Dispu l’ moes d’ fevrî, li monde est tot a l’ evier. Gn a on novea voyaedjeu, nén åjhey do tot, ki vént disbråler l’ payis. C’ est on måva byin. I fwait bråmint des ravaedjes dins les djins. C’ est on virûsse, åy (mins nén on bråve vî Rûsse ki djowe del balalayca). On laid diåle ki laixhe des traeces et rind les djins on pô målureus.
Li peu est dins totes les måjhons. N’ åyoz nén peu. Vola kékes regues po nel nén atraper. - si laver les mwins sovint ; - ni pus diner l’ mwin po dire bondjoû : on clignaedje del tiesse sufit ; - nén tossî dins l’ figueure des djins, ca des ptitès gotes di tossaedje vos pôrént diner l’ virûsse ; - cåzer a on mete des djins ; - shofler s’ nez avou des motchoes d’ papî ou dins s’ keute ; - dimorer e s’ måjhon si on-z est malåde ;
Ni vs è fjhoz nén. On-z è vénrè mwaisse. Gn a des djins pus savants k’ nozôtes ki cwerèt des vaccins. I trovront bén, mins fårè ratinde on pô.
Çou k’ dj’ è sondje ? Rén d’ bon, hin ! ou motoit on pô do bon : - Des moirts et des moirts dins tos les payis… ça va surmint regler li trop d’ djins so l’ tere… et l’ fwin dins l’ monde. - Motoit bén k’ les djins vont-z esse pus « åjheys a viker eshonne » et k’ les bounès valixheurs seront rmetowes e leu plaece. - Mins gn a ossu les sôs a trover. A ! les sôs ? I s’ fårè seur lever d’ boune eure ! Ça va coster tchir. Comint fé ? - Dji so seure ki les djins vont-z esse pus djintis etur zels, et k’ i gn a des pus grands eterloyéns ki s’ vont nukî. Ci sereut si bén si on rcåzreut dpus eshonne ! - Et l’ syince… li medcene : elle årè co fwait des avancêyes avou ça. C’ est bén !
Et pu, on clape ses deus mwins eshonne po diner des bravos a tos ces-la ki nos åront sognî. On n’ les roveyrè nén !
… on doet dmorer « confiné ». C’ est on mot k’ on n’ etind nén sovint. On doet dmorer « reclôs », cwè ! Minme si l’ solea lût ; minme si ça nos costêye.
On doet-z esse des djins ki compurdèt les rîles a shure, et les fé sinnes. Minme si, a costè d’ nozôtes, gn è-n a bråmint ki s’ fijhèt rmarker come des « pinsamis » pa leu rén do tot d’ civisse. Ça fwait del poenne, mins ça mostere bén, e l’ agrandixhant, li peure nateure des omes.
Nosse payis s’ end a sôrti putoit bén, disk’ asteure. Mins ratindans co on pô, ca pol moumint, on sondje k’ on n’ est nén co schapé.
On doet schoûter, et dmorer reclôs ; c’ est l’ meyeute des tchôzes a fé.
« Dimorez e vosse måjhon, purdoz bén sogne di vos, et des ôtes ! » Ces mots la k’ on lét tocosté, schoûtans les.
Des boirgnasses et des fôs veråts, end a plin les voyes. Des « bouxhe-tot-djus » ossu, savoz bén, don, des cis ki s’ creyèt pus maléns ki ls ôtes.
Et on voet des djins ki n’ schoûtèt nén : i vnèt a l’ Årdene ou i vont al mer. I s’ pormoennèt pattavå ; i djouwèt dins des plinnes di djeu. Il ovrèt cwand i n’ plèt nén. I n’ dimorèt nén a ene boune longueur di vijhén. I raftèt ttafwêt (aprume li papî d’ tchiyote) dins les grands botikes.
Mins on djoû, la k’ i rescontrèt l’ police ki s’ pormoenne, et raf po leu poite-manoye !
Vla pocwè k’ on doet-z esse reclôs pus lontins disk’ å dijh-nouv do moes d’ avri, et motoit dpus. On s’ è sovénrè.
Mondju ! Cwand pôrans dj’ tchesser evoye ci laid diåle la ki disbråle li monde, et k’ i n’ î rvegne pus ?
Li veye continouwrè.
On brairè ses moirts, on les contrè, on les eterrè.
On rvicrè come divant… u nén.
On rtravayrè, on rirè, on fiestirè ; ci serè deur, mins on î arivrè.
Les efants riront a scole èt l’ monde continouwrè a tourner.
On serè pus rwaitant dins tot, dji croe.
Li fén do recloyadje ? Ådzeu, on dit k’ ça sereut pol troes d’ may.
Ratindans ! Dji voerans bén.
Dj’ estans li 11 do moes d’ may. Li govienmint et les sincieus ont decidé di dlåtchî on pô les djins. Ouf, ti ! Il esteut tins.
Mins ci n’ est nén co wangnî.
On pout rçure cwate djins e s’ måjhon, et todi les minmes dins on ceclaedje di 100 kilometes.
Les magazins et les martchands vont rdrovi leu-z ouxh.
Les scolîs vont rintrer.
Bén, c’ est ddja ça !
Mins on doet todi respecter les mwaissès rîles. Li virûsse n’ est nén co evoye. Et i pout rariver come on voleu, et co pus foirt ki l’ prumî côp. Et nozôtes esse resserés et reclôs co on côp.
Schoûtans tertos, et å diåle ci virûsse la. I n’ årè nén nosse pea.
Motoit k’ on pôrè-z aler e condjî di l’ esté.
Adon, dji sohaite a tertos on boun esté et des bounès vacances.
sicrît pa E.G. (ene djin del copinreye di Libin ki vout dmorer anonime); rimetou e rfondou po l' eplaidaedje Rantoele