ki nos a-st arivé del Mantche, et tos leus ôtes pitits frés di håre et d’ hote.
Djans ! On n’ a pus k’ a ratinde si toû po k’ on nos mete les plokes ![2]
15 di fevrî 2021
C’ est po enute u po dmwin ? Pont d’ response ! On s’ amwaijhit ! Mins on s’ rapåjhe docô. On s’ tént bon ås coxhes. Gn a k’ ça a fé ! Ça vénrè bén on djoû. Li cawe di nosse tchet a bén vnou !
Motoit ki l’ solea nos amoennrè des bounès noveles po l’ esté, et k’ on pôrè rviker on pô !
E ratindant, bon coraedje a tertos !
avoyî li 2 d’ måss pa E.G. (ki n' vout nén dire si no); les dates ont stî rmetowes a l’ avirance pa l’ eplaideu, k’ a ristitchî kékes paltêyes håre et hote.
Pî-notes