Li solo toke èt språtche li viyèdje, makant bièsses èt djins, a Isztimér.
Li longowe rowe, qui n’ monne nole på, s’ kihètche inte sès deûs rôyes di blankès mohones turtotes parèyes, a Isztimér.
Nou cok ni tchante, nou tchin ni hawe, nol èfant n’ djowe, nole feume ni taram’tèye, on ôt nou brut a Isztimér.
Siya, portant, amon lès-Al’mands, ine saqwè mûze. È l’ombe, dizos l’årvô, on vintilateûr brèsse èt rabrèsse li pèzante êr. Avatchi è s’ fôteûy a bascule, spitant come ine mosse, li Drèher al mwin, Gunther sofèle. Si grosse panse di bèveû d’ bîre si gonfèle sûvant si-alène èt dès grozès gotes lî corèt tot dè long di s’ gorlète.
Bzzî, bzzî, ine wèsse vint toûrnicoter åtoû di s’ tièsse èt zûnèye a l’ fé assoti. Mins, vola qu’èle plonke so l’ tåve ca èle vint d’apèrçûre dès potês å mitan dès r’vièrsèyès botèyes. Gunther riwête on moumint l’ bîbisse lofeter l’ breuvèdje, pwis i r’toûne divins sès sondjes. Qui fout-i la, a Isztimér ?
Isztimér ! Ènn’a-t-on r’batou sès-orèyes avou Isztimér! Si mame, li Bon Diu åye si-åme, n ‘aveût qui ç’ mot-la a l’ boke : Isztimér ! Èt di s’ rapinser s’ djonne timps.
Il a co d’vant lès-oûy lès freûdès baraques di Ratisbonne, qu’on î aveût rèssèré dès tropês d’ rèfûdjîs, come zèls, dès pôvès djins qu’avît tot pièrdou : leû payis, leû mohone… Il î vikéve avou s’ mame èt sès deûs soûrs èt co sès grands-parints. I r’veût l’ grande plèce tote nowe èt sins loûmîre. Pwis, bråmint pus tård, l’apartumint sins djôye, divins on noû cwårtî di hôtès toûrs...
Tos lès djoûs, on î djåzéve d’ Isztimér, dèl mohone qu’il î avît, avou s’ vègne hågnèye so li d’vanteûre, di leû corti, di leûs tchamps, dè solo qui r’glatihéve djoûrmåy, dès grozès trokes qui s’ grand-pére sitwèrdéve lu-minme èt dè vin d’ l’ânèye, qui lès tonês dèl cåve ènnè r’dohît.
Èt totes cès riminbrances d’on pièrdou paradis s’avît k’mahî è s’ cèrvê d’èfant avou lès contes qui s’ mame lî racontéve po l’èdwèrmi. On î djåzéve di macrales èt d’ l’ome havèt, mins ossi di princes èt d’ bièrdjîrèsses. Èt d’ radjouter sovint al fin :
— On djoû, vos vièrez, nos r’toûn’rans a Isztimér. Èt a fîyes : Ni roûvîz djamåy qui nos-èstans dès Chwabes.
Ca l’ vî papa avou, racontéve dès-istwéres a l’ èfant. Kimint, n-aveût bin lontimps, dè timps dèl grande Marîye-Tèrése, leûs tåyes avît qwité leû payis po-z-abaguer vêla, dins lès novèlès téres qu’on v’néve a hipe d’ènnè trak’ner lès Turcs foû. Kimint qu’ zèls, lès Chwabes, avît distrût lès forèts èt båti lès-èglîses èt lès viyèdjes. Kimint qu’ gråce a leû corèdje, li tére aveût rataké a noûri lès-omes.
I lî djåzéve avou dèl grande guêre, qu’i s’î aveût batou disconte lès-Itålyins... Dèl tchance qu’il aveût-st-avou d’ ènnè riv’ni, la qui s’ fré, lu, aveût s’ nom gravé so l’ monumint ås mwérts.
Adonpwis, ç’aveût stu l’ Hongrèye èt i l’zî aveût falou djåzer leû drole di lingadje, zèls qui n’ l’avît måy apris è scole. Èt il aveût bråmint sofrou è parfond d’ si-åme.
Mins on djoû, il avît rilèvé l’ tièsse, ca, dihéve-t-on, on aveût magnî s’ neûr pwin èt tos lès-Al’mands s’alît rassonler èn-on grand Reich po mèy ans. Et, avou s’ fi, i s’avît rachiou al Volksbund.
Èt l’ guêre lèzî aveût toumé so lès rins. Li papa da Gunther n’aveût måy pus r’vèyou s’ fi, ca come dès mèyes d’ôtes, il aveût disparètou ine sawice èl Russîye.
Adon, vola qu’ li brut cora qu’ lès rodjes arivît èt, qu’ tos lès cis dèl Volksbund alît-èsse pindous. Li grand-pére atèla lès dj’vås ; on tchèrdja-st-è bègnon tot çou qu’on î pola mète, èt tote li famile dè prinde sès clics èt sès clacs èt d’ tchèrî so l’Al’magne. Lès vîs parints n’ont måy pus r’vèyou leû patrèye. Qwand il ont d’hoté, on-z-a broû1é leûs cwérs, èt leûs cindes dispårdowes d’aler wice qui l’ vint lès sofla...
Gunther, lu, a fêt sès scoles èt a div’nou mêsse-ovrî mon Volkswagen. Il a marié l’ grosse Èrna èt i vikèt so blancs peûs, leû deûs.
Mins vola l’ comunisme so flote èt lès frontîres å lådje èt, abîye avou s’ mame, il ont riv’nou a Isztimér.
Èl longowe rowe qui n’ monne nole på, leû mohone èst co todi la, avou s’ vègne hågnèye so li d’vanteûre, èt s’ vî pus´, èt s’ corti... Il ont ratch’té leû bin å ci quèl tinéve, po quéques mèyes marks, i-n-a dîh-ans dèdja !
Avatchi è s’ fôteûy, dizos l’årvô di s’ blanke mohone tote fî parèye qui l’s-ôtes, dè long dèl vôye qui n’ monne nole på, Gunther tût’lèye si botèye di Drèher, èt i s’anôye, i s’ anôye...a Isztimér.
sicrît li 27 di fevrî 2001